سەردانا نێچیرڤان بارزانی بۆ تەهرانێ دەستکەفتەکە دن یا دیپلۆماسیا هەرێما کوردستانێ

بلندکرنا ئالا کوردستانێ و ب باكه‌تنا وی ل تەهرانا پایته‌ختا ئیرانییان دا، یەکەم ئیشارەت بوو ئیسبات کر کو سەرۆکێ هەرێما کوردستانێ ب هه‌لوه‌سته‌كه‌ بهێز سەردانا تەهرانێ دکە و مژارێن جڤینان ژی ئه‌ڤ یه‌ك ئیسبات کر. ئەم هەموو دزانن کو ئیرانێ چو جاران چاڤ ب پێشکەفتنێن کوردستانێ ب گشتی و هەرێما کوردستانێ ب تایبەتی نارابن و هەرتم هەول دایە کو تاكه‌ حکومەتا کوردستانێ یا رەوا بکە ئیتاعەتکارا خوە و ژ بۆ ڤێ مەبەستێ ژی دودلی نەکریە کو هەر تاوانەکێ بکە. ئێریشێن مووشەکی یێن ل سەر هەولێرا پایتەخت، شەهیدکرنا کەچەکە کوردا 11 مەهی و ئارمانجکرنا ناڤەندێن ژێرخانەیی و ئابۆری یێن کوردستانێ ژ ئالیێ ملیسێن وێ یێن كرێگرتی ڤه‌، میناکێن زەلالن کو نیەتا دژمنكارییا ئیرانییان ل هەمبەر کوردستانێ پشتراست دکن.

شاشیا رژێما تەهرانێ ژی وەک هەموو داگیرکەرێن دن یێن کوردستانێ ئەو بوو کو ب وێ یەکێ باوەر دکر کو ب بۆمبەبارانکرنا کوردستانێ و فشارەکە بەرفرەها ئابۆری ل سەر کوردستانێ، دکارە حکومەتا هەرێما کوردستانێ بندەست بکە و سەرکردەیێن کورد ژی بکە ئیتاعەتكارێن تەهرانێ. لێ وەک هەر جار ئیرادەیا کوردستانێ و سەرکردەیێن وێ ژ زەختێن رژێما ئیرانێ گەلەک بهێزترە. د داویێ دا، رژێما تەهرانێ نه‌چار ما د وێ یه‌كێ بگه‌هه‌ كو هه‌ولێر پێگه‌هه‌كی گرنگ و راستیه‌كه‌ سیاسی یا بهێزه‌ و نایێ ئینكار كرن.

رایەدارێن ئیرانێ ل هەمبەری ڤین و بەرخوەدانا حکومەتا باشوورێ کوردستانێ جارەکە دن نەچار مان سیاسه‌تا كو ژێ را دبێژن «نەرمبوونا لەهەنگیێ» بکن.

ڤەخوەندنا فەرمی یا سەرۆکێ هەرێما کوردستانێ ژ بۆ تەهرانێ و هەڤدیتنا ب خامنەیی را – ب ل به‌رچاڤوه‌رگرتنا وێ یه‌كێ كو «رێبه‌رێ ئۆلی یێ تەهرانێ ناخوازە ب هەر کەسی را هەڤدیتنێ بکە» نیشانا وێ چه‌ندێ یه‌ ئیران نەچار بوویە وێ راستیێ قەبوول بکە کو ئیرادەیا سەروەریخوازێن گەلێ کوردە ل باشوورێ كوردستانێ ژ هه‌ولێن وێ و ملیسێن وێ یێن تێكدانا هه‌رێما كوردستانێ و لاوازكرنا حكومه‌تا وێ بهێزتره‌، ب گۆتنه‌كه‌ دن ژ بۆی ته‌هرانێ ده‌ركه‌ت هۆلێ كو ده‌ما كوردستان دبێژه‌ ته‌سلیم نابم، ئه‌ڤ نه‌ ته‌نێ سلۆگانه‌كه‌ د ئاڤێژه‌ به‌لكو ب كریار جی ب جی دكه‌.

