رۆژنامەیا كوردستان و هشياريا نەتەوەیى يا كوردى
بزاڤا رۆژنامەڤانيا كوردى كو ل سەر دەستێ ميرێ رۆژنامەڤانان (ميقداد مەدحەد بەدرخان) بدەرئێخستنا رۆژناما كوردستان ل دەرڤەیى وەلاتى سەرهەلدا و بوو دەستپێكەك ژ بۆ پاراستن و دانەناسين و هشياركرنا گەلێ مە ل هەر جهـ و قولاچكەكا ڤێ جيهانێ. پشتى رۆژنامەیا كوردستان ل دەستپێكێ گەلەك رۆژنامە و كوڤارێن كوردى ل ستەنبولێ و پاشان ل سلێمانيێ و هەولێر و دهۆكێ دەركەفتن و كەفتنە بەر دەستێ خاندەڤانان، لێ پتريا وان رۆژنامەو كوڤاران ژ ئاليێ پارتی و گروپ و رێكخراو و لايەنێن سياسى ڤە دهاتنە دەرئێخستن.
قوناغا وەرارا بزاڤا رۆژنامەگەريا كوردى قوناغەكا پرى ئالوزى بوو، ژبەركو ل سەر رێكا وێ گەلەك ئەفراز و نشێڤى هەبوون و يا پێدڤى بوو كو نڤیسكار و رۆژنامەڤانێن كورد خو ژ وان ئالوزيان دەرباس بكەن، لەورا گەلەك ژ وان كەفتنە ژێر قەيد و زنجيران.
ميقداد بەدرخان هەست ب ڤالاھيا زانين و زانستێ ل وەلاتێ خوە يێ دايكێ دكە و ل غەريبيا و ل وەلاتێ مسرێ ئێكەم رۆژنامە ب ناڤێ كوردستان بەلاڤ دكە، پشتى ڤێ بزاڤا ميرێ رۆژنامەڤانيێ گەلەك رۆژنامەڤانێن ديتر ييێن چالاك ژى هاتنە د مەيدانا كارى دا و وان ژى دەستپێكێ ل ستەنبولێ و پاشی ل باشوورێ كوردستانێ و تايەبتى باژێرێ سلێمانيێ دەست دانە ڤى كارى و ل سالا 1961ێ ژى ئێكەم كۆڤارا ب زاراڤایێ بادینی ب ناڤێ (روناهى) ل بەغدا دەردكەڤە.
مالباتا بەدرخانيان د ديماهيا سەد سالا نوزدێ دا ئەو شەمال هەلكر و ب رێكا رۆژناما كوردستان مەزنترين خزمەت گەهاندە مە د وارێ هشياريا نەتەوەيى و روناهى و فێربون و پێشكەفتن و وەلاتپارێزىێ دا ئاراستەى گەلێ مە كر.
رۆژنامەيا كوردستان د دەمەكێ وەسا دا ژدايك بۆ كو گەلێ كورد د رەوشەكا پرى دژواری و زەحمەتى و نەخوێندەوارى دا بوو و پشتى دەهان شكەستنێن راپەرين و سەرهەلدان و بزاڤێن ئێك ل دووڤ ئێك يێن گەلێ مە و ل ژێر فشارێن دوژمنا ب تايبەتی ئوسمانيان و فارسا و زولم و زورا سولتانى دا سەرهەلدا و ژدايك بوو و هەر ژبەر ڤان ئەگەرا ژ بۆ دەرێخستنا روژنامەیێ سێ وەلاتێن وەك (مسر، سويسرا و بەريتانيا) و چوار باژارێن وەك (قاهيرە، جنيێف، لەندەن و فولكستون) ناچار بوون بگەرينن و هەشت چاپخانا ب كاربينن و ئەڤە هەمى ژى ژبەر هندێ بوو كو رۆژنامەيا كوردى يە و زمانحالێ نەتەوەيەكا خودانێ ديروكا هزاران سالايە و ئەو نەتەوە پشتى شكەستنا د شورەش و سەرهەلدانان دا ڤێ جارێ دخوەستن ب زمانێ دانوستاندنێ جڤاكێ كوردەوارى ب داگيركەرێن كوردستانێ بدەتە ناسين و داخازا سەربخويى و مافێن كوردان بكە.
بێگومان دەركەفتنا رۆژنامەيا (كوردستان) ژ بۆ مللەتێ كورد و خزمەتا دۆزا وێ يا نەتەوەيى بوو، گەلەك ب رونى و ئاشكرايى ئەڤ بابەتە ديار دبە و ميقداد بەدرخان بەگ ب خەباتكەر و دلسوزەكێ مەزن و خەمخورەكێ ژێهاتى بو كورد و كوردستانێ دخەبتە، د بياڤێ روشەنبيرى دا رۆژنامەيا كوردستان گرنگيەكا باش ب ڤى بابەتى دايە و رۆلەكێ ئێكجار مەزن گێرايە بۆ شلقاندنا بارێ پاشكەفتى يێ وى دەمى ل كوردستانێ و بارێ نە روشەنبيرى و نەخويندەوارى يێ كوردى، پلا بەرزو بلندا روشەنبيرى ل جەم مالباتا بەدرخانيان ڤان ئەگەرا هەميا كاريگەريەكا مەزن كرە سەر بارێ روشەنبيرى ل كوردستانێ، هەر ژ ژمارا ئێكێ رۆلێ كاريگەر يێ زانستى و رەوشەنبيرى ل سەر بەرپەرێن وێ ئاشكرا و ديار و زال بوون.
گرنگيا رۆژنامەيا كوردستان د وێ ئێكێ دايە كو شيايە ل دەرڤەیى كوردستانێ دەستپێكا خەباتا روشەنبيرى بكە و ئەڤ خەباتە بو بەدرخانيان تەمامكرنا خەباتا سياسى و چەكدارى بوو، ژبەركو نيێزيكى سەدەيەكێ بوو وێ مالباتا وەلاتپارێز خەباتا سياسى و چەكدارى ل دژى ئوسمانيان كر بوو و كيانەكێ سياسى دامەزراند بوو و كار ژ بۆ دروستكرنا دەولەتەكا كوردى دكرن، لێ پشتى شكەستنا وێ خەباتێ وان بەردەوامى ب خەباتا رۆژنامەگەرى و روشەنبيرى دا بو دەمێ نيڤ چەرخەكێ ديتر، لەوما دەركەفتنا رۆژنامەیا كوردستان ل دەرڤەىی وەلات كارەكێ خەباتى بوو و دژى دەولەتا ئوسمانى و هەڤركيا سياسى بو دگەل دەسهەلاتێ.
سەردار هێتوتى
2020.04.22
