سه‌رۆککۆمارێ ترکییێ رەجەب تەیب ئه‌ردۆگان پشتی ۱۳ سالان سه‌ردانا به‌غدا و هه‌ولێرێ کر و ب رایه‌دارێن هه‌رێما کوردستانێ را هه‌ڤدیتنه‌ک کر. ئه‌ردۆگان ب مه‌راسیم و ب کێفخوه‌شی هات پێشوازیکرن و د مه‌قامێ مازوورڤانێن کورده د بن وێنه‌یێ م. مسته‌فا بارزانی و د بن سییا ئالایێ کوردستانێ دا روونشت. ئه‌ڤێ یه‌کێ دلێ دۆستان خوه‌ش و دلێ خێرنه‌خواز و نه‌یاران ژی ره‌ش کر.
به‌ری سه‌ردانا ئه‌ردۆگان ب رۆژه‌کێ کۆلانێن هه‌ولێرێ ب ئالێن کوردستان، ئیراق و ترکییێ هاتن خه‌ملاندن. هه‌که نه فۆتۆمۆنتاژ به، که‌له‌ها هه‌ولێرێ ژی سه‌رانسه‌ر ب ئالا ترکییێ هات نه‌قشاندن. ئه‌ڤێ یه‌کێ فه‌رسه‌نده‌ک مه‌زن خست ده‌ستێ خێرنه‌خواز و دژبه‌رێن هه‌رێما کوردستانێ و وه‌ک هه‌ر جارێ پەدەکە و بارزانی ب خیانه‌ت و خوه‌فرۆشییێ تۆهمه‌تبار کرن. هه‌لبه‌ت هه‌ساسییه‌تێن کوردێن باکور هه‌نه، حکومه‌تا کو تشتێن نه‌دیتی ئانییه سه‌رێ کوردان د هش و دلێ کوردان دا برینێن مه‌زن ڤه‌کرنه. ژ بۆ که‌سێن کو رۆژانه دفکرن و تێکلییێن سیاسی یێن ده‌وله‌ت و نیڤده‌وله‌تان ته‌ڤلیهه‌ڤ دکن، دبه کو دالقاندنا ئالا ترکییێ وه‌ک حه‌قاره‌تێ قه‌بوول بکن. لێ دڤێ ئه‌م ژ بیر نه‌کن کو باشوورێ کوردستانێ فه‌ده‌راسیۆن و نیڤ ده‌وله‌ته. خوه‌دییێ سه‌رۆک، پەرلەمه‌نتۆ، سه‌رۆکوه‌زیر، ئارتێش و زاگۆنانه و د قادا ناڤنه‌ته‌وی دا وه‌ک ده‌وله‌ت و ب هشمه‌ندییا ده‌وله‌تبوونێ ته‌ڤ دگه‌ره.
که‌س یان ئالییێن کو پەدەکێ و بارزانییان ب تێکلداری و هه‌ڤکارییا ئه‌ردۆگان و حکومه‌تا وی تۆهمه‌تبار دکن، ژ بیر دکن کو یێن ل دژی ده‌وله‌تبوونا کوردستانێ نه ئه‌ون، یێن سینۆرێن ده‌وله‌تێن داگیرکر دپارێزن ئه‌ون، یێن د پارلامه‌نتۆیا ترکییێ دا ل سه‌ر شه‌ره‌ف و نامووسا خوه و ژ بۆ یه‌ک ئال، یه‌ک مله‌ت، یه‌ک وه‌لات، یه‌ک ده‌وله‌تێ سووند دخون ئه‌ون. یێن کو دبێژن ئالا ترکییێ ئالا مه یه ژی ئه‌ون. یێن کو ژ خه‌زینه‌یا حکومه‌تا ئه‌ردۆگان مووچه و ئالیکارییێ دستینن ئه‌ون. و یێن کو ب پلان و پرۆژه کوردستانێ ژ کوردان ڤالا دکن، کوردان ئاسیمیله دکن و ب ده‌وله‌تێ ڤه پینه دکن دیسا ئه‌ون. ئه‌ڤ ته‌ڤ نه خیانه‌تن، لێ تێکلییێن پەدەکێ و بارزانییان وه‌ک خیانه‌ت ب ناڤ دکن. یانی، شووژنا د چاڤێ خوه دا نابینن لێ ده‌رزییا د چاڤێ پەدەکێ دا وان ئاجز دکه.
