نڤێسکار، رەوشەنبیر و روژنامەڤانێ دهوکێ یێ دێرین (ئیسماعیل طاهر جانگیر) ل سەر کار وچالاکیێن خوە یێن روژانە یێ بەردەوام بوو وەک هەر روژەکا دی، وێ روژێ (دووشەمبێ ١٢/ ٧/ ٢٠٢١) پشتی دەوامێ د گەل هەڤالێن خوە دەرکەفت بوو وبو شیڤێ مێهڤان بوو ل (گوندێ دوولبێ) وپشتی ڤەگەریایە مالێ… ل دورێن دەمژمێر (١١:٣٠)ی شەڤێ ژ نیشکەکێ ڤە راستی (جەلتا دلی) بوو وکەفت و هاژ خوە نەما و کەسوکار و هەڤال لێ کومبوون و گەهاندە (نەخوشخانا تەنگاڤیان ل دهوکێ) لێ سەد مخابن قەدەرا (سەیدایێ ئیسماعیل) تەمام بوو و روژا وی هات و وەغەرا دویماهیکێ کر د ژیێ (٥٢) سالیێ دا دگەل ئەلندا روژا سێشەمبێ (١٣ /٧ /٢٠٢١) ل دەمژمێر (١٥ :١٢) دووازدە ونیڤ. تەرمێ وی یێ پیروز ل مزگەفتا جودی هاتە شویشتن، کفنکرن ونڤێژلسەرکرن و ل گورستانا شاخکێ ب ئامادەبوونا مالباتێ و کەسوکار و دوست وهەڤالان هاتە ڤەشارتن.
خەلکێ دهوکێ و کوردستانێ ب گشتی گەلەک خەمگین و داخبار بوون ب وەغەرکرنا بەرێزی ژ بەر جامیری و خزمەتا وی یا رەوشەنبیری بۆ دهوکێ…
د چلرۆژیا وی دا ل پەرتوکخانەیا بەردخانیان ل دهۆکێ (ل روژا ئێکشەمبێ ٢٢ /٨ /٢٠٢١) ب ئامادەبوونا مالباتا وی و چەندین دوست و هەڤالان و دەزگەهێن راگەهاندنێ بەرهەمێ وی یێ ب ناڤێ: (دهوک ژ گوندەکێ مەزن بۆ باژێرەکێ بچویک) هاتە بەلاڤەکرن، وچەند پەیڤ ل دور جامیری و کارتێگرنا رولێ وی د بزاڤا رەوشەنبیری دا ل دهۆکێ هاتنە پێشکێش کرن.. ل روژا سێشەمبێ (٢٥ /١/ ٢٠٢٢) زانکویا نەروز ب پشتەڤانیا سەرۆکاتیا هەرێما کوردستانێ و ب هەڤکاری دگەل رێڤەبەریا گشتی یا رەوشەنبیری و هونەری ل پارێزگەها دهۆکێ، ورێکخراوا مەند بو یەکسانی، ئێکەتیا نڤێسەرێن کورد- دهۆک، سەندیکایا هونەرمەندێن کوردستانێ- دهۆک، ناڤەندا خانی یا راگەهاندنێ و رەوشەنبیری- دهۆک، رێڤەبەریا پەرتوکخانەیێن گشتی ل پارێزگەها دهۆکێ- رابوون ب بیرئانینا نڤێسەرێ چەلەنگ و روژنامەڤانێ چالاک (سەیدایێ ئیسماعیل) و ب ئیمزاکرنا (٨) پەرتوکێن وی و بەلاڤەکرنا وان ل سەر ئامادەبوویان کو ل سەر ئەرکێ سەرۆکاتیا هەرێما کوردستانێ هاتبوونە چاپکرن.
