گه‌له‌ک جارا به‌حسا هه‌لوه‌ستا که‌سایه‌تیێن سیاسی و نه زه‌لالبوونا سیاسه‌تا پارتیێن سیاسی دھێتە کرن. لێ مخابن گه‌له‌ک جاران ژی ب ناڤێ سیاسه‌تێ ڕاستیا هه‌یە ب چ ئاوایه‌کی ب زه‌لالی ناھێتە ڕۆژه‌ڤێ. ئالیێن سیاسی و که‌سایه‌تیێن کو نه خوه‌دی هه‌لوه‌ستن و ناخوازن ب زەلالی ھەلوەستێ خوە ژ رایا گشتی را زەلال بكن، د ڕێیا ڕاستییێ دا ئاستەگێن گەلەك مەزنن.
ده‌ما ئالیه‌ک یان ژی که‌سه‌ک به‌حسا ڕاستیا هه‌یە دکه ژی، پرانی ڤێ یه‌کێ نه ڕاست یان ژی نه وه‌ک هه‌لوه‌سته‌ک سیاسی دنرخینن. ئه‌و که‌س یان ئالیێ سیاسی ده‌ما ڕاستیێ دبێژه یا دلێ هه‌موو که‌سایه‌تیێن کو دودلن ژی دبێژه. فه‌رق ئه‌وه کو یه‌ک دوێره بێژه یێ دودل ژی ب ئاوایه‌ک ترسۆنه‌کی سیاسه‌تێ دکه و ل گۆرا خوه دبێژه کو؛ ما گۆتنا ڕاستیێ مایه ب هێڤیا من ڤه.
نها ڕه‌وشا پەکەکێ ژ ئالیێ هه‌ر ئالیه‌ک سیاسی یان ژی که‌سایه‌تته‌ک کو سیاسه‌تێ ڤه مژووله و ڕۆژه‌ڤا سیاسی ل کوردستانێ دشۆپینه تێ زانین. گه‌له‌ک ژ ڤان د جڤاتێن ته‌نگ ده ب توندی پەکەکێ ڕه‌خنه دکن و به‌هسا ڕاستیا پەکەکێ دکن، لێ د ناڤا جڤاکێ دا ژی تشته‌ک دن دبێژن. ئه‌ڤه دورووتیا سیاسیه.
پەکەکە ئێریشێ باشوورێ کوردستانێ دکه. لێ پەکەکە د مه‌دیا خوه دا، دجڤینێن خوه دا و پرۆپاگانده‌یا کو دکه ب وه‌ک ته‌کتیکه‌ک سیاسی به‌هسا ده‌زگه‌هێن یاسایی یێن کوردستانێ ناکه. ئانكو پەکەکە ڕاسته‌راست نه حوکومه‌تا هه‌رێمێ یان ژی سه‌رۆکاتیا کوردستانێ یان ژی پارله‌مه‌نتۆیا کوردستانێ ناکه ئارمانجا ده‌ره‌وێن خوه. لێ پەدەکێ دکه ئارمانج. ئێریشێ پەدەکێ دکه. هه‌لوه‌ستا خوه وه‌ک ناکۆکیا ناڤبه‌را دو ئالیێن سیاسی دا، ئانكو وه‌ک ناکۆکیا پەدەکێ و پەکەکێ دده ناساندن.
گه‌له‌ک ئالیێن سیاسی و تایبه‌تی یێن باکورێ کوردستانێ به‌یانا ده‌رتێخن و داخوویانیا ددن. به‌حسا پاراستنا ده‌ستکه‌فتیێن باشوورێ کوردستانێ دکن. لێ مخابن چ جارا ڕاسته ڕاست نابێژن کی ته‌هدیتا گەلەك مه‌زنه ل سه‌ر ڤان ده‌ستکه‌فتیان. به‌حسا پەکەکێ ناکن، به‌حسا کو پەکەکە ڕێ ل ده‌وله‌تبوونا کوردستانێ دگره ناکن، به‌حسا کو پەکەکە پێشمه‌رگه‌یان شه‌هد دکه ناکن، ئانكو به‌حسا خیانه‌تا پەکەکێ ل باشوورێ کوردستانێ ناکن.
