دو ئاریشەیێن مەزن ل سلێمانیێ هەنە، دڤێ پارتیا دەمۆكراتا كوردستانێ (پارتی) ب زیرەکانە، دلفرەهی و زانابوون سەرەدەریێ دگەل وان ھەر دو ئاریشەیان دا بکە.
1- ئازادیا رادەربڕینێ.
2- پارە و پرۆژە.
یەکەم:
یەكێتیا نشتمانیا كوردستانێ (یەكێتی)، ب زانابوونا خوە و ب چاڤدێری و شیرەتێن ئیرانێ و سەرەدەریا ئیرانێ دگەل میدییایێ و ئازادیا ڕادەربڕینێ دا، سلێمانی وەسا بێدەنگ کریە کو دەنگ ژێ دەرنەکەڤە. بێی ئاگاداری و روخسەتا ئێکەتیێ و دەزگەهێ زانیاری کەس نەوێرە باخڤە یان ژی بنڤیسیە.
خەلکێ ڤێ دەڤەرێ گەلەک یێ بھێنتەنگ کری، دەنگ و ئیسکێن وان یێن دسینگێ وان دا هێلای ئان ژی یێن خەندقاندین.
کەنگی وان ماف هەیە باخڤن و تشتەکی بێژن و بێهنا خۆ بەردەن؟
هینگێ کو ل دژی پارتی دئاخڤن و تێنەدەنگ.
ئەو پەریشان، یێل ژڤانا هندێ کو تشتەک ل هەولێرێ و دهۆکێ بقەومە، هینگی وان ماف هەیە، باخڤن، بنڤیسن، هاوار بکەن، کۆنگرێن بناڤ رۆژناماڤانی گرێبدەن، سمیناران بگێڕن. .. .. ئانکو دلێ خۆ هوین بکەن و هەمی ئاخ و ئوخێن خوە ب وی رەنگی دەربێخن.
بەلێ، ئەڤەیە رۆشنبیری، لێهاتن و دەڕبڕینا رایا ئازاد
دووەم: دراڤ و موچە و پرۆژە.
دبێژن، پشتی 2003 ێ هەتا نها، 55 ملیار دولار ژ بەغدایێ هاتنە سلێمانیێ، ئەڤە ژ بلی وێ پارەیێ رەحمەتی مام جەلال برێیا سەرۆککۆماریێ دهنارتن و ژ بلی داهاتێ گۆمرک و باجێن ناڤخوەیی.
لێ یا ژ هەمیێ گرنگتر ژی فرۆتنا کەرکووکێ ل 16 ئۆکتۆبەرا 2017 دا، ب بازارەکێ گۆماناوی!
لێ ئاریشە ل ڤێرە، نە پارە و دراڤن. هەر جهەکێ دبن دەستهەڵاتا ئیرانێ دا بە، دڤێ ئەو جھ ئابوونا خوە، ئانکو زێرەسەریێ بدە ئیرانێ بەرامبەر كو ئیران وان ژ دوژمنێن وەهمی بپارێزە. بۆ نموونە، پاراستنا یەكێتیێ ژ پارتی..
ئیران ب ملیاران دولاران ژ عیراقێ دستینە و پێویستیێن ئیرانێ ب دولارێ ئەمریکی تێردکە و ئیران ژی خوە ژ سزایێن توندێن ئەمریکایێ قۆرتال دەکە و بەردەوامیێ بکار و پرۆژێن خوە ل رۆژهەڵاتا ناڤێن ددە و مننەت ب ئەمریکایێ ژی نینە.
هەڵبەت، ئێکەتی و دەڤەرا وان ژی ژ ڤێ ئابوونێ دبێپار نینن و زێرەسەریا خوە ژ پارا خوە پترێ ددەن. لەوا، چ پارە بۆ خەلکی نامینە و پرۆژێن وان ژی ب رێڤە دمینن و دمینن خوە ل بەرامبەر پارتی ژی قەلس دبینن. هەڤبەری دناڤبەرا دهۆک و هەولێرێ و سلێمانیێ دا ژی ناهێتەکرن.
ژبەرهندێ، هەم د وارێ ئازادیا میدیایی و دراڤی دا، چاڤێ دەڤەرا کەسک ل دەڤەرا زەرە. ئەگەر پارتی ژی هندەک یا نەرم نەبە، دێ رەوشا برایان ل وێ دەڤەرێ هێشتا ئاڵوزتر لێ‌هێت.
پێویستە، پارتی، ئارامتر، زاناتر، بێنفرەهتر و سینگڤەکریتر سەرەدەریێ دگەل خەلکێ مە یێ سلێمانیێ دا بکە و ب چاڤەکێ ڤەکریتر ل وان ژی بنێرە و هەستێ ب بارگرانیا یەكێتیێ و زەهمەتیا خەلکێ وێرێ بکە.
ئەنجام، ئەم هەمی کوردین و برا نە!
2020.02.20