بەرێز (ئیسماعیل طاهر جانگیر) ژ دایکبوویێ (٥ /١/ ١٩٦٩)یە، ل باژێرێ دهۆکێ، قوناغا زاروکینیێ ل دهۆکێ یا بوراندی لەوما مالا وان وەک دهوکیێن قارقاراڤایی د هێنە حسابکرن، پشتی فامابووی یێ چوویە (قوتابخانا بەهدینان یا سەرەتایی) ل سالا (١٩٧٥ێ)، پشتی خواندنا (ناڤنجیا ئولا) خلاسکری (١٩٨١-١٩٨٤) یێ چوویە خواندنگەها ئایینی (ثانویة الدراسات الإسلامیة) ل دهۆکێ ل سالێن (١٩٨٤-١٩٨٧) یا خلاسکری وچوویە (کولیژا الفقه) ل نەجەف (ل سالا ١٩٨٧ێ) بەلێ ل سالێن (١٩٨٩-١٩٩١) نە چوویە دەوامێ ل کولیژێ!، پشتی ڕەڤا ملیونی ل سەرهلدانا سالا (١٩٩١ێ) یێ ژ سنوری ڤەگەریایە دهۆکێ پاشی (ل سالا ١٩٩٢ێ) یێ چوویە (کلیة الفقه) ل نەجەف یا تمامکری و باوەرنامەیا بەکالوریوسێ ب شەریعەتی و زانستێن ئایینی و زمانێ عەرەبی یا وەرگرتی ل سالا (١٩٩٣ێ) یێ ڤەگەریایە دهۆکێ هەر ڤێ سالێ خێزان یا پێکئینایی.
– سەیدایێ (ئیسماعیل) پشتی سەرهلدانێ چەند کارێن راگەهاندنێ یێن جودا جودا یێن کرن ل ڤێرێ ول وێرا هە!، وکارێ کری وەک روژنامەڤان پاشی یێ هاتیە دامەزراندن ل رادیوویا دهۆکێ (ل سالا ١٩٩٤)، فەرمانبەر ل رێڤەبەریا گشتی یا رەوشەنبیری و هونەری ل پارێزگەها دهۆکێ (ل سالا ١٩٩٦ێ)، وهاتە هەلبژارتن ب (٧٥) دەنگان وەک سکرتێری سەندیکایا رۆژنامەڤانێن کوردستانێ- تایێ دهۆکێ (ل سالێن ٢٠٠٨-٢٠١٢)، و دگەل هندێ بوویە رێڤەبەرێ سەنتەرێن رەوشەنبیری وتیپێن هونەری (ل سالێن ٢٠٠٩- ٢٠١٢)، پاشی بوویە جێگرێ رێڤەبەری چاپ وبەلاڤەکرنی ل پارێزگەها دهوکێ (ل سالێن ٢٠١٢-٢٠١٤)، پاشی بوویە رێڤەبەڕی کارگێریا رێڤەبەریا گشتی یا رەوشەنبیری وهونەری ل پارێزگەها دهۆکێ (ل سالێن ٢٠١٤-٢٠١٥)، پاشی ل دویماهیکێ (ل سالا ٢٠١٥) بوویە رێڤەبەرێ پەرتوکخانێن گشتی ل پارێزگەها دهۆکێ و هەر د وێ پوستێ خوە دا بوو هەتا وەغەرا دویماهیکێ کری.