بەلگەیەکە دن ژی کو شاندا هەرێما کوردستانێ ب ئاوایەکی بهێز سەردانا تەهرانێ کریە، ئەوە کو سەرۆکێ هەرێما کوردستانێ ب ئەشکەرە و د دلێ تەهرانێ دا بەحسا ئاساییش و ئارامیا هەرێما کوردستانێ و ئیراق و هەرێما کوردستانێ دکە. هەلبەت گهاندنا ڤێ پەیامێ ژ بۆ ئیرانیان تەنێ ژ هەبوونا هێزێ تێ. ئەڤێ ژی پەیامه‌ك زەلال تێ دا یه‌ کو «ئیران چاڤکانیا بێئەولەهی و بێئیستیقرارێ یە ل ئیراق و هەرێما کوردستانێ». هەلبەت گهاندنا ڤێ پەیامێ ژ بۆ ئیرانیان تەنێ ژ هەبوونا هێزێ تێ.

چاڤکانیێن هێزا هەولێر و هەرێما کوردستانێ

مە ژ بیر نەکریە کو پشتی راوەستاندنا فرۆتنا پەترۆلا هەرێما کوردستانێ، بریارێن دژمنانەیێن دادگەها فەدەرالی یا ئیراقێ، راوەستاندنا بوودجە و مووچەیێن هەرێما کوردستانێ، مووشه‌كبارانكرنا هەولێرا پایتەختێ و…هتد،  دژمنێن کوردان و كۆله‌یێن وان خەونا وێرانبوون و نه‌مانا ستاتۆیا سیاسی و نەتەوی یا هەرێما کوردستانێ ددیتن، هندەک شۆڤەنیستێن عەرەب ژی د مەدیایێ دا پەیڤا «هەرێما کوردستانێ یا بەرێ» بکار ئانین. لێ ب سایا سیاسەتا ژیر و ئاقلانە یا سەرکردەیێن هەرێما کوردستانێ و هەولێن وان یێن دیپلۆماتیک، ئەڤ خەونا قرێژ بوو بلقا ل سەر ئاڤێ، کو مرۆڤ دکارە سەردانا سەرۆکوەزیرێ هەرێما کوردستانێ مه‌سروور بارزانی بۆ ئەمریکایێ. وەک میناکەکە بەربچاڤا ڤێ تێکۆشینا دیپلۆماتیک حه‌ساب بكین.

سۆدوه‌رگرتنا هەرێما کوردستانێ ژ ناکۆکیێن د ناڤبەرا ترکیە و ئیرانێ دا و بكارئانینا ڤێ ژ بۆی خزمەتا پرسگرێکا کورد و بهێزکرنا پێگەها هەولێرێ، میناكه‌كه‌ دنه‌ ژ لێزانی و زیرەکیا سیاسی و دیپلۆماسی یا سەرکردەیێن هەرێما کوردستانێ، لۆما پێشوازیا بێمیناکا ئیرانێ ژ سەرۆکێ هەرێما کوردستانێ ژی را، دکارە وەکە بەرتەکا ل هەمبەر سەردانا ئەردۆگان یا ژ بۆی پایتەختا کوردستانێ هەولێرێ وەرە شیرۆڤەکرن.

پەیاما سەردانێ ژ بۆ کوردان

خورتبوونا پێگەها هەولێرێ د دەمەکێ دا یە کو مخابن د ناڤا کوردستانێ دا هندەک دەنگێن خه‌راب هەنە کو ل شوونا کو خوە بسپێرن ئیرادەیا گەلێ کورد، ل هێڤیا خێره‌كێ نه‌ ژ داگیرکەرێن کوردستانێ. ب گۆتنەکە دن، ئەگەر ئەڤ ئالی ل شوونا کو هه‌ولا تێكدانا ناڤ مالا کوردان بكن، پشتگریا سەرکردە و حکومەتا خوە یا کورد بکن، هەرێما کوردستانێ دێ ده‌رفه‌تا وێ چه‌ندێ هه‌به‌ كو بهێزتر ژی ببە.

دڤێ هەموو کورد ب پێگه‌ها سیاسی و دیپلۆماتیک یا ته‌كانه‌ حکومەتا خوە یا رەوا و نەتەوی شاناز و سەربلند بن و زەختێ ل ئالیێن ژ رێ ده‌ركه‌تی بکن کو ڤەگەرن سەر خەتا نەتەوی و ل شوونا دژمناتیا حکومەتا هەرێما کوردستانێ بكن، ئەنەرژیا خوە ژ بۆ سەرکەفتن، ئاشتی و گەشەپێدانا کوردستانێ بکار بینن.

دارکامازی