ھندی مە مێژویا مللەتان خواندی و بو مە ھاتیە ڤەگێران و مە ب چاڤ دیتی، یاسا سەروەرە و ھەر كەسێ زێدەگاڤیان بكە، دز و گەندەل بە، یاسا لێپێچینێ د گەل دا دكە، ب تەنێ ئەو نەبە ئەڤێ خوە ژ یاسایێ ڤەدزە، ئانكو یاسا ل دەف وان سەروەرە و مافێ ھەڤوەلاتیبوونێ یێ پاراستیە و ژ پێخەمەت ھەمی تشتەك باش پرێڤە بچن و كەس ژ دەرڤەیی یاسایێ نەمینە و رێ ل دز و گەندەل و مافیان بھێتە گرتنێ، دیڤچوون ل سەر بچوكترین تشت دھێتە كرن.
بەلێ ژ قەدەرا مە، ل جەم مەژی ل هەرێما کوردستانێ، د ماوەێ ڤان بیست و هەشت سالێن دەربازبوویی دا بەروڤاژی ڤێ چەندێ یە. ئانکو خەلك و هەڤوەلاتیێن بێ ماف و بێ دەستهەلات، ژ کریارێن نەهنگێن دز و گەندەلکاران د ترسن، نە ژ یاسایێ.
لەورا ئەڤرو نە دادی و نە وەكھەڤی د ھەمی واران دا دھێتە دیتن، ھەڤوەلاتی ھەست دكە كو مافێن وی دھێنە خوارن و جوداھیەك د ناڤبەرا وی و كەسەكێ دی دا ھەیە.
هەلبەت ئەو ژی ڤەدگەرە ژ بۆ دەستهەلاتا کوردی و دڤێت ھەر چ زوویە یاسا رولێ خوە ب دروستاھی بگێرە و یاسا سەروەر بە و دەستھەلاتا دادوەریێ یا سەربەخوە بە و داواكارێ گشتی ب رولێ خوە یێ دروست رابە و كەس خوە ژ یاسایێ بلندتر نەبینە، ئێكانە دەربازبوونا مە ژی دڤێت ھەر ئەڤ چەندە بە كو خەلك ژ یاسایێ بترسن نەك ژ دز و گەندەلان.
زەنون سلێڤانەیی ـ زاخۆ
2020.09.15
