نڤیسار

سەرۆكەك ب ھێز حكومەتەك ب ھێز

دڤێ ئه‌م بزانبن کو وه‌لاته‌ک ب سایا سه‌رێ سه‌رۆکه‌ک خوه‌دی قوه‌ت و زانا، ب سایا حوکومه‌ته‌کا ب هێز و چالاک ب پێشڤه‌ دکه‌ڤه‌.
له‌ورا ژی نها هوون دێ شاهدێ وێ یه‌کێ بن کو ب دامه‌زراندنا حوکومه‌تا ڕێزدار مه‌سروور بارزانی و ب سه‌رۆکوه‌زیریا ڤێ حوکومه‌تا ب هێز ئه‌م دێ ب له‌ز گاڤێن به‌رب سه‌رخوه‌بوونێ باڤێژن و ب هه‌لوه‌ستێن کورده‌واری دێ ئێدی پێشی ل که‌سێن خوه‌ و وه‌لاتێ خوه‌ دفرۆشن بێ گرتن. ئێدی باوه‌ر ناکم ئه‌و که‌سێن ژ بۆنا داگیرکه‌ران کار دکن، ژ نها و پێده‌ ل گۆر کێفا خوه‌ ل سه‌ر عه‌ردا کوردستانا پیرۆز هه‌سپێن خوه‌ بدن به‌زێ…

شه‌خسیه‌تێن خوه‌دی هێز و ب قوه‌ت ژی ل گۆر وێ هێز و قوه‌تا خوه‌ حوکومه‌تا خوه‌ د دامه‌زرینه‌ دا کو بکاربه‌ ب هه‌ڤرا ل سه‌ر خه‌تا نه‌ته‌وه‌یی وه‌لاتێ خوه‌ ئاڤادان بکن، ده‌مۆکراسیا ژ گه‌لی وی ڕا لازمه‌ ب پێش ڤه‌ ببه‌.

ژ ڕۆژا بارزانیان ده‌ستاڤێتن چه‌کا ژ بۆنا ئازادی و سه‌رخوه‌بوونا کوردستانێ و هه‌تا نها قه‌ت سه‌کن ل وان نه‌بوو یه‌. ده‌رد، ئێش، ئارمانج و هه‌ده‌فا وان تم بوویه‌ ل گۆر ڕێبازا بارزانیێ نه‌مر، ل سه‌ر خه‌تا نه‌ته‌وه‌یی ئەڤ ته‌کۆشین دۆماندنه‌، ددۆمینن و وێ بدۆمینن هه‌تا کو کوردستانا مه‌زن بێ دامه‌زراندن.
ژ بۆنا ڤان خه‌باتێن بارزانیان هه‌ر ده‌م داگیرکه‌رێن مه‌ ژی ڕانه‌زانن، ژ بۆنا تێکبرن و ژناڤبرنا بارزانیان کار و خه‌بات کرنه‌، لێ ب سه‌ر نه‌کتنه‌ و وێ چ جاران ژی ب سه‌ر نه‌که‌ڤن.
دژمن هه‌ر دژمنه‌. ئه‌و تم کارێ خوه‌ دکن دا کو کورد نه‌گهێژن ئازادی و سه‌رخوه‌بوونا خوه‌. ئه‌ڤ بێمنه‌تی یه‌. ژ به‌ر کو دژمنه‌.
لێ یا خه‌ته‌ر و ته‌حەمولا وێ نایێ قه‌بوولکرن، هندەك کوردێن کو ئه‌و ژی ل گۆر ئارمانجا داگیرکه‌ران ته‌ڤدگه‌رن و ل گۆر گۆتنا داگیرکه‌ران دکارن ب ڕه‌حه‌تی خه‌نجه‌را ژەهری ل پشتا بارزانیان بخن دا کو ئه‌و کوردستانه‌که‌ سه‌ربخوه‌ ڕانه‌گهینن. هه‌تا نها کارێ داگیرکه‌ران و هه‌ڤالبه‌ندێن وان یێن کورد ئه‌و بوویه‌ کو خه‌باتێن بارزانیان یێن نه‌ته‌وه‌یی و ژ بۆنا دامه‌زراندنا کوردستانه‌که‌ سه‌ربخوه‌ تێک ببن.

لێ کارێ بارزانیان ژی هه‌ر ئه‌و بوویه‌ کو ژ بۆنا مه‌ کوردان کوردستانه‌که‌ سه‌ربخوه‌ ڕاگەهینن، ژ بۆنا وێ ژی هه‌ر ل سه‌ر خه‌تا نه‌ته‌وه‌یی ل گۆر ڕێبازا پیرۆز یا بارزانیێ نه‌مر کارێ خوه‌، ته‌کۆشینا خوه‌ و به‌رخوه‌دانێن خوه‌ ڕانه‌وه‌ستاندنن.
ئه‌ڤ کار و خه‌باتێن وان، ئه‌م ئانینا مه‌رحه‌له‌یا کو نها گاڤێن به‌رب سه‌رخوه‌بوونێ تێنه‌ ئاڤێتن. گاڤێن سه‌رخوه‌بوونێ ژی ب که‌سایه‌تیێن وێره‌ک، خوه‌دی قوه‌ت ل سه‌ر خه‌تا نه‌ته‌وه‌یی پێک تێ.

