سێگۆشەیا قرێژ
گه‌له‌ک جارا د سیاسه‌تێ دا ب ئاوایه‌ک پسپۆری مرۆڤ کریارێن خوه یێن قرێژ دکاره ڤه‌شێره و ب هۆستایی به‌هسا کریارێن ده‌ردۆرا خوه بکه. مخابن د پرانیا ڕۆژهلاتا ناڤین دا سیاسه‌ت ب ئاوایه‌کێ بێ پره‌نسیب تێ ڕێڤه‌برن. هه‌رکه‌سه‌ک ژ بۆ سه‌رکه‌فتنا خوه هه‌ر ڕێیه‌کی مباح دبینه و سیاسه‌تا خوه ڕێڤه دبه. ل ده‌ردۆرا وی چ دبه ، چ دقه‌ومه نه خه‌مه. ل سه‌ر ڤێ ئاخێ ناڤێ ده‌ره‌وا، سیاسه‌تا بێ پره‌نسپ، دزی و پێوه‌ندیێن قرێژ بوویه ژیربوونی.
ده‌ما به‌هسا سیاسه‌تا قرێژ تێ کرن گه‌لۆ چ تێ بیرا مرۆڤی؟ د ناڤا کوردان دا ئه‌ڤ سیاسه‌تا قرێژ ب چ ئاوایی تێ کرن و ڤێ جوره‌یێ سیاسه‌تێ سه‌رۆکانیا خوه ژ کووڤه ئانیه؟
ل کوردستانا باکور پرانیا سیاسه‌تێ د بن باندۆرا سیاسه‌تا پارتی و ڕێخستنێن ترکیێ دا هاتیه دیزاینکرن. ئانكو د قۆناغه‌کی دا گه‌له‌ک پارتییێن کوردا د بن سها پارتیێن ترکی دا دهاتن دامه‌زراندن و سیاسه‌تا وان ل گۆرا وێ دهات ڕێڤه‌برن.
ل ترکیێ باندۆرا چاندا سیاسی ب گرانی ل سەر کوردا هاتیه کرن. چه‌پتیا ڕێخستنێن کورد ژی چه‌پتیا ده‌ستێ دویه‌م بوو و هه‌تا وه‌ک ئیرۆ ژی مخابن به‌رده‌وامه. ده‌ما ل ترکیێ به‌هسا سیاسه‌تا قرێژ تێ کرن د جھ دا مافیا تێ بیرا مرۆڤی. هه‌روه‌ها د هه‌مان ده‌مێ دا به‌هاسا سێ کوژیا مافیا- ده‌وله‌ت و نارکۆتیکێ تێ کرن. ئه‌ڤ یه‌ک ڕاستیه‌کا سیاسه‌تا ده‌وله‌تا ترکه، و ژ ڕۆژا ڕۆژ هه‌تا وه‌ک ئیرۆ به‌رده‌وامه. ژ خوه ڤێ سێکوژیێ ده‌وله‌تا کوور کو به‌هس ژێ تێ کرن په‌یدا کریه.
مخابن د سیاسه‌تا باکورێ کوردستانێ دا ژی ئه‌ڤ یه‌ک په‌یدا ببوو، هێدی ناڤێ بارۆنێن نارکۆتیکێ یێن کوردا وه‌ک کارسازان دهاتە ڕۆژه‌ڤێ و پێوه‌ندیا ڤان بارۆنێن کورد ل گه‌ل ده‌وله‌تێ گه‌له‌ک ب هێزبوون. پێوه‌ندیه‌کا وان یا تایبه‌ت ل گه‌ل به‌رپرسێن ده‌وله‌تێ هه‌بوو. لێ د هه‌مان ده‌مێ دا ل گه‌ل هنده‌ک ئالیێن کوردا ژی پێوه‌ندی پێکانین و هه‌تا ڕاده‌یه‌کی ئه‌ڤ ڕێخستن ب ناڤێ ھاریکاریێ فینانسه دکران. ژ بۆ ڤێ یه‌کێ ژی ناڤێ وان وه‌ک کارسازێن کورد هاته ڕۆژه‌ڤێ.
سیاسه‌تا کورد ژی پێدڤی ب سیاسه‌تا پاکژ و ب پره‌نسیب هه‌یه. ده‌ما به‌هسا سیاسه‌تا قرێژا یا ده‌وله‌تا ترکیێ تێ کرن، پێوسته هه‌ر ئالیه‌ک سیاسی ل کوردستانێ خوه ژی به‌ر چاڤ را ده‌رباس بکه و ل شاشی و خه‌له‌تیێن خوه مکور وه‌رە دا کو پتر بکاربه باوه‌ریێ ژ خه‌لکی ڕا په‌یدا بکه.
ده‌وسا کو هنده‌ک ئالیێن سیاسی به‌هسا ڕاستیا خوه بکن ، دێ ده‌ڤ ھاڤێژن ده‌ردۆرا خوه و ڕاستیا خوه ڤه‌شێرن. گه‌ره‌کە هه‌ر ئالیه‌ک سیاسی ژ ئالیێ خوه ڤه به‌هسا سیاسه‌تا قرێژ بکه و خوه به‌رب چاڤ را ده‌رباس بکه ، دا کو بزانبه ، ب زانه‌بوون یان نه زانه‌بوون تێکلداریه‌ک ل ڤێ سیاسه‌تا قرێژ بوویه یان نا.
بێ گومان ده‌ما به‌هسا ڤێ یه‌کێ دکم، نه واته‌یا کو هنده‌ک ئالیێن سیاسی تاوانبار دکم. ئه‌ز دخوازم ته‌نێ هه‌ر ئالیه‌ک ڕاستیا خوه بزانه و ل گه‌ل ڕایا گشتی پارڤه‌که.
د ڕاستیا خوه دا چقاس سیاسه‌تا قرێژ هه‌یە، ئه‌وقاس ژی سیاسته‌ک پاکژ ، شه‌فاف و خوه‌دی پره‌نسیب هه‌یه. لێ سیاسه‌تا قرێژا کو ده‌زگه‌هێن تاری و مافیا باندۆرا خوه لێ کری ژی د ناڤا کوردان دا ڕاستیه‌که. ژ خوه ئه‌ڤ ڕاستیه کو، ناڤێ بارۆنێن ھێرۆنێ وه‌ک کارسازێن کورد دده ناساندن.
مرۆڤ به‌هسا ڕاستیا خوه بکه نه کێماسیه. لێ ڤه‌شارتنا ڕاستیان وه‌ک تاوانه‌ک ئه‌خلاقی د هه‌ر قۆناغێ دا دکاره ده‌رکه‌ڤه پێشیا مرۆڤی.
