![](/wp-content/uploads/2024/06/kobane.jpg)
سالح موسلم دخوازە داستانێن پێشمهرگهیان ل كۆبانێ تۆمار کرین ب چو ئاوایی نەهێن بەحس کرن و ژ بیرا خەلکی ببە
مهمهت میردینی
پهکهکه ب تهڤ رێخستن و پارتیێن سهر ب خوه ڤه ب ئاوایهکی بێ ئهخلاقی کو گهر کهسهک بخوازه د ناڤا رهفێن وان دا ببه بهرپرسیار، فهرماندار یان ژی کهسهکی دیار، چو بخوازه چو نهخوازه دڤێت تهڤ ئالیێن ئهخلاقی یێن خوه ژ بیر بکه و ژ ئهخلاق دوور بکهڤه و دهرهوان ب بهردهوامی بکه. ژ بۆی ئیسباتا ڤێ یهکێ ژی ههر کهس دکاره ل چاپهمهنیا پهکهکێ بنێره، ههر کو تو پێتر ل چاپهمهنیا پهکهکێ بنێری وێ پێتر هین ببی پهکهکه پارتیهکا دژهکورده و دارێ د دهستێ دهولهتێن کۆلۆنیالیست دا یه. ژ بۆی خاپاندنا کوردان و وهنداکرنا دهستکهفتیێن وان، رۆژ ناچه پهکهکه د چاپهمهنیا خوه دا دهرهو و بێئهخلاقیان نهکه، ئهڤ دهرهو و بێئهخلاقی چو ب ناڤێن نهدیار بێن کرن و نڤیساندن، چو ژی ب رێیا بهرپرسێن وێ یێن وهکه کالکان، قارایلان، بایک و هتد… یان ژی کهسهکی نهسالح یێ وهکه سالح مولسم بێن کرن و نڤیساندن. چو فهرقا خوه نینە.
ههڤسهرۆکێ پارتیا یهکیتیا دهمۆکراتیک (پهیهدێ) سالح موسلم د سالڤهگهرا ئێرشا داگیرکهریێ یا ۲٥ حزیرانێ دا کو ل سهر کۆبانێ هاته کرن ژ ئاژانسا ئانفێ یا پهکهکێ را ئاخڤی، ئهو د ههڤدیتنهکا ڤیدیۆیی دا دهرکهت و ۲٥ دهقیقهیان بێ راوەستان ئاخڤی، وی بەحسا کهڤر و دار و چووچکێن کۆبانیێ و رۆلا وان د رزگارکرنا کۆبانیێ دا کر، لێ بێی کو شهرم و فهدی بکه، بێی کو ئهخلاقێ کوردان ل بهر چاڤ بگره پر ب رووقایمی رۆلا پێشمهرگه یێن کوردستانێ د رزگارکرنا کۆبانیێ دا ب چو ئاوایی بەحس نهکر، ئهڤ نه جارا یهکهمه بهرپرسێن پهکهکێ دخوازن رۆلا پێشمهرگه یێن کوردستانێ د رزگارکرنا کۆبانیێ دا بڤهشێرن و خوه وهکه شێرێن مهیدانێ نیشان بدن، پێش نها ژی چهندین جاران ئهڤ یهک کریه، ژ بهر کو پهکهکێ تهڤ بهرپرس و کادرۆیێن خوه ئاگاهدار کرنه کو ب چو ئاوایی نابه ب باشی بەحسا پێشمهرگه یێن کوردستانێ بکن، بهرهڤاژی ڤێ یهکێ وێ ب توندی وهرن سزادان.
ژ خوه بێی کو پێویستیا کوردان ب گۆتنێن بهرپرسێن پهکهکێ ههبه، ههرکهسهک باش دزانه کو د ئازادکرنا کۆبانێ دا رۆلا پێشمهرگه یێن کوردستانێ رۆلهکا سهرهکه و ههری گرینگ بوو، ب ئاوایهکی کو مرۆڤ دکاره ببێژه گهر پێشمهرگه یێن کوردستانێ دهرباسی کۆبانیێ نهبووبان ب چو ئاوایان کۆبانیێ ژ دهستێ داعشێ رزگار نهدبوو. ههروهها ڤێ یهکێ هێڤیا ژ بۆ دهستپێکرنهکا نووژهن و ههڤکاریا ناڤبهرا رێخستنان دا ژی خۆرت کر. لێ سالحێ نهسالح و یێن وهکه وی ڤێ یهکێ ژ خوه و پارتییا خوه را خهتهری دبینن، لۆما ب ڤی ئاوایی ل دژی پێشمهرگهیان دسهکنن و رۆژانه د چاپهمهنیا خوه دا ئێریشی سهر پێشمهرگه دکن.