ل هەر جهەکێ کار لێ کری شوون تبلێن وی د دیار بوون و هەر دەم وەک رێنیشاندەر وپەناگەهـ و پشتەڤان و شیرەتکارەکێ بهێز بوو بو هەڤالێن خوە، زێدەباری ڤان کارێن فەرمی نڤیسکارەکێ چالاک و خوەدان شیان بوو وەک ئەندامێ ئێکەتیا نڤێسەرێن کورد- تایێ دهۆکێ و پێوەندیێن خورت د گەل نڤیسکارێن خویانی و بیانی هەبوون، رولەکێ باش هەبوو د ڤیستەڤالێن ئێکەتیا نڤیسکاران دا. ل رادیویا دهۆکی دارێژەرێ دەنگوباسان بوو (ل سالێن ١٩٩٣-٢٠٠٤ێ)، ل نڤێسینگەها راگەهاندنا پارتی/ دەزگەهێ خانی (ل سالا ١٩٩٧-١٩٩٨ێ)، داریژەرێ دەنگوباسان بوو ل تەلەفزیونا دهۆکێ (ل ناڤبەرا سالا ١٩٩٨ هەتا سالا ٢٠١١ێ). پەیامنێری کریە بو چەند روژنامە و گوڤار و دەزگەهێن راگەهاندنێ یێن کوردی و عەرەبی بۆ نموونە: روژنامێن: نداء المستقبل، بەدرخان، الصباح، الصباح الجدید، مجلة گولان، وکالة لأنباء المستقلة، ینابیع کوردستان، ئاژانسا پەیامنێر، زاگروس میدیا و رادیویا زاگروس)، دهەمی ڤان پوستێن خوە دا رفتار وسەرەدەریەکا زور جوان وجامێرانە دگەل فەرمانبەر وهەڤالێن خوە کریە.. لەوما ل سالا (٢٠٠٧ێ) خەلاتێ حافز قازی یێ میدیایێ پێ هاتە بەخشین، و ل سالا (٢٠١٥) خەلاتێ زێری یێ سەندیکا روژنامەنڤێسێن کوردستانێ بدەستخوەڤە ئینا… کە جهێن کەسێن هووسا بەرکەفتی و ژێهاتی وبوشاییا وان زوی بزوی نا هێتە گرتن وپڕکرن.
– سەیدایێ (ئیسماعیل طاهر جانگیر) کەسەکێ گەلەک جامێر وهێمن ورحەت بوو .. گەلەک سالوخەتێن باشیێ و چاکیێ وقەنجیێ ل دەف هەبوون… ژ وانا:
１- خوە مەزن نەدکر گەلەک یێ جامێر و سادە و (متواضع) بوو، هەتا خوە دیار نە دکر کو رێڤەبەری پەرتوکخانێن گشتی یە ل پارێزگەها دهوکێ .. لەوما زوربەیا خەلکی و دەزگەهێن فەرمی ژی وەسا هزر دکر رێڤەبەری پەرتوکخانەیا بەدرخانیان ە !.
２- مروڤەکێ دلسافی و دلپاقژ و خوشتڤی بوو .. کەرب و کین ژ کەسێ نە ڕادکر، حەز ژ تێکڤەدانێ و گروپکانێ نە دکر، لەوما رفتارێن وی د گەل هەمیان گەلەک د جوان بوون، و پێوەندیێن وی گەلەک د خوش بوون د گەل هەمی ئالی وکەس ودەزگەهان.
３- هەڤالەکێ دلسوز، دلوڤان، وەفادار، رحسڤک، ئاخفتن شرین و سوحبەتخوش و خزمەتکار بوو، رێزەکا مەزن ل هەڤالینیێ دگرت و پشتەڤان و هاریکارێ وان بوو، و هەردەم پسیارا هەڤالان دکر و هەکە ئێک نەخوش ببایە یان رویدانەک بو پەیدا ببیایە سەرەدانا وی دکر و خەما وی ڕادکر، ل دەف هەڤالێن خوە گەلەک یێ خوشتڤی بوو لەوما ب ناڤێ: (رئیس/ سەروک) گازی دکرێ وەک رێزگرتن.
