سەبریا هەكاری: “ئەز دایكەكا كوردم، دلسۆزا گەل و وەلاتێ خوە مە و مریدا رێبازا میرێ خوە مە”
خانما سەبریا هەكاری كچا (اسعد رزگین اسماعیل)ی یە كو خەلكێ گوندێ هەلەیسێ یێ سەر ب باژێرێ گەڤەرێ یێ هەرێما جولەمێرگێ ل ھەكاری ل باكورێ كوردستانێ یە. بابێ وێ د دەستپێكا چەرخێ بیستێ دا مشەختێ باشوورێ كوردستانێ دبە و دگەل مالبات و ررەڤەندا خوە ل دهۆكێ ئاكنجی دبە.
سەبریا ھەكاری ناسناڤێ ئەدەبی یێ هەلبەستڤان (سەبریا ئەسعەد رزگین)ە یا كو 1/7/1948 چاڤێن خوە ل دهۆكا دلا ڤەكرینە و د هەمبێزا كێلیا شەدا, شكەفتا چارستین, گژەبەرا و دێرا بەڕانی دا پەروەردە بوویە.
پشتی كو شەش سالێن خاندنا بنەرەتی ب دووماهی دئینە, ژ ئەگەرێ كارتێكرنا جڤاكێ و هزر و بیرێن بەرتەنگ و خێلەكی ل وێ سەردەمێ, هەر زوو و دژیێ 13 سالی دا خێزانێ پێكتیەن و دبە دایكا پێنج كچ و چار كوران. ئەڤ خانمە هەڤژینا شەهیدێ مێرخاس و ناڤدار (شەعبان محمد ئەحمد دێریشكێ)یە كو ل رێكەفتی 21/22-9/1977 ل گەل سێ قارەمانێن دی ل زیندانا مووسلێ هاتن سێدارەدان.
سەبریا د ژیێ 29 سالیێ دا دبە تئێكانە سەمیانا نەھ زارۆكان و ب دلۆڤانی, سەرفەرازی, مەردی و خوەراگری زارۆكێن خوە پێگەهاندن و ل سەر رەوشتێن بەرز یێن ئاینی و كوردەواری و پرەنسیپێن مرۆڤایەتیێ و شۆپا بارزانێێ نەمر پەروەردە كرن.
كارێن پارتایەتیێ, رێكخراوەیێ, حكومی و ئەدەبی
- د نەورۆزا 1961-ێ دا ل دەربەندیخانێ دبە ئەنداما رێكخستنێن پارتیا دەمۆكراتا كوردستانێ.
- 1984 دبە ئەنداما ئێكەتیا نڤیسكارێن كورد ل دهۆكێ.
- · 1978-1990 فەرمانبەرا رێڤەبەریا باژێرڤانیا دهۆكێ.
- · 1991 ل گەل كۆچا ملیۆنی ب خێزانڤە كۆچبەری باكورێ كوردستانێ دبە.
- ل 1993-1995 دبە بەرپرسا لقێ یەكێ/دهۆكێ یێ ئێكەتێا ئافرەتێن كوردستانێ.
- د مەها 11/1995 ل سەر داخوازا رێكخراوەكا ئەلمانیایی بەرەڤ ئەلمانیایێ ڤە دچە و پاشى دچە سوێدێ و ل وێرێ ئاكنجی دبە.
- · 1998 دبە ئەنداما كۆمەلەیا نڤێسكارێن كورد ل سوێدێ.
- · 1999 دبە ئەنداما رێكخراوا پارتیا دەموكراتا كوردستانێ یا باژێرێ یۆتۆبۆری ل سوێدێ.
- · 1996-2005 كارگێرا كۆمەلەیا كولتووری یا كوردستانێ ل باژێرێ یونشۆپینگێ ل سوێدێ, د هەمان دەمێ دا سێ سالان دبە بەرپرسا كۆمەلەیێ و كۆمیتەیا ژنان.
- · 2002-2004 دبە ئەنداما كۆمیتەیا گشتی یا فەدەراسیۆنا كۆمەلەیێن كوردستانێ ل سوێدێ.
- · 2005-2006 دبە كارگێرا ئێكەتێا ژنێن كوردستانێ ل سوێدێ.
- · 17/02/2006 ب ئێكجاری ڤەدگەرە ناڤ هەمبێزا وەلاتێ خوە دا.
- · 2006 دبە كارگێرا لقێ 1-ێ یێ پارتیا دەموكراتا كوردستانێ.
- نوونەرا كۆنگرەیێن 11-ێ د سالا 1993-ێ دا و 13-ێ د سالا 2010-ێ دا یێن پارتیا دەموكراتا كوردستانێ بوو. د كۆنگرا داوىێ دا ژ ئالیێ رێزدار جەنابێ سەرۆك بارزانى ڤە ب مەدالیا بارزانیێ نەمر دھێتە خەلات كرن.
- بەشداری د 35-40 كۆنگرە و كۆنفرانسێن جودا دا ل ناڤخوە و دەرڤەیێ كوردستانێ كریە.
- ل 24/10/2019-ێ دا مالئاڤایی ل ژیانێ كر و گەهشتە ناڤ رێزا ناڤێن نەمر دا.
بەرهەمێن چاپكرێ
- پارزینێ هێڤیێا 1989
- ئارمانج 2006
- رۆناهی 2019
- بەرهەمەكێ دێ ب ناڤێ ” ئەگەر تە زانی چییە, خەلاتەك دیارییە” د رێ دایە
