نڤیسار

رەوش مەترسیدارە – گازیەك بۆ ڕایەدارێن حوكمەتێ

نڤیسین: محەمەد چەلكی

سەرنەگرتنا بریارا حوكمەتێ بۆ قەدەغەیا هاتنوچوونێ، هەر چەندە نیازا حوكمەتێ یا پاقژو و د بەرژەوەندیا خەلكێ هەرێما كوردستانێ دایە، لێ وەڵاتیان ب چڤە نەگرت
ل دژی هاتنە سەر جادان و حوكمەت نەچار كر كو ژ بریارا خوە پاشگەز ببە. سەرەدەریا حوكمەتێ بۆ پەژیكا كۆرۆنایێ ژ لایێ كێمكرنا زیانێن وێ ڤە گەلەك دجهێ خوە دا بوون و بۆ قۆناغا دووێ ژی هەر دڕاست و دفەرن.
پرسیار ئەوە؛ بۆچی ڤێ جاری وەڵاتی ل دژی بریارا حوكمەتێ دەركەفتن؟ پێدڤی ل سەر راوەستان و هزركرنێیە و نابە هەما هۆسا دەرباز ببە. ل ڤێرە پرس وەڵاتیە و نەرازیبوونا وییە بەرامبەری بریارێن حوكمەتێ.

ژ بۆ هەر كەسی دیارە كو حوكمەتا هەرێما كوردستانێ د قەیرانەك ئابووری دا گوزەر دكە و هەمی بزاڤێن وێ نەشیانە كێنجا وێ قەیرانێ ل سەر ژیارا وەڵاتیان كێم بكە، بەلكو هەمی سۆز و نەخشێن هاتینە كێشان نەكەفتنە د بیاڤێ كار پێ كرنێ دا و تەڤ ماینە ئەزمان و پەحنكا دەڤی. ژ لایێ دیڤە ژی كەرتێ خزمەتگوزاری و دابینكرنا هەلێن كاری و دامەزراندنێ رۆژ بۆ رۆژێ كمباختر لێهاتنە، سەرباری بەزاندنا سنوورێن هەرێما كوردستانێ ژ لایێ دەولەتێن داگیركەرێن كوردستانێ ب تایبەت توركیا- ئیرانێ ڤە ، هەستا بێ بوهابوونا وەڵاتی ل جەم حوكمەتێ بهێز كەفتیە و جوداهیەك مەزن كەفتیە نابەینا وەڵاتی و حوكەمتێ.
نەرازیبوونا وەڵاتیان ژ ئەدائێ برێڤەبرنا حوكمەتێ د هەر بیاڤەكی دا، ژ بلی بەرسینگگرتنا پەژیكا كۆرۆنایێ، پرانیا وەڵاتیان ژ حوكەمتێ دتۆڕەنە چونكو حوكمەت، ب دیتنا وەڵاتیان، ئاگەھ ژ ئاریشێن وان نەمانە و پشت گوهڤە هاڤێتنە.

ئەڤجا ئاریشە نەباوەریە كو كۆرۆنا هەیە ئان نینە، ئاریشە دەستهەڵاتا كوردی نەشیایە چ باوەریێ بۆ وەڵاتیان دروست بكە و دەرزەكا مەزن یا بێ باوەریێ د نابەینا دەستهەڵات و وەڵاەتیان دا پەیدا بوویە و نە وەڵاتیان باوەری ب دەستهەڵاتێ هەیە و نە دەستهڵاتێ باوەری ب وەڵاتیان مایە. د كەشێن هۆسا دا مەترسیا هلوەشیانێ پەیدا دبە، ئانكو وەڵاتی و دەستهەڵات مینا دوژمنا ل هەڤ مێزە دكەن و دكەڤنە د ڕكابەریێ دا وەكو هانا ئارنێت دبێژیە: “هەردوو جوین ل ئەلتەرناتیڤان دگەرهن دەستهەڵات تۆندوتیژیێ دێ بكار ئینە دا خوە بپارێزە و وەڵاتی ژی بارا پتر دبنە بەرهەلەستاكارێن روخاندنا دەستهەڵاتێ” .

دویر ژ سۆزداری و خوەشرینكرنێ ل بەر دەستهەڵاتێ، رەوشا پەیوەندیێن وەڵاتیان و دەستهەڵاتێ گەهەشتیە ڤێ قۆناغێ و ب مخابنیڤە ئەڤە یا كەتیە د وارێ خوەرێكخستنێ دا، وەك نموونە خوەنیشاندانێن مامۆستا و فەرمەنبەران و یێن دوهی بۆ ڕاكرنا قەدەغەیا هاتنوچوونێ. ب دەربرینەك دن بێ باوەری و نەبوونا چ ئاسۆیێن چارەسەریێ ژ لایێ دەستهەلاتا كوردی ڤە ئاشێ هەڤڕیكیێ بەرەف لێكترازان و رووبرووبوونێ دچە.

ئەگەر پێنگاڤێن چارەسەریێ نەهێنە هاڤێیتن بۆ نموونە؛ پەیداكرنا هەلێن كاری، پرۆژێن خزمەتگوزاری، باشترلێكرنا كەرتێ تەندروستیێ و رۆهنیا هاتنوچوونا داهاتی، د دەمەك نێزیك دا وەڵاتی و دەستهەڵات دێ بەربنە سەر و چاڤێن هەڤ و ئەڤە مەترسیەك مەزنە بۆ حوكمەتا هەرێما كوردستانێ.

هیڤی خازم رایەدارێن مە دوور ژ چووڤكێشانا سیاسی ل چارەسەریێ بگەرهن چونكو رەوش گەلەك یا د كەلێژانا هەڤڕكیێ دا دژیت.

2020.06.03

دهۆك

Back to top button