４- کەسەکێ رەوشەنبیر بوو، گەلەک د خواند و خوە پێگەهاند بوو، هەر چەندە بسپوریا وی (شەریعە و زانستێن ئیسلامی) بوون، بەلێ زێدەباری بوارێ خوە یێ ئایینی شارەزاییەک گەلەک باش هەبوو د بابەتێن بیر و هزران (فکری) دا، د رەوشەنبیریا گشتی دا، ب دەهان گوتار و بابەت نڤێسینە ل دور بیروهزر و کارێن زانا و فەیلەسوف و بیرمەندێن جیهانی، بابەتێن جڤاکی و مروڤایەتی و یێن گرێدایی خواندنێ و پەرتوکێ و بهایێ وان، پەیڤ و سمینار یێ ل سەر پێشکێش کرین، وهەمی بزاڤ دکرن دا پتر رێز ل کەسێن رەوشەنبیر و زانا و پسپور بهێتە گرتن و ئەو ببنە رێبەر و سەرکێش و پیشەنگێن جڤاکێ کوردستانێ.
５- کەسەکێ کوردپەروەر، جڤاکدوست، خوشمروڤ، نیشتیمانپەروەر و سەبرکێش و خوەڕاگر بوو، گەلەک یێ هشیار بوو ل سەر بابەتێن نەتەوی و هەردەم بەڕەڤانی ژ دوزێن کوردایەتیێ و مافێن مروڤی و مافین گەلێ کوردستانێ بگشتی دکر.
６- کەسەکێ چالاک و ب بزاڤ و ب بەرهەم و ب ڕاهاڤێژ بوو، ب دەهان چاڤپێکەفتنێن تەلەفزیونی و رادیویی و روژنامەڤانی یێن دگەلدا هاتینە کرن ل دور بابەتێن جودا جودا ب زمانێ کوردی و عەرەبی… ئەوی بخوە ژی چەند بەرنامێن رەوشەنبیری یێن پێشکێش کرین ل رادیویێ و ل تەلەفزیونێ، هندە جاران د روژەکێ دا چەند بەرنامە هەبوون و چەند چالاکی ئەنجام ددان!، روژێن وی د ڤالا نە بوون، بەلکو هەمی دەمێن وی د بەرهەمدار بوون، کارێن وی هەمی بۆ ئاڤاکرنا تاکە کەسی وجڤاکەکێ ساخلەم بوون، پشکداری یا چەندین خول و وورکشوپا دا کری چ کوردستانێ و چ ژدەرڤە.
７- کەسەکێ راستگۆ، پاقژ و دەستپاک بوو، کو باشترین سالوخەتێ فەرمانبەر و رێڤەبەر و بەرپرس و سەرکردێ ڤی سەردەمی دەستپاکی یە، چونکو ئەو کەسێن دزیێ و گەندەلیێ نە کەن و خوە ژ خرابیێ دوور ڕابگرن ئەو کەس مروڤێن پاقژ و پیروزن ل دەف خودێ و مللەتی.. لەوما سەیدایێ ئیسماعیل ژ وان کەسێن بژوین وپیروز بوو، هەتا وەغەرا دویماهیکێ کری نە خانیێ خوە هەبوو و نە ترومبێل !!.
８- سەیدایێ ئیساعیل گەلەک حەز ژ دهۆکێ کر و خەمەکا مەزن ژێ دخار و بەردەوام کار دکر بو بەرچاڤکرنا رویێ گەشێ دهۆکا دێرین و رەسەن و جڤاکێ وێ یێ بەرێ و پاراستنا شینوارێن وێ.. چەندین بەرنامێن جودا جودا ل سەر ڤێ چەندێ هەبوون وپێشکێش کرینە.. هەر چەندە ژ لایێ ژیێ خوە ڤە یێ بچویک بوو بەلێ حەز و ڤیانا وی بو دهۆکێ و کومکرنا پێزانینان ل سەر رەوشا خەلکێ وی وەلێ کربوو وەکی کالەمێرەکێ سەد سالی وەسا بەحسێ دهۆکا دێرین و کەڤن دکر، و ببوویە هێما و سومبەلەک بو دهۆکێ !.
９- شێوازەکێ گەلەک سرنجڕاکێش و هەستڕاکێش هەبوو د نڤێسینێ دا… زمانزانەکێ پەهلەوان بوو، گوتار و بابەتێن خوە وەکی چیروک و سەرهاتی بەرچاڤ دکرن.. خویندەڤان نەچار دکر پێدا بچیتە خارێ و هەمیێ بخوینت دا بزانیت دویماهیک چلێهات؟.