له‌ورا نها ب دامه‌زراندنا حوکومه‌تا نوو یا ب سه‌رۆکوه‌زیرتیا ڕێزدار مه‌سروور بارزانی دێ کورد ب ئاوایه‌کی زیندی، هه‌بوون و پاراستنا عه‌ردا خوه‌ و خه‌لکێ خوه‌ ل گۆر باوه‌ری و قانوونێن ناڤنه‌ته‌وه‌یی بکن و بپارێزن.

ل چ وه‌لاتێن ڤێ جیهانێ، که‌سێن وه‌لاتێ خوه‌ فرۆتنه‌، ل با دژمن ژ بۆنا په‌رچه‌کرنا عه‌ردا خوه‌ و کوشتنا برایێ خوه‌ کار کربوون و دکن، بێ جه‌زا نه‌مانه‌ نامینن ژی…
ئێدی کورد ژی گهانە وێ قۆناغێ کو تشتان ژ هه‌ڤ ڤه‌قه‌تینه‌ و بزانبن کو د ناڤبێرا ڕه‌ش و سپی ده‌ گه‌له‌ک ڕه‌نگێن دن ژی هه‌نه‌.

هه‌ر چقاسی هه‌تا نها هنان ل گۆر کێفا خوه‌ کوردستان ژ بۆنا به‌رژه‌وه‌ندیا خوه‌ فرۆتبن، خائینتی کربن، ل سه‌ر خه‌تا جاشتیێ مه‌زن بوو بوون ژی ئێدی وێ پێشی ل که‌سێن وه‌ها بێ گرتن.

حوکومه‌تا نوو یا ب سه‌رۆکوه‌زیرتیا ڕێزدار مه‌سروور بارزانی دێ ب ئاوه‌یه‌کی ده‌مۆکرات، ل گۆر ده‌ستوور و به‌رنامه‌یێن ناڤنه‌ته‌وه‌یی و ل گۆر شه‌رتێ وه‌لاتێ خوه‌ کارێ خوه‌ بکن. حوکومه‌تا خوه‌ ب هێز بکن، ئه‌ڤ حوکومه‌ت وێ ببه‌ پێشیلێگرتنا هه‌می خه‌رابی و نه‌باشیێن ل دژ دۆزا کورد و کوردستانێ. د ئەنجاما ڤان خه‌باتان دا، خه‌یال دبن ڕاستی
مه‌ کوردان ئه‌ڤ زێده‌یی سه‌د سالانه‌ ته‌نێ مه‌ خه‌یال دکر کو کوردستانێ دێ ڕۆژه‌کێ بگهێژه‌ سه‌رخوه‌بوونا خوه‌.

مه‌ ته‌نێ خه‌یال دکر کو ئه‌ڤ مله‌تێ مه‌ یێ مازلوم وێ ڕۆژه‌کێ بگهێژه‌ ئازادیا خوه‌
ئه‌م هه‌ر د وێ خه‌یالێ دا دژیان کو وێ چ ده‌مێ کورد دێ ببن خوه‌دی ده‌وله‌تا خوه‌
هه‌ر کورد دفکرین کو وێ چاوا ژ کۆمکوژیان، ژ کوشتنێ ئازاد ببن.

ئاها که‌ره‌م بکن به‌رسیڤا ڤانا ته‌ڤدا د ڕێبازا بارزانی و ب سایا بارازانیا کو ل سه‌ر کۆکا خوه‌، ل گۆر ده‌ستوور و به‌رنامه‌یا ڕێبازا بارزانی ته‌ڤگه‌ریانن. ب ڤێ ته‌ڤگه‌رێ کوردان دکن خوه‌دی ده‌وله‌ت، کوردستانه‌که‌ سه‌ربخوه‌ دێ دامه‌زرینن و وێ کوردان ژ بێ ده‌وله‌تیێ ڕزگار بکن، وێ ئالا کوردستانێ د قادا ناڤنه‌ته‌وی و د ناڤ ئالێن جهانێ ده‌ کل بکن.
سپاس ژ وه‌ ڕه‌ ئه‌ی بارزانیێن ل سه‌ر ڕێبازا بارزانیێ نه‌مر.

د کار و ئه‌رکێ ته‌ یێ نوو دا سه‌رکه‌تن ژ ته‌ ڕا دخوازم سه‌رۆکێ هه‌رێما کوردستانێ ڕێزدار نێچیرڤان بارزانی.

پیرۆز به‌ ئه‌رکێ ته‌ یێ نوو سه‌رۆکوه‌زیرێ کوردستانێ، ڕێزدار مه‌سروور بارزانی
تو هه‌ر ته‌مه‌ن درێژ به‌، ڕێزدار مه‌سعود بارزانی کو ڤان به‌رهه‌مانا ژ به‌ر خه‌بات، زانیاری و دلسۆزیا وه‌ دبه‌ پارا کوردان.

سپاس ژ بۆنا سه‌رۆکێ نه‌ته‌وه‌یی م.مسته‌فا بارزانی یێ نه‌مر کو ژ مه‌ کوردان ڕا، ڕێ و ڕێبازه‌ک دانی.

بوبێ ئەسەر

2019.06.12

Back to top button