محیەدین زێوکی
شۆرەشا نەرم، ئانکو راپەرینا کەزی و بسکان. جارەکا دی رۆلێ ژنا کورد کەت پێش چاڤان، دونیا هژاند، گۆهێن کەڕ ڤەکرن و چاڤێن تاری روونکرن.
ژنا کورد هەردەم هەڤاڵ و پشتەڤانا مێرێ کورد بوویە. خەمخوەرا دۆزا کوردستانێ بوویە. مل ب ملێ زەلامی جهێ خوە د کوزک و چەپەران دا دیتی یە. ئەڤە ئێک ژ وان ئەگەرانە کو کورد ژ نەمانێ پاراستنە.
رۆژهەلات، وارێ سمکۆ، قازی، قاسملۆ و شەرەفکەندی …. . وارێ شۆرەش و راپەرینان.
مەهابادا خەمگین شاد بکەن و کۆمارا کوردستانێ ڤەژینن. خویشک برایێن خوە بەردا نەهێلن.
رۆژهەلاتا نازدار وارێ مەیە. کۆمارا ئیسلامی داگیرکەرا وەلاتێ مە یە.
چاڤێ رۆژهەلاتێ کوردستنانێ ل مەیە. کوردۆ ژ بیرنەکە مەزنترین و کاریگەرترین دوژمنێ رەفەراندۆما مە، رەفەرەندوما باشوورێ کوردستانێ، ئەڤ کۆمارا نەئیسلامی بوو. پاسدارێن وان ل کەرکووکێ، پردێ و سەحێلان دۆزا مە سەردبری. گەر نە ئەو بان، چو جاران عەرەبێن شیعە نەدوێران بەختێ خو ل هەمبەر مە تاقی بکەن.
د دیروکێ دا ئیرانێ هەردەم خەنجەر ل پشتا مە دایە. کۆمارا کوردستانێ هەرفاند. قازی ل سێدارێ دا. شۆرەشا ئیلوونا مەزن گوری بەرژەوەندیێن خوە کر. هەتا ئەڤ رژێمە بمینیت کورد ل چو پارچەیەکێ سەرفراز نابیت.
کوردان گەلەک شۆرەش بەرپا کرن، هەر ئێک ب پیلانەکی ژ ناڤ چوو.
ئەڤ راپەرینە یا کو ژنا کورد سەرکێشیا وێ دکەت، سەرانسەری رۆژهەلاتێ کوردستانێ و ئیران ڤەگرت. بۆ چاڤ و چرایێ تەڤ وەلاتی. ئێدی مەلا و ئاخوندێن قۆم و تەهرانێ ژ دەستێن ژن کورد دەرباز نابن. ئەو چ چەکی پەیدا بکەن، هاریکاریێ ژ کێ بخوازن، ئێدی رۆژا وان دەرباز بوو و داویا وان دهێت. ئێدی ئەو رۆژ نێزیکە وێ بێ، پاسدار ژی دێ سەری دانن بن پێ.
نها هێز، تێهن و کاریگەریا ژنا کورد ژ بۆمبێن ئەتۆما وان، ژ موشەک و سێدارە و تەرۆریزما وان بهێز ترە.
دڤێ ئەو بزانن وان چاوان شاهێ گۆربگۆر گوهری، نووکە ژی هەر ب وی رەنگی گەها وانە. ٤٠ سالێن، شەر، ترس، برس و درەو و خوینرشتنێ ب دویماهی هاتن، گەها هندێ یە، ئەو ژی وەکی سەدام ملێ خوە بێخنە د خلفا سێدارێ دا و دەستهەلاتێ بدەن دەستێ ژنا شۆرشگێر و وەفادارا کورد.
ئێدی بلا بەس بیت بندەستی. چاخێ ئازادیێ و سەرخوەبوونێ یە.
ژن، ژیان، ئازادی و سەربەخوەیی.
