ھەمەرەنگ

سالا نوو سالا سەركەفتنا كوردان بە

سالا 2018 ێ خلاس دبه‌ و سالا 2019ێ ده‌ست پێ دکه‌. ده‌ما ساله‌ک داوی تێ به‌حسا بوویه‌رێن گرینگ یێ سالا ده‌رباسبوویی تێ کرن. ژ بۆ سالا نوو ژی داخواز و هێڤی تێنه‌ ڕۆژه‌ڤێ و مرۆڤ هێڤیا ساله‌ک نوو، سه‌رکه‌فتی و خوه‌ش دکه‌. بێ گومان هه‌ر که‌سه‌ک، مله‌ته‌ک هه‌تا وه‌لاته‌ک به‌حسا ڕه‌وشا خوه‌ دکه‌. کوردا سالا 2018 ێ ل هه‌ر به‌شه‌ک یێ وه‌لات، جودا ده‌رباس کر.

ل باکورێ کوردستانێ سالا 2018 ێ گه‌له‌ک تشت نەھاتنە گوھەرتن و هه‌ر وه‌ک خوه‌ به‌رده‌وام دكە. ده‌ما مرۆڤ ژ ئالیێ سیاسی ڤە لێ بنێره‌ ل باکور هه‌ستێن نه‌ته‌وی گه‌له‌ک ئالۆزن و مرۆڤ نکاره‌ به‌حسا ده‌ستکه‌فتیه‌ک نه‌ته‌وی ژ بۆ کوردا بکه‌. ڕه‌وشا سیاسی و جڤاکی نه‌ باشه‌ .

ل ڕۆژاڤایێ کوردستانێ چ پێشکه‌تن ل گۆرا سالا بوری نه‌بوونه‌ و هه‌ر ڕه‌وشا هه‌ی وه‌ک به‌رێ و هه‌تا ژ به‌رێ خرابتر ڤه‌دگه‌ره‌. بێگومان بوویه‌رێن گرینگ پێکهاتنه‌، لێ ژ بۆ کوردا و ده‌ستکه‌فتیێن نه‌ته‌وی مرۆڤ نکاره‌ به‌حسا یه‌ک بوویه‌ره‌کی بکه‌.

ڕۆژهلاتێ کوردستانێ ڕه‌وش هه‌ر وه‌ک خوه‌یه‌، ئه‌گه‌ر خرابتر نه‌ببه‌، باشتر نه‌بوویه‌.

جاردن به‌رێ هێڤیا کوردا ل باشوورێ کوردستانێ یه‌. ل باشوور پشتی سالا 2017 ێ ، پێکانینا ڕه‌فه‌راندوما سه‌رخوه‌بوونا کوردستانێ و بوویه‌رێن پشتی ڕه‌فه‌راندومێ و خیانه‌تا 16 ێ ئۆکتۆبه‌رێ، سالا 2018 ێ باش ده‌رباس بوو. ژ به‌ری هه‌ر تشته‌کی کوردا وه‌ک حوکومه‌تا کوردستانێ ب سه‌رۆکاتیا نێچیرڤان بارزانی ب مانه‌ورێن چالاک ئێن دپلۆماسی و سه‌رکه‌فتی کاری دۆرپێچا ل سه‌ر کوردستانێ هه‌یی بشکینە و کورد به‌ر ب ڕۆناهیه‌کێ ڤه‌ هه‌رن. ل عیراق و کوردستانێ دو هلبژارتن پێکهاتن و ژ بۆ کوردا بوو وه‌ک پیڤانه‌ک سه‌رکه‌فتنه‌کێ.

نها چاڤێن هه‌موویان ل سالا نوو، سالا 2019 ێ یە، داخواز و هێڤی ئه‌وو کو کورد سه‌ربکه‌ڤن و د سالا 2019 ێ ببه‌ سالا سه‌رکه‌فتنا کوردا و کوردستان ببه‌ خوه‌دی ستاتویه‌کی سه‌ربخوه‌.

سالا نوو ل گەلێ كوردستانێ و خاندەڤانێن بەرگەھێ پیرۆز بە

Back to top button