سوێد دکارە مفا ژ نێچیرڤان بارزانی وەربگرە
ڕۆژنامه‌یه‌کا سوێدی گۆتاره‌کا ژنه‌کا کورد کو ڕه‌خنه ل پارتیێن سیاسی یێن سوێدێ گرتیه به‌لاڤ کریه و گۆتیه کو ل وی وه‌لاتی هێشتا ژی نه‌وه‌کهه‌ڤی د ناڤبه‌را ژن و مێران دا هه‌یه. نڤیسکارا گۆتارێ داخوازێ ژ سوێدیان دکه کو ژ بۆ پێکانینا وه‌کهه‌ڤیا ژن و مێران ژ ئیراده و خه‌باتا سه‌رۆکێ هه‌رێما کوردستانێ نێچیرڤان بارزانی مفا وه‌ربگرن .
ڕۆژنامه‌یا سوێدی فه‌مپه‌رس نیهێته‌ر، کو ل سه‌ر پرسگرێکێن ژنان و فه‌مینیزمێ ئه‌له‌قه‌داره، گۆتاره‌کا نڤیسکار ره‌باند رەزا کو، مامۆسته‌یا لیسه‌یا گه‌ل ئا سوێدێ یه، وه‌شاند. ره‌زا د گۆتارا خوه دا ده‌ستنیشان دکه کو هه‌تا رۆژا ئیرۆ ل سوێدێ نه‌وه‌کهه‌ڤیا ژن و مێران هه‌یه؛ نڤیسکار پارتیێن سوێدی رەخنە دکه کو هێشتا ژی ل سه‌ر وه‌کهه‌ڤیا راستین یا ژن و مێر ل هه‌ڤ ناکن و ژ وان دپرسه: “چما سه‌رۆک نێچیرڤان بارزانی دکاره ب ته‌نێ و د جڤاکه‌کا کو د ده‌ستپێکێ دا گه‌له‌ک ئاسته‌نگی ل پێشیا ده‌مۆکراسیێ هه‌نه، دروستکرنا ده‌نگێن هه‌ڤبه‌ش ژ بۆ گوهه‌رتنێن د یاسایێ دا د به‌رژه‌وه‌ندیا ژنێ دا سه‌رکه‌فتی به، لێ هوون نکارن پرسگرێکێن سیاسی یێن ئیرۆ ل سه‌ر مژارا ژنێ ب هه‌مان ئاوایی چاره‌سه‌ر بکن؟”
د ده‌ربارێ گۆتارا خوه دا، رەباند رەزا رۆژا ئینێ 2022.04.08 ژ تۆرا مه‌دیایی یا رووداوێ را راگهاند کو ئه‌ڤ چه‌ند سالن ل سوێدێ دژی و دزانه کو جوداهی د ناڤبه‌را ژن و مێران دا هه‌یه و گۆت “ل سوێدێ ب گه‌له‌مپه‌ری جوداهیه‌ک د ناڤبه‌را ژن و مێران دا هه‌یه.”
ره‌باند رەزا ئاماژه ب وێ یه‌کێ دکه کو ل هه‌رێما کوردستانێ د به‌رژه‌وه‌ندیا ژنان دا گوهه‌رتن هاتنه کرن و گۆت، ل هه‌رێما کوردستانێ قانوونێن باش هاتنه ده‌رخستن و سه‌راستکرن. هه‌روها ره‌زا دبێژه “سه‌رۆک نێچیرڤان بارزانی بانگ ل هه‌موو ئالیان کر کو ژ بۆ گوهه‌رتنا یاسایێ ب هه‌ڤ را ته‌ڤبگه‌رن و ئه‌ز ژی داخوازێ ژ سوێدێ ژی دکم کو هه‌مان کاری بکن.”’
ره‌باند رەزا د به‌شه‌که دن ئا ئاخاڤتنا خوه دس دیار کر کو “ئه‌و شیانا کو سه‌رۆک نێچیرڤان بارزانی پێ کار کریه، ل سوێدێ نه‌دیتیه.”
ره‌باند رەزا د ده‌ربارێ ڕه‌وشا ژنان ب گشتی ده وها گۆت: “نه ل سوێدێ و نه ژی ل هه‌رێما کوردستانێ ڕه‌وشا ژنان ئه‌و قاس باش نه‌بوویه کو ئه‌م ببێژن چو ئاریشە نەمانە.”
ره‌باند رەزا د گۆتارا خوه دا وها دنڤیسه: “ئه‌ز د ئاخافتنێن سیاسی یێن سوێدی دا ده‌ربارێ فه‌مینیزمێ دا گه‌له‌ک نێرینێن جودا دبهیزم؛ ژ وان جوداهیان گه‌له‌ک جاران تێ دیتن کو تێکۆشینا ژ بۆ بده‌ستخستنا جڤاکه‌کا وه‌کهه‌ڤ ل ڤی وه‌لاتی ڕاوه‌ستیایه. د گه‌له‌ک ره‌وشان دا نه‌وه‌کهه‌ڤیا ل دژی ژنان هه‌یه، ب تایبه‌تی ل جهێ کار.”
