سه‌رۆککۆمارێ ئیراقێ به‌رهه‌م سالح د ده‌ما جڤینا خوه یا دگەل پاپایێ ڤاتیکانێ گۆتبوو کو باژارێ قه‌ره‌قووشێ کو ژ ئالیێ داعشێ ڤه هاتبوو داگیرکرن، ژ ئالیێ هێزێن ئیراقی ڤه هاتیه ڕزگارکرن و هێزێن ئیراقی ژی خاچا سه‌ر کلیسه‌یێ بلند کرنه.
ئه‌ڤ گۆتنێن به‌رهه‌م سالح کو به‌روڤاژی ڕاستیانن، ژ ئالیێ گه‌لێ کوردستانێ، خەلكێ ده‌ڤه‌رێ و هێزێن پێشمه‌رگه‌یێ كوردستانێ ڤه ژی هاتن ڕه‌خنه‌کرن.
به‌ریا هه‌ر که‌سه‌کی خەلكێ ده‌ڤه‌رێ دیار کرنه کو وان ب چاڤێن خوه دیتنه کو هێزێن پێشمه‌رگه یێن کوردستانێ باژارێ قه‌ره‌قووشێ کو ناڤه‌نده‌کا سه‌ره‌کی یا مه‌سیحیانه، ژ ده‌ستێ ته‌رۆریستێن داعشێ ڕزگارکرنه و هه‌ر هێزێن پێشمه‌رگه بوون کو خاچا کلیسه‌یێ ژی بلند کرن.
هه‌روها گه‌لێ کورد و هێزێن پێشمه‌رگه ژی ژبه‌ر گۆتنێن به‌رهه‌م سالح دلگرانن و دبێژن نابه سه‌رۆککۆمارێ ئیراقێ ڕاستیان به‌روڤاژی بکه ژبه‌ر کو دنیا دزانه كا کێ قه‌ره‌قووش ڕزگار کریه و کێ خاچا سه‌ر کلیسه‌یێ یاکو ژ ئالیێ ته‌رۆریستان ڤه هاتبوو داخستن، بلند کرنه و خستنه جهێ وێ.
هه‌روها هێزێن پێشمه‌رگه ژی دبێژن کو ئه‌ڤ گۆتن دوورن ژ ڕاستیێ ژبه‌ر کو تۆمارێن دیرۆکی دیار و به‌رچاڤن و د ناڤا وان تۆماران دا دیاره كا کێ قه‌ره‌قووش ڕزگار کریه و کێ خاچا کلیسه‌یێ ل سەر بانێ دێر بلند كەیەو ناقۆسا پێژڤەژیانێ لێدایە.
دھاتە چاڤەرێكرن كو سەرۆكۆمارێ ئیراقێ یێ كورد، بەرھەم سالح، د ئاخاڤتنا خوە دا بەحسا رۆلا مێرخاسانە یا پێشمەرگەیێ كوردستانێ د شەرێ دژی داعشێ دا بكە كو پێشمەرگە بوو ژ پێش ھەموو جیھانێ ڤە شەرێ داعشێ كر و تەرۆرستێن داعشێ تێكشكاندن. ئەڤ دەلیڤەیەك زێرین بوو، لێ مخابن سەرۆكۆمارێ كورد یێ ئیراقێ گەلێ كورد خەیالشكەستی كر و ب پەیڤەكێ ژی بەحسا رۆلا پێشمەرگەیێ كوردستانێ نەكر.
گەلەك جاران دەما بەرپرسێن ئیراقێ د ئاخاڤتنێن خوە دا ئیھمالا رۆلا پێشمەرگەیێ دكن، كورد خوە ھێرس دكن و رەخنەیا ل وان بەرپرسێن ئیراقێ یێن عەرەب دگرن. لێ مخابن ئەڤە بلندتریین بەرپرسێ ئیراقێ، سەرۆككۆمارێ كو كوردە، نە ب تەنێ بەحسا رۆلا پێشمەرگەیێ كوردستانێ نەكر، لێ مخابن راستیا بوویەرێ ژی بەرڤاژی كر.
