رۆژاڤایێ كوردستانێ بەر ب پێڤاژۆیەك نوو
بوویه‌ر و گوھەرتنێن ل ڕۆژاڤایێ کوردستانێ چێ دبن و دقەومن وێ پارچەیا كوردستانێ به‌ر ب پێڤاژۆیه‌ک نوو ڤه دبه. وه‌ک تێ زانین ئه‌ڤه ده‌مه‌که ب هه‌ولدان و ناڤبەینكاریا وه‌لاتێن هه‌ڤپه‌یمان و ب تایبه‌ت ئەمریكا و فرانسا ئالیێن سیاسی ژ بۆ لھەڤھاتن و ئیمزاكرنا رێكەفتنەكێ هه‌ڤدیتنان دکن.
هه‌ڤدیتن د ناڤبه‌را ئەنجومەنا نشتمانیا كورد ل سوریێ (ئەنەكەسە) و پارتیا یەكێتیا دەمۆكراتیك (پەیەدە) دا ب ئاماده‌بوونا ئەمریكا و ھێزێن سوریا دەمۆكراتیك (ھەسەدە) تێن ئەنجام دان. هه‌تا نها چه‌ند جڤین د ناڤبه‌را هه‌ردو ئالیان دا پێکهاتنه و به‌رپرسێن ئه‌نەکەسێ و پەیەدێ د ده‌ربارێ ناڤه‌رۆکا جڤینان دا په‌یامێن ئه‌رێنی ددن. لێ به‌حسا ھووریێن ناڤه‌رۆکا جڤینا ناکن.
ئەڤ جڤین ژ بۆ پرۆسەسا سیاسی ل رۆژاڤایێ كوردستانێ گەلەك گرنگن و ئەگەر ئەو ھەر دو ئالیێن سەرەكی ل ھەڤ بكن كو، ئەڤ یەك داخوازا خەلكێ وێ پارچەیا كوردستانێ یە،
ده‌ستكه‌فتیه‌ک مه‌زن ب خوە را دئینە. یا هه‌ری گرنگ ئه‌وه کو دێ ستاتویه‌ک یا ڕۆژاڤایێ کوردستانێ چێببە.
د ھەموو جڤینین ناڤدەولەتی دا یێن ل سەر پرسا سوریێ داخوازێن گەلێ كورد ل رۆژاڤایێ كوردستانێ ل بەرچاڤان ناھێن گرتن ژبە ركو رێخستنێن سیاسی نە ھەڤگرتیینە ھەر ئالیەك ب سەرێ خوە تەڤدەگەرە. ھەر چقاس ئەنەكەسە د ناڤ موخاله‌فه‌تا سوریێ دا هه‌ولدده ژبو كوردان هنده‌ک ده‌ستکه‌فتیان ب دەست بخە، لێ ئه‌و یه‌ک ژی نه گه‌له‌ک زه‌لاله. ژ به‌ر کو د پرسا کوردستانێ دا چ جوداهیێن مه‌زن د ناڤبه‌را رژێما سوریێ و موخاله‌فه‌تا سوریێ دا نینن.
ل سوریێ دو هێزێن کو باندۆر‌ێ ل سەر پاشه‌رۆژا ڤی وه‌لاتی دکن هه‌نه؛ ڕوسیا و ئەمریكا. ڕوسیا پشتگریا رژێما ئه‌سەد دکه. ڕوسیا دخوازه هێزێن کوردی ژی د پاشه‌رۆژێ دا ببن به‌شه‌ک ژ هێزێن حوکومه‌تا سوریێ. ڕوسیا ناخوازه هه‌رێمه‌ک کو د بن ده‌ستهلاتداریا کوردان دا بە چێببه.
ل هەمبه‌ر ڕوسیا ئەمریكا و هێزێن هه‌ڤپه‌یمان دخوازن هه‌رێمه‌ک کو ڕێڤه‌به‌ریا وێ د بن ده‌ستهلاتداریا هێزێن کوردستانێ دا بە هه‌به و جوره‌یه‌کێ فه‌ده‌رالیێ ل سوریێ پێكبھێت.
لێ ڕه‌وشا کوردا ئیرۆ ژ بۆ ڤێ یەكێ نەئامادەیە. ژ به‌ر کو یه‌کێتیه‌ک و ته‌ڤگه‌ره‌ک هه‌ڤبه‌ش د ناڤا کوردان دا نینە. یه‌کێتیه‌ک د ناڤبه‌را ئه‌نەکەسێ و پەیەدێ دا دبه ئەگەرەك بنگه‌هین كو هنده‌ک ده‌ستکه‌فتی ده‌ستڤه بھێن و پیلان و له‌یزتکێن هنده‌ک ئالیێن نه‌خێرخواز ژی د ده‌ربارێ ڕۆژاڤایێ کوردستانێ دا تێکبچن.
نها هیڤیه‌ک ژ بۆ یه‌کێتیه‌کێ ل ڕۆژاڤایێ کوردستانێ په‌یدابوویه. وه‌ک تێ زانین د بن چاڤدێریا سه‌رۆک بارزانی دا 3 جارا ئه‌نەکەسە و پەیەدە ل هه‌ڤکریه و په‌یمان ئیمزا کرنه. هه‌ولێر 1،هه‌ولێر 2 و په‌یمانا دهۆک. لێ یه‌ک ژ وان ژی ل سه‌ر عه‌ردی و نه‌که‌تیه ژیانێ. بێ گومان ئەگەرێن کو ئه‌ڤ په‌یمان سه‌رنه‌که‌تنه گه‌له‌کن. لێ ئه‌ڤ یه‌ک نه بابه‌تێ کو نها بێ گۆتوبووژ کرنێ یە.
ڤێ جارێ ب چاڤدێریا ئەمریكا و ده‌وله‌تێن هه‌ڤپه‌یمان ل سه‌ر عه‌ردێ دکاره هه‌ڤکاریا هه‌ردو ئالیان بێخه ژیانێ دا. گه‌له‌ک ئالیێن سیاسی به‌ندا ئه‌نجامه‌ک ئه‌رێنی نه. لێ تێ زانین کو هنده‌ک هێزێن نه ژ ڕۆژاڤایێ کوردستانێ ناخوازن باندۆرا خوه ل ڕۆژاڤا وندا بکن و ژ بۆ ڤێ یه‌کێ ژی گه‌له‌ک ب ئه‌رێنی ل ڤان هه‌ولدانا نانێرن.
لێ یه‌کێتیه‌ک د ناڤبه‌را ئالیێن سیاسی ل ڕۆژاڤایێ کوردستانێ ژ بۆ به‌رژه‌وه‌ندیا ڕۆژاڤایێ کوردستانێ و گه‌لێ کورد پێوسته.
گه‌لێ کورد ل سوریێ خوه‌دیێ بنگه‌هه‌ک سیاسەتا نشتمانپه‌روه‌ره. ژ بۆ ڤێ ئه‌گه‌ر هێزێن نه ژ ڕۆژاڤایێ کوردستانێ ڕۆلێن خراب نه‌له‌یزن و نه‌بن ئاسته‌نگا پێكھاتنێ، دێ ئه‌ڤ تفاق سه‌ربکه‌ڤه و ڕۆژاڤایێ کوردستانێ ببه خوه‌دی ستاتویه‌ک سیاسی.
