ئەرێ ئەو رێکەفتنا حەشدا شەعبی و ئیرانێ دگەل پافل تالەبانی کری ب دروستی هاتە بجیئینان؟
ئەرێ بابەتێ وێ رێکەفتنێ ب تەنێ کەرکووک بوو؟
ئەرێ ئەگەر ئەو خیانەت نەبایا دا شەر روودەت وەکی روودایی؟
ئەرێ راستە وەکی وەستا رەسول دبێژت مە چەک و تەقەمەنی بۆ ئێک سەعەتا شەری نەبوو ؟
ب دیتنا من
١- ئەو رێکەفتن وەکی خۆ نەهاتە بجیکرن و یەکێتییا نشتمانیا کوردستانێ (یەنەکە) نەبەس نە بوو دەسهەلات ل کەرکووکێ بەلکو بوو کۆلەیا حەشدا شەعبی و پارێزگارێ کەرکووکێ هەر ما شوفینیترین عەرەب.
٢- بابەتێ رێکەفتنێ گەلەک ژ کەرکووکێ مەزنتر بوو. بابەت ژناڤبرنا رەوتێ سەربخۆبوونا کوردستانێ بوو کو، پارتییا دەمۆکراتا کوردستانێ (پەدەکە) سەرکێشیا ڤێ رەوتێ دکە. وان حساب کربوو کو، پەدەکە دێ ل سەنگەرێن یەنەکێ شەری کەت و ئەو دێ ل پشت زڤرن وێ هێزی ب تەمامی ژناڤببن و ب ساناهی دێ بەرەڤ هەولێرێ هێن و ل ئالیێ شنگالێ دێ ژ دەرگەهێ رەبیعە ل پشت هێزێن پێسمەرگەی زڤرن و وان ژی ب دەردێ یێن کەرکووکێ بەن و دێ پێشرەویێ بۆ زاخۆ و براهیم خەلیل بکەن و ئو هۆسا ئەڤە پەدەکە دێ ژناڤ چیت. ب زانایی و کاراماییا سەرۆک بارزانی ئەمر ب پێشمەرگە یێن بەرەیێ رۆژئاڤایێ کەرکووکێ هات دان کو، خوە ڤەکێشن بۆ پردێ و سەنگرا لێبدەن و ل رۆژئاڤایێ دیجلە ژی ل سحێلا و مەحمودییێ سەنگەرا قاییم بکەن. ژ هەژی گۆتنێ یە هێزا یەپەگێ یا رۆژئاڤایێ کوردستانێ رێک نەدا حەشدا شەعبی ل رەخێ وان دا بهێنە شەمالا شنگالێ
ئەو داستانێن مێژویی یێن پردێ و سحێلا و مەحمودییێ پشکا هەرە مەزن و ترسناکا ئیتفاقیا ١٦ ێ ئوکتۆبەرێ ژناڤبر ئەو ژی داگیرکرنا هەموو هەرێما کوردستانێ بوو.
٣- ئەمریکا گەلەک ب زەلالی هەر دو ئالی ئاگادار کربوون کو، هەر ئالیەکێ شەری بکەت دێ ئەو کەڤیتە دگەل ئالیێ دی لەوما چ رێک نەمابوون ل بەر بەغدا و تەهرانێ ئیلا بێ شەر بکەڤن ناڤا کەرکووکێ ئەو ژی بۆ وان هاتە جی ب رێکا بافل تالەبانی و هەڤسۆزێن وی د ناڤ یەنەکێ دا کو رێ دان بێ شەر بهێن ناڤ کەرکووکێ، هۆسا ئەمریکا ژی نەشیا چ بکەت چنکو تفاق هاتبوو کرن. واتە ئەگەر تفاق نەهاتبا کرن حەشدا شەعبی چ جارا نەدشیا هێرشێ بکەت و ئەگەر کربایە ژی دا خرابتر ب سەرێ وان هێت ژوێ یا ب سەرێ وان هاتی ل پردێ و سحێلا و مەحمودییێ.
٤- پێشمەرگە یێن کوردستانێ ب رۆژان شەرێن مەزن و مێژویی کرن ل هندەک سەنگەرێن بەدیل واتە نە بهێز و ئاسێ وەکی یێن بۆ شەرێ داعشێ قاییم کرین.
شەر بدوماهیک هات و پەدەکە ب سەرەکی بلند و بخوینا دەهان شەهیدان کوردستان پاراست و خەونا قاسم سلێمانی و هەڤبیرێن وی ژناڤبر، بەلێ دڤێت بزانین ئەڤێ خیانەتێ کورد بدەهێن سالان پاشڤە برن و ناڤمالا کوردان تێکدا، لاواز و زەعیف کر بەرامبەر شۆفینیێن عەرەب و یا ژوێ ژی کامباختر و خرابتر ئەوە هێشتا ئەو پیلانە یا بەردوامە و ئالیێن وێ بێهیڤی نەبوونە ژ بجیئینانا وێ یا بئێکجاری.
ئو یا هێشتا خرابتر ئەوە رەهوریشالێن ڤێ عەقلیەتا سیاسی یا تەرەفێ کوردی ژ وێ تفاقێ دزڤریتەڤە بۆ نێزیکی شێست سالێن بۆری ئو ئەزێ دوێ باوەریێ دا شێست سالێن دی ژی دێ هەر ل سەر ڤێ عەقلیەتێ بن چنکو ئارمانجا سەرەکی یا وان ژناڤبرنا پەدەکی یە و دێ پەدەکە ژی هەر دێ مینیت.
فەرەج میرزا
