سیاسی

سەرۆکاتیا هەرێما کوردستانێ بانگ ل هێزێن سیاسی

سه‌رۆکاتیا هه‌رێما کوردستانێ د داخویانیه‌کێ دا دبێژه‌ کو ئه‌و پێشوازیێ ل سه‌ردانا ڤێ داویێ یا شانده‌یا ئەمریکایێ یا ب سه‌رۆکاتیا برێت مەکگورک نوونه‌رێ سه‌رۆکێ ئەمریکایێ بۆ کارووبارێن رۆژهلاتا ناڤین و باکورێ ئافریکایێ دکه‌.

سه‌رۆکاتیا هه‌رێما کوردستانێ، هه‌روه‌سا د داخویانیا خوه‌ دا، بانگ ل هه‌موو هێزێن سیاسی دکه‌ کو ناکۆکیێن خوه‌ ده‌ینن ئالیه‌کی و پرسگرێکێن خوه‌ ب دیالۆگ و لهه‌ڤکرنێ چاره‌سه‌ر بکن و هه‌موو ب به‌رپرسیاری ته‌ڤبگه‌رن و دبێژه‌: “یا کو مه‌ دکه‌ یه‌ک و ل هه‌ڤ دجڤینه‌ ژ یا کو مه‌ ژ هه‌ڤ ڤه‌دقه‌تینه‌ پر مه‌زنتره‌”.

داخویانیا سه‌رۆکاتیا هه‌رێما کوردستانێ:

سه‌رۆکاتیا هه‌رێما کوردستانێ پێشوازیێ ل سه‌ردانا ڤێ داویێ یا شانده‌یا حکومه‌تا ئەمریکایێ ب سه‌رۆکاتیا برێز برێت مەکگورک نوونه‌رێ سه‌رۆکێ ئەمریکایێ یێ کارووبارێن رۆژهلاتا ناڤین و باکورێ ئەفریقایێ و ئامۆس هۆکسته‌ن نوونه‌رێ سه‌رۆکێ ئەمریکایێ یێ کارووبارێن ژێرخانا جیهانی و ئه‌وله‌هیا ئه‌نه‌رژیێ دکه‌.

ئه‌م پێداگری و پشته‌ڤانیا خوه‌ ژ بۆ پێوه‌ندییەک بهێز و به‌رهه‌مدار یا د ناڤبه‌را ئیراق و هه‌رێما کوردستانێ دگه‌ل حکومه‌تا ئەمریکایێ ل سه‌ر بنگه‌ها رێکه‌فتنا چارچۆڤه‌یا ستراته‌ژیک جاره‌کا دن دوپات دکن.

هه‌رێما کوردستانێ ل پێشبه‌ری ره‌وشه‌ک نه‌دیار و چه‌ندین پرسگرێکان دایه‌. ئیرۆ ژ هه‌ر ده‌مێ زێده‌تر پێویستییا مه‌ ب یه‌کرێزی و هه‌ڤکاریا ناڤبه‌را هه‌موو ئالیان دا هه‌یه‌، ب تایبه‌تی د ناڤبه‌را پارتیا ده‌مۆکراتا کوردستانێ (پەدەکە) و یه‌کیتیا نشتمانیا کوردستانێ (یەنەکە) کو ب هه‌ڤ را پاشه‌رۆژا ڤێ هه‌رێمێ د ده‌ستێ وان دایه‌.

ئه‌م بانگ ل هه‌موو هێزێن سیاسی دکن کو ناکۆکیێن خوه‌ ده‌ینن ئالیه‌کی و پرسگرێکێن خوه‌ ب دیالۆگ و لهه‌ڤکرنێ ب سینگه‌ک به‌رفره‌ چاره‌سه‌ر بکن. یا کو مه‌ دکه‌ یه‌ک و ل هه‌ڤ دجڤینه‌ ژ یا کو مه‌ ژ هه‌ڤ ڤه‌دقه‌تینه‌ پر مه‌زنتره‌. ژ بۆنا کو ئه‌م بکاربن جاره‌کا دن ئارامی و یه‌کرێزیێ ڤه‌گه‌رینن، ژ بۆنا کو ئه‌م بکاربن به‌رژه‌وه‌ندیێن وه‌لاتیێن هه‌رێما کوردستانێ بپارێزن و پێشبخن، دڤێ ئه‌م هه‌موو ب به‌رپرسیاری ته‌ڤبگه‌رن.

هه‌ر وها ئه‌م پێشوازیێ ل پێشکه‌فتنێن به‌رده‌وام یێن چاره‌سه‌رکرنا پرسگرێکێن د ناڤبه‌را حکومه‌تا فه‌ده‌رال یا ئیراقێ و حکومه‌تا هه‌رێما کوردستانێ دا دکن. ته‌ڤی زه‌حمه‌تیێن به‌رێ، لێ ئه‌م گه‌شبینن کو د چارچۆڤه‌یا ده‌ستوورا ئیراقێ دا، ئه‌م دکارن پرسگرێکێن هێلاویستی دگه‌ل سه‌رۆکوه‌زیر محه‌مه‌د شیاع سوودانی و کابینه‌یا وی چاره‌سه‌ر بکن.

سه‌رۆکایتیا هه‌رێما کوردستانێ
٢٠٢٣/١/١٨

Back to top button