سەرۆکوەزیرێ کوردستانێ مەسرور بارزانی د پەیامەکێ دا بێدەنگی شکاند و رەوشا هەیە و ب تایبەتی ئەگەرێن سەرهلدانان کریزا دارایی ل دەڤەرا سلێمانیێ ب هووری زەلال کر.
ئەڤ ل ژێر تێکستا پەیاما سەرۆکوەزیر:
هه‌ڤوه‌لاتیێن هێژا
من و کابینه‌یا من ل پێشبه‌ری پەرلەمه‌نتۆیا کوردستانێ و وه یێن خوه‌شتڤی سۆند خواریه کو ژ بۆ به‌رژه‌وه‌ندیێن بالا یێن گه‌ل و وه‌لاتی کار بکین و قه‌واره‌یێ ده‌ستووری یێ هه‌رێما کوردستانێ بپارێزین. هه‌ر ژ به‌ر ڤێ یه‌کێ ژی هه‌ر ژ ده‌ستپێکا ڤێ کابینه‌یێ ئه‌م وسا رێکه‌فتین کو شوونوارێن دوئیدره‌ییێ نه‌هێلین و بریارێن حکومه‌تێ، ل سه‌رتاسه‌ری هه‌رێما کوردستانێ، ب یه‌ک ئاوایی جیبجی ببن.
چێنابە ل چو به‌شێ هه‌رێما کوردستانێ، بریارێن حزبی یان تاکه‌که‌سی، رێ ل پێشیا جیبجیکرنا بریارێن حکومه‌تێ بگرن. ئه‌ز ب ئاوایه‌کی وه‌کهه‌ڤی ل ته‌ڤایا هه‌رێما کوردستانێ مێزه دکم و ل هه‌مبه‌ر هه‌موو هه‌ڤوه‌لاتیێن هه‌رێما کوردستانێ، هه‌موو پارێزگه و ئیداره‌یێن سه‌ربخوه خوه ب به‌رپرسیار دبینم. لێ مخابن، رێگری تێ کرن و ئاسته‌نگ ژ بۆ حکومەتا هه‌رێمێ تێن دروست کرن کو، ڤێ ژی زیان ب ژیان و ژیارا هه‌ڤوه‌لاتیان گەهاندیه.
نێزیکی دو سالانه، پرسگرێکێن کۆمکرنا داهات و نه‌بوونا دراڤی د بانکایێن سینۆرێ؛ سلێمانی، گه‌رمیان، هه‌له‌بجه و راپه‌رین هه‌یه. مه ئه‌ڤ پرسگرێک شۆپاندیه و کۆمیته‌یه‌ک ژ وه‌زاره‌تا دارایی و ناڤخوه ژ بۆنا شۆپاندنا ڤێ پرسگرێکێ پێکانی، لێ ئه‌ساسێ ڤێ پرسگرێکێ ئه‌ڤه کو هندەک که‌س و ئالی ژ بۆ به‌رژه‌وه‌ندیێن خوه، د پرۆسه‌سا کۆمکرنا داهاتیێ وێ ده‌ڤه‌رێ دا موداخه‌له دکن. ژ به‌ر هندێ هه‌ر ئه‌و که‌س و ئالی ژ زیان و زرارێن ب وه‌لاتیان و سازیێن حوکومه‌تێ دگەهن، به‌رپرسیارن.
شه‌فافیه‌ت ئه‌ڤه کو حوکومه‌ت بخوه چاڤدێریێ ل سه‌ر ته‌ڤاهیا پرۆسه‌سا کۆمکرنا داهاتان بکه، نه ب ته‌نێ هایداری وێ پشکێ یا ژ بۆ حکو=ومه‌تێ تێ ڤه‌قه‌تاندن به. د ده‌ستپێکا ڤێ کابینه‌یێ دا، مه هه‌ول دا کو داهاتێن هه‌رێمێ ژ نوو ڤه رێکبخین و هه‌تا ئاسته‌ک باش د ڤی واری دا سه‌رکه‌فتی بوویین و هه‌ر ژ به‌ر ڤێ یه‌کێ، مه کاری قۆناغا دژوارا بێداهاتیێ ل ده‌ستپێکا په‌یدابوونا پانده‌میا کۆرۆنایێ ده‌رباس بکین.