ده‌وله‌ت هه‌لبه‌ت وێ سه‌ردانا هه‌ڤ بکن کو کاربن پرسگرێکێن خوه یێن هه‌ڤبه‌ش گۆتووبێژ بکن و هه‌گه‌ر ناکۆکی هه‌بن ل چاره‌سه‌رییان بگه‌رن. ئاقل و هشمه‌ندییا ده‌وله‌ت و ده‌وله‌تبوونێ جودا یه، یا شه‌خسی، مالباتی و پارتیتییێ جودا یه. تشتێ کو ئه‌ڤ که‌س و ئالی فێم دکن لێ خوه ل که‌ر، کۆر و لالبوونێ داتینن و دخوازن گرسه‌یا خوه و کوردێن باکور پێ د خه‌و ره ببن ئه‌ڤه. ڤه‌شارتن و بنجلکرنا راستییانه. یانی، هه‌ر تشت ژ وان را موباحە و ئاده‌ته، لێ ژ خه‌لکێ را خیانه‌ت و قه‌بهه‌ته.
وه‌ک هه‌ر به‌شه‌ری، وه‌ک هه‌ر پارتییێ، وه‌ک هه‌ر حکومه‌تێ، هه‌لبه‌ت وێ کێماسی و خه‌له‌تییێن حکومه‌تا باشوور، پەدەکێ و بارزانییان ژی هه‌بن. ئه‌ڤ دکارن بێن ره‌خنه‌کرن. لێ هه‌گه‌ر هوون رابن ب ناڤێ ره‌خنه‌کرنێ د که‌سایه‌تییا پەدەکێ و بارزانییان دا نه‌یارتی و دژمناتییا ده‌ستکه‌فتییێن باشوورێ کوردستانێ و خه‌تا ده‌وله‌تخوازییێ بکن، ئه‌ڤ دبه نه‌یارتی، دبه خیانه‌تا هه‌ری مه‌زن. چاوا کو پەکەکە و ئۆجەلان دکارن بێن ره‌خنه‌کرن، پەدەکە و بارزانی ژی دکارن بێن ره‌خنه‌کرن. لێ هه‌ر تشت د سینۆرێ خوه دا ماقووله، هه‌ر ره‌خنه ژ بۆ باشی و چاکبوونێ دڤێ بێن کرن، نه ژ بۆ خه‌رابکرن و دژمناتییێ، نه ژ بۆ پارچه‌کرن و نه‌یارتییا کوردان.
د سالێن بۆری دا گه‌له‌ک جاران رایه‌دارێن حکومه‌تا هه‌رێما کوردستانێ (پەدەکە و بارزانی) هاتن ترکییێ و ل ئه‌نقه‌رێ ژ ئالی ئه‌ردۆگان و رایه‌دارێن حکومه‌تێ ڤه ب ئالێن ترکییێ، ئیراق و کوردستانێ هاتن پێشوازیکرن. ئه‌وێن کو ئیرۆ پەدەکێ و بارزانییان ب تێکلدارییا ئه‌ردۆگان و ئاکەپێ تۆهمه‌تبار دکن، وێ ده‌مێ ژی ئاگر ژ ده‌ڤێ وان دبارییا، پێشوازیکرنا ب ئالا کوردستانێ ل زۆرا وان دچوو و بارزانی ب خیانه‌تێ تۆهمه‌تبار دکرن. د ڤر دا دخویێ کو نه‌یارتی و دژمناتییا وان نه ل دژی پەدەکێ و بارزانییانه، ل دژی ئالا کوردستانێ و خه‌تا نه‌ته‌وی، خه‌تا ده‌وله‌تبوونا کوردستانێ یه. پەدەکە و بارزانی ژ بۆ وان ته‌نێ هنجه‌تن. ترس و نه‌یارتییا وان ئا هه‌ری مه‌زن خورتبوونا خه‌تا نه‌ته‌وی و کوردستانیبوونێ یه. ئال نیشانا مله‌تبوون، نیشانا مزگینییا ده‌وله‌ت و ده‌وله‌تبوونێ یه. دژبه‌رییا ئالا کوردستانێ دژبه‌رییا ده‌وله‌تبوونا کوردستانێ یه. ژ به‌ر ڤێ، گۆتنا کو دبێژن “ئه‌ڤ ئالا ئالا بارزانییانه نه به‌لاسه‌به‌به”.
وه‌رحاسلی که‌لام، پرێزه پر زه‌لاله. پرێزا پەدەکێ و بارزانییان ژی ل به‌ر چاڤه، یا نه‌یارێن بارزانییان ژی ل به‌ر چاڤه. پرێزا پەدەکێ و بارزانییان ئالا کوردستانێ یه، فه‌ده‌راسیۆنه، ره‌فه‌راندووما سه‌رخوه‌بوونێ یه، و د پاشه‌رۆژێ دا ده‌وله‌تبوونه. یا نه‌یار و دژبه‌رێن وان ژی ڤالاکرنا کوردستانێ، کۆچبه‌رکرنا ب ملیۆنان کورد، کوشتنا کوردان، ئاسیمیله‌کرن، پارازتنا سینۆرێن داگیرکران و نه‌یارتییا کوردستانه‌ک سه‌ربخوه یه وه‌سسه‌لام….
نووری چه‌لیک
