سه‌رۆکێ ئه‌نجوومه‌نا نشتمانیا کورد ل سووریێ (ئه‌نەکەسە)، سلێمان ئۆسۆ د هه‌ڤپه‌یڤینه‌کێ دا دگه‌ل باسنیوس زانیاریێن گرنگ ل سه‌ر ڕه‌وشا نها یا ڕۆژاڤایێ کوردستانێ و گۆتووبێژێن ل گه‌ل هێزێن سووریا ده‌مۆکراتیک (هەسەدە) و ئیداره‌یا ڕۆژاڤایێ کوردستانێ ئاشکه‌را دکە.
سلێمان ئۆسۆ دیار کر: ئه‌نەکەسە ژ بۆ یه‌کگرتن و یه‌کێتی و پێکڤه‌ژیانا گه‌لێ کوردستانێ ل ڕۆژاڤایێ کوردستانێ پشتی سالا ۲۰۱۱ێ و ده‌ستپێکا شۆره‌شا سووریێ دا هات ئاڤاکرن. ئه‌م وه‌ک ئه‌نجوومه‌ن تێکه‌لی وێ شۆره‌شێ بوون و هه‌لوێستێ مه ده‌ربارێ چاره‌نڤیسا پاشه‌رۆژا سووریێ دا دیار بوویه. مه ڕه‌د کریه کو ئه‌م ده‌ست بخن ناڤ ده‌ستێ ڕژێما سووریێ، ژ به‌ر کو دیکتاتۆره‌ک نکاره جو تشته‌کی بۆ گه‌لێ خوه بکه و ب بۆ تایبه‌ت ژی بۆ گه‌لێ کوردستانێ. ژ بۆ وێ ژی ده‌ما مه‌ترسی ل سه‌ر ناڤچه‌یێن کورد چێبوو، ڕژێما سووریێ ته‌مامێ وان ناڤچه‌یان ڕاده‌ستی پەیەدێ کر، ژ به‌ر وێ ژی مه وه‌ک ئه‌نجوومه‌نێ کار کر، ژ بۆ یه‌کرێزیێ، ئه‌م نه‌راوه‌ستان ژ بۆ یه‌کگرتنێ. مه په‌یوه‌ندی ل گه‌ل پەیەدێ کر کو بێن به‌شداری ڤێ ئه‌نجوومه‌نێ ببن و بچن بۆ ئوردنێ بۆ گۆتووبێژان. پشترا مه داخوازا یه‌کگرتنێ ژ وان کر و ۳ ڕێکه‌فتن ب سه‌رپه‌ره‌شتیا سه‌رۆک بارزانی ل هه‌ولێر و دوهۆکێ هاتن کرن. مخابن هه‌موو ڕێکه‌فتنان دا پەکەکێ فشار ل سه‌ر پەیەدێ پێکانی و پابه‌ندی ڕێکه‌فتنان نه‌بوون.
هه‌رواها ڕاگه‌هاند: پشترا بنکه‌یێن مه شه‌وتاندن و مافێن کوردان بنپێ کرن، گرتن، لێدانا ئه‌ندامێن مه و ڕێگریا ل کار و چالاکیێن مه کرن. مه سێ مه‌هان به‌ری نها ژ بۆ ئازادکرنا ئه‌ندامێن خوە خوه‌پێشاندان کرن، لێ خه‌لکێ ڕۆژاڤایێ کوردستانێ باش دزانن، چ ل مه کرن و چاوا ب ئاگر و ئا‌سن ل دژ مه ڕاوه‌ستان. ئه‌زموونێن مه ل گه‌ل وان ڕێکه‌فتنان هه‌یه. سالا ۲۰۲۰ێ ب سه‌رپه‌ره‌شتیا ئەمریکایێ مه ڕێکه‌فتن کر، پشتی ڕێکه‌فتنێ بنکه‌یێن مه ژ ئالیێ پەکەکێ ڤه هاتن شه‌وتاندن.
سه‌رۆکێ ئه‌نەکەسێ د بەردەوامیا هەڤپەیڤینا خوە دا دبژە: ژ بۆ ده‌ستپێشخه‌ریا ئاشتی و گۆتووبێژان دڤێ زه‌مینه‌سازی هه‌به، ڕۆژانه گروپا جوانێن شۆره‌شگه‌ر ئا سه‌ر ب پەکەکێ ڤە بنکه‌یێن مه دشه‌وتینن. هه‌ر خوه‌پێشاندانه‌کا مه ببە، ئەو به‌ردبنه جانێ مه و ب که‌ڤران سه‌رێ ئه‌ندامێن مه دشکینن. مه گه‌له‌ک کار کریه ژ بۆ یه‌کرێزیا گه‌لێ کوردستانێ، داکو ئه‌م نه‌بن سه‌ده‌مێ تێکدانێ. ئیرۆ سوورییێ د قۆناخه‌کا نوو دا یه، رژێم هلوه‌شیا یه، لێ نها مه‌ترسیا مه‌زن ل سه‌ر گه‌لێ مه هه‌یه.
ئه‌نەکەسە ل سه‌ر دو ئاستان کار دکه، یەکەم چاوا ئه‌م گه‌لێ خوه بپارێزن؟ ئیرۆ مه‌ترسیه‌ک مه‌زن ل سه‌ر گه‌لێ مه هەیه و ب تایبه‌ت ژی ل کۆبانێ. بهانه‌یا وان هه‌بوونا پەکەکێ یه. کارێ مه یێ سه‌ره‌کی ئه‌م وێ مه‌ترسیێ ژ هۆلێ ڕاکن و بهانه‌یێن وان گروبان ژ ده‌ست وان ده‌ربخن.
یا دویه‌م ژی ژ بۆ یه‌کرێزی و یه‌کده‌نگیێ ئه‌م ئاماده نه. لێ ئه‌و ژی ب دو ڕۆژان پێکنایێ، نها یا گرنگ خالا یه‌که‌م دڤێ ئه‌م جیبجی بکن ئانگۆ بهانه‌یا هه‌بوونا پەکەکێ دڤێ نه‌مینه. پشترا دڤێ ئه‌م وێ مه‌ترسیا ل سه‌ر گه‌لێ خوه دوور بخن. ئه‌م وه‌ک ئه‌نەکەسە نوونه‌رتیا گه‌لێ کورد دکە و ناکه‌ڤە بن چو فشار و ترساندنه‌کێ.