１０- کەسەکێ بیر تیژ وهزر کوور بوو… ئەو رویدانێن دیتین و ب سەری هاتین گەلەک ب باشی ڤەدگێران و ئەگەر و ئالیێن رویدانێ ب جوانی بەرچاڤ دکرن.. دا بێژی دوهی و پێرە ! بلا ئەو (٣٠-٤٠) سال بیت بورین !.
１１- رەخنەگرەکێ ئاڤاکەر بوو، خودان رێبازەکا ناڤنجی (وەسەطی) بوو، یێ دوور بوو ژ توندرەویێ، ل سەر گەلەک بابەتان دیتن و بوچوون و تێبینێین خوە هەبوون، و گەلەک ب جوانی و ب رێکەکا ناڤنجی و بێ بریندارکرنا کەسێ بەرامبەر بەرچاڤ دکرن.
１２- سەرەرای هندێ کەسەکێ ڤەکری بوو، مروڤەکێ ئولدار و خودان باوەر وپێگیر بوو، خودان رەوشتەکێ بلند بوو، سەرا زێدەگاڤیێ ل سەر ئایینی د هاتە دەنگ و هەلویست وەردگرت، رێز ل هەمی ئایینان و بیر و هزرا و دیتنێن جودا جودا ژی دگرت، گەنگەشە ب هێمنی دکر، وزێدەگاڤی ل سەر چو کەس و چو ئالیان نە دکر، رفتار و پەیاما وی یا خێرێ و ئاڤاکرنێ و مروڤایەتیێ بوو پتر ژ هەر بنەمایەکێ دی.
１３- رولەکێ کاریگەر و بەرجاڤ هەبوو د خورتکرنا بزاڤا رۆژنامەڤانی و میدیایی و رەوشەنبیری و سەنتەرێن گەنجان دا ل دهۆکێ .. کە بەردەوام کار د وان بواران دا دکر ب دلسوزی و ب خەمخوری بو دەمێ پتر ژ (٤٠) سالان، هەر ژ ژیێ سنێلەیێ وهەتا وەغەرا دویماهیکێ کری.
１４- سەیدایێ ئیسماعیل خەمخورێ پەرتوکان وخواندنا وان بوو کە برێکا رێکخستنا پەرتوکخانێن گشتی ل دهۆکێ، زاخۆ، ئامێدی و ل ئاکرێ، و ڤەکرنا پەرتوکخانێن گشتی ل سێمێلێ، مانگێشکێ، بامەرنێ ل شێخان… هەول ددا بو بەرفرەهکرن و کەلتورکرنا خواندنا پەرتوکان د ناڤ جڤاکی دا، نەخاسمە پێوەندیێن خورت هەبوون د گەل پەروەردێ و خواندنگەهێن وان و دگەل زانکویان و کولیژێن وان، دگەل دامودەزگەهێن راگەهاندنێ ژ تەلەفزیون و رادیو و گوڤار وروژنامان، د گەل کەسایەتی و گەنجێن جڤاکی.
１５- گەلەک یێ چالاک بوو د تورێن جڤاکی دا (ئەنترنێتێ) د ڤیا پێزانێن نوو بو خوە پەیدا بکەت د هەر بیاڤەکێ وی د خواست، هەمی دەمان بەرێ وی ل پێشکەفتنێ بوو د بوارێن زانستی و ژیانێ دا.
– سەیدایێ (ئیسماعیل) گەلەک د خواند و د نڤێسی… ونڤێسەرەکێ گەلەک زیرەک و شارەزا بوو و کەسەکێ دەست هەلبوو د نڤێسینێ دا.. لەوما د بەر کار وبارێن خوە یێ فەرمانبەریێ و روژنامەڤانیێ و میدیاکاریێ ڕا چەندین پەرتوک نڤێساندینە و چاپکرینە وبەلاڤەکرینە د ژیانا خوە دا ژ وانا:
１- دیتنێن ره‌وشه‌نبیرى، پێكهاتیه ژ 18 گوتارێن تایبه‌ت ب وارێ ره‌وشه‌نبیرى ڤە، 116 به‌رپه‌ڕه
２- ژ ناخێ دل، هه‌لبه‌ستێن جیهانیێن وه‌رگێڕایى، پێكهاتیه ژ CV و هه‌لبه‌ستێن 17 هه‌لبه‌ستڤانێن مه‌زنێن جیهانێ، 144 به‌رپه‌ڕه،
３- میدیا ب دیتنه‌كا ره‌خنه‌یى، پشكا ئێكێ، كۆمه‌كا گۆتارێن ره‌وشه‌نبیرى، پێكهاتیه ژ 46 گوتارێن تایبه‌ت ب میدیایێ ڤه، 141 به‌رپه‌ڕه
４- میدیا ب دیتنه‌كا ره‌خنه‌یى، پشكا دووێ، كۆمه‌كا گۆتارێن ره‌وشه‌نبیرى، پێكهاتیه ژ 17 گوتارێن تایبه‌ت ب میدیایێ ڤه، 94 به‌رپه‌ڕه
５- تێگه‌هێن ره‌وشتیێن ل كار د ئاماده‌كرنا راپۆرتێن میدیایێدا ل دۆر زارۆكان، ڤه‌كۆلینه‌كا زانستى یا وه‌رگێڕایه ل دۆر مژارا میدیایێ، ب زمانێن كوردى وعه‌ره‌بى وئینگلیزى ژلایێ رێكخڕاوا نه‌ته‌وێن ئێكگرتى، نڤیسینگه‌ها هه‌رێمى یا رۆژهه‌لاتا ناڤین وژۆریا ئه‌فریقیا، تیمێ یونسیف یێ میدیایێ ڤه هاتیه ئاماده‌كرن، 22 به‌رپه‌ڕه،
６- شاكارێن هه‌لبه‌ستا جیهانى، هه‌لبه‌ستێن جیهانیێن وه‌رگێرایى، 96 به‌رپه‌ڕه، پێكهاتیه ژ 44 هه‌لبه‌ستێن 20 هه‌لبه‌ستڤانێن جیهانى،
７- ئه‌فسانه ل جیهانێ بلند دفڕن، ئه‌فسانه‌یێن جیهانیێن وه‌رگێڕایى، 27 ئه‌فسانه‌یێن ئیتاڵى وئه‌ڵمانى وئیسپانى نه، 84 به‌رپه‌ڕن
８- ئه‌وا ژپشت نهینیێن وان هاتیه ڤێدان، پێكهاتیه ژ 28 گوتارێن تایبه‌ت ل سه‌ر ئه‌وا ژپشت ژیانا شاكارێن جیهانیێن ناڤدار هاتینه نڤسیین، 84 به‌رپه‌ڕن،
９- شاكارێن تۆره‌یێ جیهانى (دەقێن وەرگێرایی)، ژ وه‌شانێن ناڤه‌ندا خانى دهۆك ل سالا (٢٠٢١).
１０- سه‌رهاتیا ئه‌سكه‌نده‌رێ مه‌زن، ئه‌ڤ به‌رهه‌مه خو د 15 ده‌رگه‌هـ و 11،000 په‌یڤاندا دبینیت و ب شێوێ ده‌قه‌كێ وێژه‌یى هاتیه دارشتن وپشتبه‌ستن ل سه‌ر ژماره‌كا لێڤه‌گه‌ڕ و ژێده‌رێن باوه‌رپێكرى هاتیه كرن.
１１- بازنکێ دەیکا من، نڤێسین: عەلی جابر فەیفی- نڤێسەرێ پەرتوکا چونکى تو خودای-، کوردیکرن: إسماعیل طاهر
１２- دهوک ژ گوندەکێ مەزن بۆ باژێرەکێ بچویک، ژ بەلاڤەکرنا دەزگەهێ پالو، کە (٢١) گوتار بوون ل دور دهوکێ بو (گاڤ نیوز) هاتبوونە ئامادەکرن.
１３- ژیان ل سەر دەمێ کورونایێ، نڤێسین: ئیسماعیل تاهر.
１４- سەرهاتی، نڤێسین: ئیسماعیل تاهر
１５- د گەل من وەرنە بەلگرادێ، نڤێسین: ئیسماعیل تاهر
１６- سەرهاتیا ئەسکەندەرێ مەزن، نڤێسین: ئیسماعیل تاهر، دەرهێنانا هونەری وبەرگ: هەکار فندی، (چاپەکا نوی) چاپخانا پەروەر- دهوک ٢٠٢١.
１７- هەر ژ دەستپێکێ، نڤێسین: ئیسماعیل تاهر، دەرهێنانا هونەری وبەرگ: هەکار فندی، چاپخانا پەروەر- دهوک ٢٠٢١.
１８- مژارێن ژیانێ بەرەف تێگەهێ بلندتر، نڤێسین: ئیسماعیل تاهر
１９- ژ جەرگێ مێژوویێ- سەربور وسەرهاتیێن دێرین، کومکرن وکوردیکرن: ئیسماعیل تاهر
２０- جەلالەددینێ رومی و شەمسێ تەبرێزی و چل رسالێن عشقێ، نڤێسین: ئیسماعیل تاهر
هەروەسا چەند پەرتوکێن دی ئامادەکرینە بو چاپی ژ وانا:
１- کورد وهێمایێن زێرین.
２- مجیەددیینێ میدیاکار: سەرهاتیێن میدیا دهوکێ.
３- شاکارێن تورەیێ ئیسپانی: سەرهاتیێن دێرین (وەرگێران).
４- بەرەف ئاسویەکێ روهنتر: کومەکا گوتارێن روژنامەڤانی.
زێدەباری ئەڤان پەرتوکان چەندین ڤەکولین و نڤێسار و بابەتێن دی یێن جورا وجور ل دور رەوشا دهۆکا دێرین، وبابەتێن رەوشەنبیری یێن گشتی و خواندنا پەرتوکانن و پویتەدان ب گەنجان و مافێن مروڤی، ل هندەک روژناما وگوڤاران دا هاتینە بەلاڤەکرن ب زمانێ کوردی و عەرەبی (نەخاسمە گوڤارا دیجلە- ب پیتێن لاتینی- ١٩٩٨/٢٠٠٣ کار تیدا کریە)، ژ بلی چەند بەرنامێن حەفتیانە ل رادیو وتەلەفزیونان…
رەوشەنبیرێ دهوکێ یێ ب ناڤودەنگ سەیدایێ (ئیسماعیل طاهر جانگیر- بابێ هێژا)ی- خودێ عەفو وئازا بکەت- گەلەک خزمەتا دهۆکێ وخەلکێ وێ یا کری و دهۆکی قەردارێن وی وخزمەتا وی وجامێریا وی نە.
تێبینی: بو ڤان پێزانینان مفا ژ خودێ ژی رازی بخوە، و ژ مالباتا وی، و ژ چەند راپورت وچاڤپێکەفتن و ڤیدیوویان، ونڤێسینەکا روژنامەڤانێ بەرێز: إبراهیم دێرگژنیکی هاتیە وەرگرتن.
خودێ عەفو وئازا بکەت وروحا وی ل بەهشتا خوە یا بەرین شاد و ئارام بکەت… (بابێ هێژا)یی هەڤژین و (٣) کور وکچەک ل دویف خوە هێلان
د. حەمید باڤی
دهۆک ١٣ / ٧ / ٢٠٢٢