سالحێ نه سالح باسی “براتیا گهلان” کو د ئهساس دا مرۆڤ دکاره وهکه “خولامتیا کوردان ژ ترک، عهرهب و عهجهمان را” ب ناڤ بکه، دکه، باسی دهمۆکراتیزهکرنا دهولهتێن داگیرکهر ژی دکه، لێ بهلێ ژ بۆی کو براتیا د نێڤبهرا کوردان دا چێنهبه و یا ههیی ژی وهره هلوهشاندن بەحسا رۆلا پێشمهرگهیان د رزگارکرنا کۆبانیێ دا ناکه.
![](/wp-content/uploads/2024/06/salih-muslim.jpg)
هایدی ئهم ل دیرۆکێ ڤهگهرن و ل بیرا خوه و سالح موسلم و تهڤ بهرپرسێن پهکهکێ یێن “نه سالح” بینن کا کۆبانیێ چهوا رزگار بوو و رۆلا پێشمهرگهیان د رزگارکرنا کۆبانیێ دا چ بوو؟ د ۲۲ جۆتمهها ۲۰۱٤ دا ل سهر فهرمانا سهرۆک بارزانی ب پرۆژهبریارا ههژمار ۲۸ بریار هات دایین کو پێشمهرگه ژ بۆی رزگارکرنا کۆبانیێ دهرباسی باکورێ کوردستانێ و پشترا کۆبانیێ ببن، د ۲۸ جۆتمهها ههمان سال دا یهکهمین هێزا پێشمرگه کو ژ ۱٥۰ پێشمهرگهیان پێک دهات ب چهکێن خوه یێن گران ڤه د ناڤا سینۆرێ دهولهتا داگیرکهرا ترکیێ دهرباسی رۆژاڤایێ کوردستانێ بوون، ئهڤ یهکهم جار بوو کو هێزهکا کوردان ب ئاوایهکی فهرمی ل سهر ئاخا یهک ژ مهزنترین دوژمنێن کوردان را دهرباسی پارچهیهکا دن ببه ژ بۆی ئالیکاریکرنا برایێن خوه، دهما پێشمرگه دهرباسی کۆبانیێ بووین ب تهنێ ۲۰% یا کۆبانیێ د دهستێ شهرڤانان دا مابوو، داعشێ ۸۰% یا ڤی باژارێ کوردان داگیر کربوو.
چوونا پێشمهرگهیان ژ ئالییهکێ ڤه بوو سهدهما بلندبوونا مۆرالا شهرڤانان و ژ ئالیهکێ دن ڤه ب گەهشتنا پێشمهرگهیان و چهکێن وان یێن گران ههر تشت هات گوههرین، شهرڤان ژ رهوشا بهرگریێ کهتن رهوشا ئێرش برنێ، پێشمهرگهیان وهک هێزهکه پشتهڤانی دهست ب تۆپبارانکرنا ناڤهندێن تهرۆریستان کرن و د دهمهک ههری کێم دا کارین چهتهیێن داعشێ پاشدا ببن و باژارێ کۆبانێ ژ کهتنێ بپارێزن.
پێشمهرگه یێن ئازادیا کوردستانێ د دهما ۲٥ رۆژان دا کارین ٦٥% ژ خاکا باژارێ کۆبانێ ژ دهست داعشێ رزگار بکن، د دهما ٤٥ رۆژان دا ژی پێتر ژ ۸٥% ژ وێ رووبهرا د دهست تهرۆریستان دا رزگار کرن، ل داویێ ب بهرخوهدانهکا بێ ههمپا کو ۷ مههان دۆم کر پێشمهگهیان مۆهرا رزگاریێ ل باژار خست و ڤهگهرین کوردستانا ئازاد.
یا مه د دهربارا پێشمهرگه یێن کوردستانێ و رزگارکرنا کۆبانیێ ژ دهست داعشێ باس کری ب تهنێ دلۆپهکه ژ وێ بهحرا جانفیدایی و خهباتا ڤان لههانگان ژ بۆی رزگارکرنا ڤی باژارێ رۆژاڤایێ کوردستانێ کو نها بهرپرسێن پهکهکێ ب “باکورێ رۆژههلاتێ سووریێ” ب ناڤ دکن، ئهنجام دایی.
ل داویێ ژ “سالح”یێ نهسالح را دبێژین، گۆتنهکه کوردی ههیه کو دبێژه، “ب بێژینگێ رێ ل تیشکێن رۆژێ نایێ گرتن”، لۆما تو و پارتیا خوه ژی نکارن ب باسنهکرنا رۆلا پێشمهرگه یێن کوردستانێ د رزگارکرنا کۆبانیێ دا ڤێ راستی بنوخمینن و د مهژیکێ کوردان دا بدن ژبیرکرن.
دارکامازی