ژ به‌ری ده‌مه‌کی له‌یلا گوڤه‌ن ژ بۆ “ ته‌جریتا ل سه‌ر عەبدوڵاه ئۆجەلان “رابه، ده‌ست ب گره‌ڤا برچیبوونێ کر. ڤێ چالاکیێ به‌رده‌وام کر. گه‌له‌ک ئه‌ندامێن پارتیا كاركەرێن كوردستانێ (پ ک ک) ێ د گرتیگه‌هان دا ل ده‌رڤه ل ئه‌ورۆپا ب مه‌به‌ستا پشتگریا چالاکیا گوڤه‌ن ده‌ست ب گره‌ڤێن برچیبوونێ کرن. هنده‌ک پارله‌مه‌نته‌رێن هەدەپێ ژی ژ بۆ پشتگریێ ڕۆژه‌ک -دو ڕۆژان گره‌ڤا برچیبوونێ کرن.
د ڤێ ده‌مێ ده ڕۆژا 17ێ ئادارێ ل گرتیگه‌ها باژارێ ته‌کرداگێ زولکوف گه‌زه‌ن خوه دارڤه کر و داوی ل ژیانا خوه ئانی. نها ژی د گرتیگه‌ها باژارێ گه‌بزه‌یێ ده ئایته‌ن به‌چه‌ت ژی خوه دارڤه‌کر و داوی ل ژیانا خوه ئانی.
ژ به‌ری نها ژی ئه‌ڤ فلم هاتیه دیتن، ب ده‌هان که‌سان ژ بۆ ئۆجەلان خوه شه‌وتاندن و داوی ل ژیانا خوه ئانین.
ئه‌ڤه 136 ڕۆژن گوڤه‌ن گره‌ڤا برچیبوونێ دا یه. نها یا گرینگ ئه‌وه کو، گه‌لۆ ده‌ما تو ژ بۆ مه‌رجێن خوه‌شکرنا ژیانا که‌سه‌کی داوی ل ژیانا خوه بینی چ واته‌یا ڤێ چالاکیێ دمینه. ژ ئالیه‌ک دن گه‌لۆ ئۆجەلان ڤێ چالاکیا کو گوایە ژ بۆ وی تێ کرن چه‌وا دبینه.
وه‌ک تێ زانین ژ به‌ری چه‌نده‌کێ برایێ ئۆجەلان سه‌ردانا وی ل ئیمرالی کر و دا خوویاکرن کو ته‌ندورستیا ئۆجەلان باشه و چ پرسگره‌که‌کا وی نینە. ئۆجەلان په‌یامه‌ک ژی، ژ بۆ پکک/هەدەپێ ڕێکربوو. به‌ربپرسێن هدپێ دان خوویاکرن کو ئه‌وێ دێ د ده‌مه‌ک نێزک دا ڤێ په‌یاما ئۆجەلان ئاشکه‌ره بکن. لێ هه‌تا نها ژی به‌ـحسا ناڤه‌رۆکا ڤێ په‌یامێ نه‌کرن و ئاشکه‌ره نه‌کرن.
هنده‌ک چاڤکانیێن د ناڤا هەدەپێ دا دبێژن کو، قه‌ندیل ناهێلە ئه‌ڤ په‌یام بێ ئاشکه‌ره کرن. هه‌روه‌ها قه‌ندیلێ برایێ ئۆجالان ژی، ژ بۆ په‌یامێ ئاشکه‌ره نه‌که، ته‌هدید کریه. ئه‌ڤ یه‌ک چقاسی ڕاسته یان نه ڕاسته نایێ زانین. لێ گه‌له‌ک ئاشکه‌ره‌یه کو قه‌ندیل ناخوازه په‌یاما ئۆجەلان ژ به‌ری هلبژارتنا (ھلبژارتنێن 31 ئادارێ یێن شارەداریان) یان ژی چ جاری بێته ئاشکه‌ره کرن. گه‌له‌ک که‌س ل هێڤیێ بوون کو په‌یاما ئۆجەلان د نه‌ورۆزا دیاربه‌کرێ دا ئاشکه‌ره بکن. لێ نەكرن.
سیاسه‌تا ل سه‌ر ژیانا خه‌لکه‌کی تێ کرن سیاسه‌ته‌ک پریمیتڤ، پاشده‌مایی و ته‌نێ د جڤات و ڕێخستنێن ب دکتاتۆری تێنه ڕێڤه‌برن دا هه‌یه.
پرسه‌ک : گه‌لۆ زولکف گه‌زه‌ن و ئایته‌ن به‌چه‌ت ب ئیرادا خوه ده‌ست ب گره‌ڤا برچیبوونێ کرن؟ ئه‌وان هه‌ر د ڕه‌وشەک ئاسایی دا داوی ل ژیانا خوه ئانین؟ بلا که‌سه‌ک خوه نه‌خاپینه. ژیان نرخه‌که ده‌ما ل سه‌ر ڤی نرخی سیاسه‌ت بێ کرن قرێژ دبه، خراب دبه و چ واته‌یه‌ک وێ یا مرۆڤاتیێ نامینه.
ئایته‌ن 24 سالی بوو، ژ به‌ری چه‌ند ڕۆژه‌کیا دایكا ئایته‌نێ دکرا هه‌وار و قێرین لێ که‌سه‌کی گوھ نه‌دایێ.
دڤێ مالبات ل زارۆکێن خوه خوه‌دی ده‌رکه‌ڤن، ژیانا وان بپارێزن ئه‌و تشتا کو ئه‌ڤ زارۆک ژیانا خوه دکن قوربانی ته‌نێ ژ بۆ دەرمانكرنا هنده‌ک که‌سێن نه‌خوه‌شه.
ئه‌گه‌ر ڕاسته ژ بۆ“ته‌جریت“ ل سه‌ر ئۆجەلان ڕابه ئه‌ڤ گره‌ڤێن برچیبوونێ تێنه کرن، بلا که‌ره‌م بکن، ل قه‌ندیل د سه‌ری دا، جه‌مل بایک، دوران کالکان، موستافا کاراسو، ئال هایدار کایتان، سه‌لاحەدین ده‌مرتاش، سڕ سوره‌یا ئۆنده‌ر، سه‌زا ته‌مه‌ڵ و په‌رون بولدان ده‌ست گره‌ڤا برچیبوونێ بکن. بلا ببن میناك بلا خوه دارڤه بکن، بلا داوییێ ل ژیانا خوه بینن.
نه‌خوه بلا ده‌ڤ ژ له‌یزتکێن ل سه‌ر ژیانا زارۆکێن خه‌لکێ به‌ردن.
