نێچیرڤان بارزانی، سه‌رۆکێ هه‌رێما کوردستانێ (٢\٩\٢٠٢٥) ل باژارێ هەولێرێ، دگەل ئادمیرال جارله‌س براد کۆپه‌ر، فه‌رماندارێ فه‌رمانداریا ناڤه‌ندی یا ئامه‌ریکایێ و شانده‌کا بلند کو، ژ هه‌ژماره‌ک پله‌بلندێن سه‌ربازی و شێورمه‌ندان پێکهاتبوو، جڤیا.
د جڤینێ دا، په‌یوه‌ندیێن ئامه‌ریکایێ دگه‌ل ئیراق و هه‌رێما کوردستانێ ب تایبه‌تی د وارێ ئه‌وله‌هی و سه‌ربازی ده هاتن گۆتووبێژکرن. هه‌ر وها د ده‌ربارێ مه‌ترسیێن داعشێ و گه‌فێن وێ ل سه‌ر ئاساییش و ئه‌وله‌هیا ل ئیراق و سووریێ و هه‌ڤکاری و ئالیکاریێن ئامه‌ریکایێ ژ بۆ ئیراق و هه‌رێما کوردستانێ ژ بۆ بهێزکرنا شیانێن سه‌ربازی و ئه‌وله‌هیێ دا، دانوستاندنا بیر و ڕامان کرن.
سه‌رۆک نێچیرڤان بارزانی سپاسیا هه‌ڤکاری و پشتگریا ئامه‌ریکایێ ژ بۆ هه‌رێما کوردستانێ یا ژ بۆ تێکبرنا داعشێ و پێشکێشکرنا ئالیکاری، فێرکاری و په‌روه‌رده‌هیا پێشمه‌رگه را و هه‌ڤکاریا وان ژ بۆ پێڤاژۆیا ڕه‌فۆرم و چاکسازیا د وه‌زاره‌تا کارووبارێن پێشمه‌رگه دا و یه‌ککرنا پێشمه‌رگه دا کر. هه‌ر وها ئاماده‌هی و خوه‌سته‌کا هه‌رێما کوردستانێ یا ژ بۆ پێشڤه‌برنا هه‌ڤالبه‌ندی و هه‌ڤکاریا وان ئا هه‌ڤبه‌ش دا، دوباره کر.
ئادمیرال جۆئۆپه‌ر، ڕۆلا هه‌رێما کوردستانێ د ڕووبرووبوونا داعشێ و تێکبرنا وێ دا بلند نرخاند، پابەندبوونا ئامه‌ریکایێ ب پشتگریا هه‌رێما کوردستانێ وه‌کی هه‌ڤالبه‌ند دوباره کر و بالکشاند ل سه‌ر وێ یه‌کێ کو وه‌لاتێ وی ب گرینگیه‌ک مه‌زن ل تێکەلیێن خوە یێن ب هەولێرێ را دنێره. هه‌ر وها ته‌که‌ز کر کو هه‌ڤکاریا هه‌ڤبه‌ش یا ژ بۆ ڕووبرووبوونا ته‌رۆرێ و ژناڤبرنا یه‌کجاری یا داعشێ و گه‌فێن ئه‌وله‌هیێ دا، بێ خورتتر کرن.
