نڤیسار

رۆلێ ژنێ د شۆرەشا گولانێ دا

 ژنان رۆلەکێ مەزن و جهگرتی د سەرکەفتنا شۆرەشا گولانا پێشکەفتنخواز  دا ھەبوو.


کاژین شەوکەت


ئەگەر ئەم پێناسەیەکێ بدەینە ژنا کورد د دیرۆکێ دا  وێ رۆڵەکێ پێشچاڤ هەبوویە کا چاوا ژیانا خوە ب رێڤەبرییە و کا چاوا خودانا تایبەتمەندیێن خوە بوویە. ژنا کورد، جودا ژ ژنێن نەتەوێن دن یێن جیهانێ، کو شیایە هەم دایک و هەم باب بیت ژ بۆ زارۆکێن  خوە پەروەردەو  و ب خودان بکەت، هەم پێشەنگییا جڤاکی بکەت، هەم ژی بەشداریێ د شۆرەشان دا بکەت و  ژ بۆبا بدەستڤەئینانا مافێن نەتەوی یێن گەلێ کورد و ئاخا کوردستانێ، مل ب ملێ زەلامان رووبروویێ دژمنان ببیت.
ژ بلی ئەرکێن مال و بخودانکرن و پەروەردەکرنا زارۆکان کو رادبوو ب کارکرنا جوتکاریێ ژ بۆ دابینکرنا پێدڤیێن خوارنێ و دروستکرن و بەرهەڤکرنا خوارن و پێدڤیێن هەڤژین و کەسوکارێن خوە یێن پێشمەرگە و شیشتن و دورینا جلکێن وان کو ب ئەرکێ خوە دزانی، د هەمان دەم دا ژنێن کورد مل ب ملێ زەلامان و هەلگرتنا چەک و تفەنگێ د ناڤ چیان دا کار و خزمەت کریە. ژنێن کورد هەر ژ کەڤن دا هەتا نها پالپشت بوویە ژ بۆ خەبات و تێکوشینا پێشمەرگەی د شۆرەشان دا و ب تایبەتی د شۆرەشا گولانێ دا  کو ب ئەرکێ خوە دزانی، تەڤی ڤان هەمی ئەرکێن گران ل سەر ملێن ژنا کورد، ئەو شیا دەستا نەداهێلیت بەردەوام بیت ل سەر تێکوشینا خوە، ماندی نەبیت، سەری بۆ دژمنان نەدانیت و شیا ل گوپیتکا پیشەنگیێ و لەهنگیێ بیت. د نها ژی دا دشیاندایە ژن د ڤان ئەرکان دا بەردەوام بیت و گوهەرینان د قۆناغێن نها ژی دا بکەت و پێشڤەچوونێ د جڤاکی دا پەیدا بکەت، ژ بەر کو ژن داهات و ئافراندنا نەتەوەیەکا ئازاد و پێشکەفتی و مروڤاتیێ یە.  
گوتنەک هەیە دەربارەی ژنان، کورد دبێژن: “ژن شمشیران د داننە بەر هەناسا خوە”.
هەروەکی د کەڤن دا و د سەدسالێن دەربازبوویی دا شێرە ژنێن کورد یێن وەکی؛ حەپسەخانی نەقیب، لەیلا قاسم، قەدەم خێری فەیلی و عادیلا خانم، پیشەنگیا ژنێن کورد کریە.

Back to top button