سیاسی

سوێد و ناتۆ و پرسا کورد

ب ئێریشا رووسیایێ یا دژی ئوکراینا را یه‌ک ژ پرسێن سه‌ره‌که‌ کو که‌تیه‌ رۆژه‌ڤا سوێدێ دا ئه‌و بوو کا دێ سوێد داخوازا ئەندامەتیا  ناتۆ بکە یان نا. رۆژ بۆ رۆژێ ئەڤ مناقەشە گەرم دبوو و دەنگێن ژ بۆ چوینا ناڤ ناتۆ د ناڤ سوێدیان دا بلند دبوون و هندەک پارتیێن سیاسی ژی یان هه‌لوه‌ستا خوه‌ گوهه‌رتن یان ژی وەکی بەرێ زێده‌ ل دژ نەراوەستان.

حکومه‌تا سۆسیالده‌مۆکرات کو به‌رێ ل دژی ئه‌ندامتیێ بوو هێدی هێدی نه‌رمتر بوو و حەتا گەهشتە وێ باوەری کو سوێد داخوازنامەیا ئەندامەتیا ناتۆ پێشکەش بکە.

 د سیاسه‌تا سوێد دا پارتیا کو ب ده‌نگه‌کی بلند ل دژی ئه‌ندامتیێ ده‌ردکت پارتیا چه‌په بوو‌.

به‌رپرسێ سیاسه‌تا ده‌رڤه‌ یێ پارتیا چەپ دبێژە:  ئه‌گه‌ر سوێد دەست ژ سیاسه‌تا خوه‌ یا ده‌مدرێژ یا بێئالی به‌رده‌ د دەما ناکۆکییێن  ناڤبه‌را هێزێن مه‌زن دا نکارە بێئالی بە. و ئەو مەجالێ وێ وەکی بەرێ نامینە کو ترکیێ رەخنە بکە.

 ئەو بەرپرسێ پارتیا چەپ دانیمارک و نۆرڤێج وەک میناک نیشان ددە و دبێژە: هه‌ڤالێن من یێن نۆرڤێجی و دانیمارکی کو ئەندامێن ناتۆیێ نە، دیار دکن کو ئیمکانا ده‌وله‌ت و حکومه‌تێن وان کو ب زه‌لالی ترکیێ ژ به‌ر بنپێکرنێن وێ یێن مافێ مرۆڤان ڕه‌خنه‌ بکن کێمتره‌. له‌ورا ب باوەریا من دڤێ ئه‌م ئیمکانا سوێد یا ڕه‌خنه‌یێ کێم نه‌کن.

سیاسه‌تڤانه‌کی دن ئێ سوێدی کو ئه‌ڤە ب ده‌هان سالانە  ب پرسا کوردی را ژ نێزیک ڤه‌ ئه‌لاقه‌داره‌ جیگرێ سه‌رۆکێ پارتیا لبه‌رالان فره‌دریک مالمه‌.

به‌رۆڤاژی پارتیا چه‌پ، لیبه‌رال ئالیگرێن ئه‌ندامتیا ناتۆ نه‌.

فره‌دریک مالم دبێژه:‌

ترکیێ ژ به‌رێ دا ژ بۆنا کو ته‌ئسیرێ ل سیاسه‌تا مه‌ بکه‌ د ناڤ هه‌ولدانان دایه‌، وێ ژ نها و پێ دا ژی ب ریێن جودا هه‌ولدانێن خوه‌ بەردەوام بکە.

فرەدریک مالم دبێژه‌ کو ئه‌و هێڤیداره‌ کو ب ئه‌ندامتیا ناتۆیێ را نه‌ کو ب تەنێ ده‌نگێ سوێد د پرسا کوردی دا لاوازتر ببه‌، به‌رۆڤاژی گرانیا سوێدێ یا سه‌ر ترکیێ زێده‌تر ببه‌.

پێشکەشکرنا داخوازنامەیا ئەندامتیا ناتۆیێ  وێ ژ بۆ دیرۆکا نووژه‌ن ئا سوێدێ ببه‌ یه‌ک ژ بریارێن هه‌ری مه‌زن. ژ به‌ر کو ئه‌ڤ زێده‌تر ژ دوسه‌د سالانە  سوێد نه‌که‌تیه‌ ناڤ چو شه‌ره‌کی دا و کاریه‌ د هه‌ردو جه‌نگێن جیهانێ و شه‌رێ سار دا سیاسه‌ته‌که‌ بێئالی بمه‌شینه‌.

ب ڤێ سیاسه‌تا خوه‌ یا سه‌ربخوه‌ سوێد نه‌خاسم د پرسێن ده‌مۆکراسی و مافێ مرۆڤان دا گه‌له‌ک جاران وه‌لاته‌کی پێشه‌نگ بوویه‌. نوونه‌رێ پارتیا ده‌مۆکراتیک ئا گه‌لان، هدپێ هشیار زسۆی دبێژه‌ ڤێ ده‌ما داوی مرۆڤ دکاره‌ د نێزیکبوونا پرسا کوردی ده‌ ژی ڤێ هه‌لوه‌ستا سوێدێ ببینه‌.

هشیار زسۆی ببیر تینه‌ کو حکوومه‌تا سوێد هه‌م ل دژی سیاسه‌تا ترکی یا رۆژاڤایێ کوردستانێ خوه‌دی هه‌لوه‌سته‌ک پر زه‌لال بوویه‌ و هه‌م ژی د مه‌سه‌له‌یا پرسێن حقووق و ده‌مۆکراسیا ناڤا ترکی دا ب ده‌نگه‌کی بلند رایا خوه‌ ئه‌شکه‌ره‌ کریه‌.  ل گۆر باوه‌ریا وی سوێد وێ کاربه‌ ڤێ خه‌تا خوه‌ یا سیاسی ده‌وام بکه:‌

د ناڤ ناتۆیێ دا ده‌وله‌تێن ده‌مۆکراتیک ژی هه‌نه‌ و یێن وه‌که‌ ترکی ئۆتۆریته‌ر و دیکتاتۆر ژی هه‌نه‌. لۆما سوێد دکاره‌ ژ به‌ر ئه‌وله‌هیا خوه‌ ببه‌ ئه‌ندامێ ناتۆیێ بێیی کو مه‌جبوور بمینه‌ چاڤێن خوه‌ ژ پرسێن ده‌مۆکراسی، مافێ مرۆڤان، ئازادی و سیاسه‌تێن فاشیتان را بگره‌.

ئه‌ز ب خوه‌ نه‌ د وێ قه‌ناعه‌تێ دا مه‌ کو ب ئه‌ندامبوونا ناتۆیێ را سوێد یه‌کسه‌ر ل هه‌مبه‌ر کریارێن ترکی بێده‌نگ بمینه‌.

رادۆیا کوردی/سوێد

Back to top button