هه‌ڤوه‌لاتیێن هێژا
ئه‌ڤ ده‌مه‌که ژ ئالیێ سازیێن یه‌کیتیا نشتمانی یا کوردستانێ (ینک) کو هه‌ڤکارێن سه‌ره‌که یێن ڤێ کابینه‌یێ نه، وسا ددن خویاکرن کو ئامبارگۆ ل سه‌ر سینۆرێ سلێمانیێ هه‌یه. هه‌موو شاره‌زایێن ره‌وشا دارایی یا هه‌رێمێ دزانن کو داهاتێن نه‌فتێ و هه‌روه‌سا ئه‌و به‌شه بودجه‌یا جار-جاران ژ به‌غدایێ تێ، ب ئاوایه‌کی وه‌کهه‌ڤ هاتیه دابه‌ش کرن و مووچه‌یێن کارمه‌ندان پێ هاتنه دایین، لێ یا کو جهێ هه‌لوه‌ستوه‌رگرتنێ یه، داهاتێ نه‌نه‌فتی یێ ناڤخوه‌یا هه‌رێمێ یه کو به‌شه‌ک مه‌زن ژێ داهاتێ ده‌ریێن سینۆری یه، لێ مخابن، رێ نه‌هاتیه دان کو د ڤی واری دا داهاتیێ سلێمانی، گه‌رمیان، هه‌له‌بجه و راپه‌رین بێ رێکخستن، ژ به‌ر هندێ سه‌رکردایه‌تیا یەنەکێ به‌رپرسیارن ل هه‌مبه‌ر وێ ره‌وشا ل وێ ده‌ڤه‌رێ دروست بوویه.
ئەگه‌ر به‌رژه‌وه‌ندیا وه‌لاتیێن مه د سه‌ر به‌رژه‌وه‌ندیێن حزبی را ده‌ینن، هینگێ چاره‌سه‌ریا ڤێ ره‌وشێ هێسانه و مه پلان و به‌رنامه‌یێن ب باندۆر هه‌نه ژ بۆ چاره‌سه‌رکرنا ڤێ پرسگرێکێ و د ڤی واری دا مه پێنگاڤێن باش ژ بۆ چاره‌سه‌رکرنێ ئاڤێتنه. لێ مخابن، رێگری هات کرن د جیبجیکرنێ دا و پشترا ژی کریارا ته‌رۆرکرنا هاوکار جاف ئه‌ڤ پرۆسه‌سه ب ته‌مامی خه‌تماند.
پرسگرێکێن دارایی و کۆمکرنا داهاتێ ب قاسی دو سالانه هه‌یه و ب ده‌هان جڤین ل سه‌ر ڤێ پرسگرێکێ هاتنه کرن و ژ بۆ چاره‌سه‌ریێ به‌رچاڤرۆنیه‌ک باش هه‌بوو.
بریارا ئه‌نجومه‌نا وه‌زیران هه‌یه کو هێزێن هه‌ڤبه‌ش بشینن سه‌ر ده‌ریێ سینۆر، لێ یەنەکێ رێگری کر و ته‌هدیت کر کو هه‌که ئه‌ڤ بێ کرن، دێ شه‌رێ ناڤخوه‌یی دەست پێ بکە. ژ به‌ر هندێ د ڤێ ده‌مێ دا ئازراندنا ڤێ پرس و مژارێ ب ته‌نێ ژ بۆ هندێ یه کو فۆکوس نه‌که‌ڤه سه‌ر پرسا ته‌رۆکرنا هاوکار جاف د جه‌رگێ پایته‌ختێ هه‌رێما کوردستانێ دا. هه‌رێما کوردستانێ و پێشمه‌رگه سه‌مبۆلا رووبرووبوونا ته‌رۆرێ بوونه و نابه د ناڤخوه‌یا هه‌رێما کوردستانێ دا که‌س هه‌بن ژ بۆنا یه‌کالیکرن پرسگرێکێن خوه ده‌ست بۆ ته‌رۆرێ ببن..
د ