گەلەك حەیف و مخابن فەرماندەیێ دێرینێ پێشمەرگەی، مستەفا نێروەیی ل 2020.12.08 ل هەولێرێ وەغەرکر. مستەفا صالح نێروەیی ل سالا 1933 ل گوندێ (نێروا ژۆری) ژدایکبوویە. هەر ل دەسپێکا شۆڕەشا ئیلونا مەزن ل سالا 1961ێ، چاخێ بارزانی یێ مەزن بەر ب دەڤەرا بەهدینان ڤە چووی، قۆناغا ئێکێ یا بێنڤەدانا وی و پێشمەرگەیێن دگەل دا دەڤەرا نێروەیان بوو. کو هەر هینگی خەلکێ دەڤەرا نێروە ب رێبەریا مستەفا نێروەیی و محمد طاهرێ رەشۆی گەهشتن رێزێن پێشمەرگە یێن بارزانی (هەر وەسا خەلکێ دەڤەرا دەشتازێ و نهێلیان ژی ب رێبەریا شەهیدێ نەمر طه کەریم هێتوتی و مەلا طاهرێ فەق عەمەرێ رشاڤەیی گەهشتن رێزێن پێشمەگەیێن بارزانی).
پشتی رێکخستنا پێشمەرگەیی ل سەر هێزو لەشکران ھاتیە رێكخستن، مستەفا نێروەیی دبە فەرماندێ بەتالیونەکی ل هێزا بالەك. کو بەتالیونا وی دشۆڕەشا ئیلونێ دا رۆلەکێ بەرچاڤ دبینە، ب تایبەتی ژی چاخێ حکومەتا عیراقێ ب هەموو هێزێن خوە ڤە هێڕش کریە دەڤەرا بالەکیان (چونکی بارەگەهێ سەرەکی یێ بارزانی ل وێرێ بوو) پێشمەرگەیێن بەتالیونا مستەفا نێروەیی رۆلەکێ گەلەك مەزن هەبوو ل بەرسینگگرتنا هێزێن دژمنی، ب تایبەتی ل شەڕێن ناڤدارێن ڤان جهان چێبووین (گەویا عەمەرئاغای، گەویا بێشێ، سەرتیزی و سەرێ حسن بەگێ ووو… هتد). پشتی تێکچوونا شۆڕەشا ئیلونێ، وەکی گەلەك خەلکێ باشورێ کوردستانێ، مستەفا نێروەیی دگەل گەلەك مرۆڤێن خوە مشەختی ئیرانێ دبن و مالا وی ل باژێڕێ (کەرەج) ل رۆژئاڤایێ تەهرانێ ب جھ دبە.
ل دەسپێکا شۆڕەشا گولانێ ژی جارەکا دی مستەفا نێروەیی دگەل چەندین پێشمەرگەیان ڤەدگەرە دەڤەرا بەهدینان و بەردەوامی ب خەباتا خوە ددە.
پشتی سەرهلدانا 1991ێ و دامەزراندنا دەزگەها پێشمەرگە یێن ئیلونێ، دبە بەرپرسێ تایێ دهۆکێ یێ وی دەزگەهی.
ل 2020.12.08 ل باژاڕێ هەولێرێ چوو بەردلۆڤانیا خودێ و ل دهۆکێ ، ب ئامادەبوونا مالباتێ، کەس وکاران و پێشمەرگە و هەڤچەپەران و چەندین بەرپرسێن لەشکەری و حیزبی و حکومی د رێورەسمەکا لەشکەری و هەژى دا ل (گورستانا شاخکێ) هاتە ڤەشارتن.
ئه‌م، وەكە مالپەرا، سبەھی، سه‌رساخیێ ل بنه‌مالا مستەفا نێروەیی دکن. بلا سه‌رێ هه‌موو بنه‌مال و که‌س و کارێن وی ساخ به. یه‌زدانێ دلۆڤان وی ب ڕه‌حمه‌تا خوه شاد بکه. ئه‌م خه‌مگینن و ھەڤپارێ خه‌ما مالباتا رەحمەتی نە
ژ فێسبۆكا: ئەدیب چەلكی