ته‌ڤی کو د دیرۆکا ده‌مۆکراسی و ئازادیێ دا جوداهی هه‌نه، ره‌زا د ئاخافتنا خوه دا دبێژه “لێ ل هه‌رێما کوردستانێ ئه‌ز ئیراده و پابه‌ندبوونا دبینم، ئه‌ز دبینم کو ده‌رفه‌تا دیالۆگێ و خالێن هه‌ڤبه‌ش هه‌نه، جوداهیێن سیاسی و ئیدیۆلۆژیک هه‌بوون، لێ سه‌رۆک نێچیرڤان بارزانی کاریه ل سه‌ر پرسا گۆتووبێژان لهه‌ڤکرنه‌کێ په‌یدا بکه ژ بۆ ژنان.”
ره‌باند رەزا ئاماژه ب وێ یه‌کێ دکه کو ده‌ما ئه‌و ژ کوردستانێ ده‌رکه‌ت، ژن ل هه‌رێما کوردستانێ ژ گه‌له‌ک مافێن بنگه‌هین بێپار بوون، لێ نها ئه‌ڤ تشت هاتیه گوهه‌رتن و وها دنڤیسه: “سوێد و کوردستانێ د وارێ وه‌کهه‌ڤی و ده‌رفه‌تێن ژنان دا نایێن به‌راوردکرن؛ سوێد د گه‌له‌ک ره‌فۆرم و سیاسه‌تێن کو ره‌وشا ژنان باشتر کرنه، ب سه‌ر که‌تنه، لێ ئه‌گه‌ر هوون ته‌مه‌نێ ده‌ستهلاتداریێ و تێکۆشینا د ناڤبه‌را هه‌ر دو وه‌لاتان دا بدن به‌ر هه‌ڤ دێ جوداهی د ناڤبه‌را هه‌ر دو وه‌لاتان دا بینن. هن مافێن ژنان ل سوێدێ ۱۰۰ سالن، لێ حکوومه‌تا هه‌رێما کوردستانێ ب خوه ۳۰ سالی یه و د ڤان سالێن داوی دا سیاسه‌تا هه‌رێما کوردستانێ، ته‌ڤی ئاسته‌نگیێن مه‌زن، گاڤێن باش به‌ر ب جڤاکه‌کا وه‌کهه‌ڤ ڤه ئاڤێتنه.”
هه‌روها، ره‌زا به‌حسا وان ئاسته‌نگیێن ل پێشیا ژنان و گوهه‌رتنێن یاسایا مافێن ژنان ل هه‌رێما کوردستانێ دکه، ژ وان ژی دژاتیا هنده‌ک پێنگاڤێن هنده‌ک ئالیێن ئیسلامی؛ ده‌ستوورا ئیراقێ، کو “ئه‌گه‌ر قانوونه‌ک نوو ل دژی دینێ ئیسلامێ به دێ رێ ل به‌ر ده‌رخستنا قانوونان بگره. لێ به‌لێ حکوومه‌تا هه‌رێما کوردستانێ و سه‌رۆکێ هه‌رێما کوردستانێ نێچیرڤان ئیدریس بارزانی کارین گه‌له‌ک ئالیێن سیاسی، فه‌مینیست و ئیسلامی ژ بۆ دیالۆگێ بینن جه‌م هه‌ڤ. ژ ڤی ئالی ڤه خالێن هه‌ڤپار دیتنه و ژ بۆ باشترکرنا ڕه‌وشا ژنان هندەک ڕه‌فۆرمێن قانوونی کرنه.”
ژنا کورد د گۆتارا خوه دا ژ ئالیێ سیاسی یێن سوێدێ پرس دکە: “ئه‌گه‌ر سه‌رۆک نێچیرڤان بارزانی د ناڤ جڤاکه‌کا چه‌ند سالان ئازاد دا بژیا و به‌ر ب ده‌ستپێکا ده‌مۆکراسیێ ڤه چووبوویا، ته‌ڤی ئاسته‌نگیێن ل به‌ر ده‌ستوور و جڤاکه‌ک گرێدایی وێ د ئاڤاکرنا هه‌ڤپه‌یمانیێ دا ب سه‌ر بهاتا ب ئیسلام و پارتیێن ئیسلامی را. سوێد نکاره ب هه‌مان ئاوایی کریزا سیاسی یا هه‌یی یا ل سه‌ر پرسگرێکێن ژنان چاره‌سه‌ر بکه؟ چما نکارن ژ ناکۆکیێن خوه یێن ئیدیۆلۆژیک و سیاسی ده‌رباس ببن و ژ بۆ مافێن ژنان جوداهیان ژ هۆلێ راکن و ژ بۆ بده‌ستخستنا ئارمانجا ئاڤاکرنا جڤاکه‌کا وه‌کهه‌ڤ ئا ژن و مێران، خالێن هه‌ڤپار ببینن؟”
رووداو