گه‌له‌ک ڤه‌کری به‌حسا ھەبوونا پەکەکێ یا نه یاسایی ل باشوورێ کوردستانێ ناکن. ئه‌ڤ یه‌ک ئه‌ڤ هه‌لوه‌ستا ئالیێن سیاسی یا دوروو دبه سه‌ده‌مێ ئێریشێن پەکەکێ ل دژی پەدەکێ. گه‌له‌ک که‌س كو کینا پەدەکێ د زکێ خوه دا هلتینن. ل گۆرا ڤان که‌سان کی دژمناتیا پەدەکێ بکه ئه‌و دۆستێ وانه. ب ڤێ بێ ئه‌خله‌قیا سیاسی که‌سه‌ک ناگەهه چ ئارماجەكێ.
بالا خوه بدەنێ د ده‌ربارێ ڕه‌وشا باشوور دا و تایبه‌تی د ده‌ربارێ شنگالێ دا ب ده‌هان داخوویانیێن ئالیێن سیاسی ده‌رکه‌تنه. لێ به‌حسا کو، چه‌کدارێن پەکەکێ ل شنگالێ بوونه به‌شه‌ک ژ حه‌شدا شه‌عبی ناکن. ئانكو به‌حسا خیانه‌تا کو ژ ئالیێ پەکەکێ ڤه ل شنگالێ تێ کرن ناکن. نابێژن پەکەکە ڕێ ناده شنگال بکه‌ڤه د بن ئیداره‌یا حوکومه‌تا هه‌رێما کوردستانێ دا. پەکەکە خوه پاراستیه داگیرکه‌رێن به‌غدایێ و هه‌ول دده کو شه‌نگال ژ کوردستانێ ب ته‌مامی ڤه‌قه‌ته.
گه‌لۆ کیژان ئالیێ سیاسی یان ژی سیاسه‌تمه‌داره‌ک ئاقلانه دکاره بێژه کو. هەدەپە، کەجەکە، پەهەدە، کەجەدە، کەنەکە، پەیەدە و هنده‌ک ده‌زگه‌هێن دن نه ڕاسته‌راست گرێدایێ پەکەکێ نه و ناوه‌ندا سیاسه‌تا وان قه‌ندیله؟ ل گۆرا خوه هنده‌ک ئالیێن سیاسی و ئه‌و سیاسه‌تمه‌دارێن کو خوه ئاقلمه‌ند دزانن، پەکەکێ ڕه‌خنه دکن، لێ ل هەدەپێ خوه‌دی ده‌ردکه‌ڤن. ئه‌ڤ نه سیاسه‌ته. ئه‌ڤ نه هه‌لوه‌سته‌ک نشتمانپه‌روه‌ریه.
مه‌دیایا کو گرێدایێ پەدەکێ یە ژی ڤێ چه‌وتیێ دکه، پرۆپاگانده‌یا پەکەکێ دکن و پشتگریا سیاسه‌تا قرێژ ئا پەکەکێ ل هه‌رێما کوردستانێ دکن. مه‌دیایا پەکەکێ ژ بەر هه‌لوه‌ستا ئیسمایل به‌شیکچی یا د ده‌ربارێ باشوورێ کوردستانێ دا ئێریشێ به‌شیکچی دکه. ب توندی به‌شیکچی ته‌هدید دکه. گه‌لۆ چما كەس دەنگ ناكە و ڤان تەھدیتێن پەكەكێ ل سەر بەشیكچی شەرمەزار ناكە؟
سیاسه‌تا دوروو داوییێ دا سه‌رێ خوه‌دیێ خوه دخوه.
2020.12.24
