پشتی پەکەکێ د کۆنگره‌یا خوه یا ۱۲مین دا بریارا هلوه‌شاندنا پەکەکێ و چەکدانینێ دا، ژ گه‌له‌ک ئالیان ڤە پێشوازیا ڤێ بریارا پەکەکێ هات کرن و ب ئه‌رێنی هات نرخاندن.
لێ ل ترکیێ و د ناڤا کوردان دا ژی هێژا د ده‌ربارێ پێڤاژۆیێ دا شرۆڤه‌یێن جودا و ئیدیعایێن بالکێش تێنه ڕۆژه‌ڤێ و گۆتوبێژ تێنه کرن.
پەرلامه‌نته‌رێ به‌رێ یێ ئاک پارتییێ، شامل تەییار، د بەرنامەیەکا تەلەڤزیۆنی دا پێڤاژۆ هەلسەنگاند و ئاگاهیێن پشت په‌ردێ یێن کو ژ چاڤکانیێن نێزیکی ئاک پارتییێ ب دەست کەتنە ئاشکەرا کرن.
تەییار ده‌ستنیشان کر کو ئه‌گه‌ر پێڤاژۆیا چاره‌سه‌ریێ ب سه‌رکه‌فتی ب داوی ببه، ئیحتیماله‌ک مه‌زن هه‌یه کو پارتییا ده‌م پشتی ئاک پارتی، مەهەپێ و پارتیا یه‌کیتییا مه‌زن ببه چاره‌مین پێکهاته‌یا ئیتیفاقا گه‌ل.
چەند خالێن سه‌ره‌کی ژ گۆتنێن تەییار ئه‌ڤێن ل ژێرن:
“گه‌له‌ک تشت ب ڕێژه‌یا سه‌رکه‌فتنا پێڤاژۆیێ ڤه گرێدایی نه. ئەگه‌ر سه‌رکه‌فتی به، باندۆرا وێ ل سه‌ر سیاسه‌تێ دێ جودا به. ئەگه‌ر تێک بچه، دێ جودا به.”
ئه‌گه‌ر ئه‌م ئالیێ ئه‌رێنی بدن بەرچاڤ، ئه‌گه‌ر ته‌رۆریزم ب داوی ببه و بریارا هلوه‌شاندنا پەکەکێ د هه‌موو ئالیان دا وه‌ره بجیهانین، ئه‌گه‌ر تشته‌ک وه‌کی یەپەگێ ژی نه‌مینه و ترکیه ب ته‌ڤاهی ژ ڤێ به‌لایا ته‌رۆرێ خلاس ببه، د ۲ سالێن بێ دا پارادیگمایێن سیاسی د هاویردۆره‌ک وسا ئارام دا ب ته‌ڤاهی سه‌رووبن دبن.
پێشی، پارتییا ده‌م تێ گوهه‌رتن، ئه‌و ئێدی نه ژ ئالیێ قه‌ندیلێ ڤه لێ ڕاسته‌راست ژ ئالیێ ئیمرالیێ ڤه تێ برێڤه‌برن. ئەڤدلا ئۆجەلان دێ ته‌ڤلی سیاسه‌تێ نه‌به، لێ ئه‌و دێ ببه که‌سێ کو پارتییا ده‌مێ ب ڕێ ڤه ببه. برێز ئۆجەلان کادرۆ و پۆلیتیکایێن وان دیار دکه.
ئه‌ز دفکرم کو ئه‌ڤ یه‌ک دێ ببه سه‌ده‌ما جودابوونێ ژ چه‌پگرێن ترکییێ. داخویانیێن هه‌ری توند ژ ناڤ پارتییا ده‌مێ ده‌ربارێ پێڤاژۆیا چاره‌سه‌ریێ دا ژ چه‌پگرێن ترکیێ هاتن. ئه‌و هه‌ر وها قه‌بوول دکن کو چه‌پگرێن ترک ئێدی نکارن ل دژی ده‌م پارتییێ ده‌رکه‌ڤن و گه‌ر ئه‌و ب ده‌م پاتییێ را ب هه‌ڤ را بمه‌شن دێ پرسگرێک ده‌رکه‌ڤن.
ئه‌و به‌حسا ئاڤاکرنا ئه‌نیه‌کا چه‌پگر یا نوو د بن سه‌رۆکاتییا پارتییا کارکه‌رێن ترکیه‌یێ دا دکن، و ئه‌ز ئیحتیماله‌که مه‌زن دبینم کو ئه‌ڤ یه‌ک بسەرکەڤە. ده‌م پارتی ژ چه‌پگرێن ترک ڤه‌دقه‌ته و دبه پارتییا خوه، ژ وان زنجیران ڕزگار دبه و ڕێ ل به‌ر وێ ڤەدبە و ب ته‌ڤاهی د ده‌ستێ ئیمرالیێ دا یه.
ئه‌گه‌ر ئه‌ڤ پێڤاژۆیا چاره‌سه‌ریێ ب سه‌ر بکه‌ڤه و پارتییا ده‌م ببه پێکهاته‌یه‌ک ژ تفاقا گه‌ل، بێ گومان د هندەک مژاران دا هه‌ڤکاری و شریکاتیا سیاسی دکاره هه‌به. ئه‌ڤ ئه‌و ڕه‌وشێن کو دبه کو د پاشه‌رۆژێ دا ده‌رکه‌ڤن هۆلێ نه.
ئه‌ڤ بوویه‌ر ب ته‌ڤاهی په‌رسپه‌کتیفا سیاسی یا جەهەپێ ژ بۆ پاشه‌رۆژێ دگوهه‌رینن. ژ به‌ر کو جەهەپێ ب تێکلیا خوه یا ب ده‌م پارتییێ را شاره‌داری ب ده‌ست خستبوون، و ده‌م د خه‌یالێن وی یێن ده‌ربارێ هلبژارتنێن سه‌رۆککۆماریێ دا یه‌ک ژ هێزێن سه‌ره‌که یێن پشتگریێ بوو. نها کو پارتییا ده‌م هه‌لوه‌ستا خوه گوهه‌رتییه، جەهەپە هه‌وجه‌یێ شریکێن نوو یه. ژ به‌ر کو بێیی ده‌م، ئیحتیمالا ده‌رباسبوونا ژ سه‌دی ٥۰ هه‌ما هه‌ما نینە و ئه‌ڤ ڕه‌وش دبه کو جەهەپە نه‌چار بکه کو ل ده‌رڤه‌یی ده‌م پاتییێ ل ئالته‌رناتیفێن نوو بگه‌ره.
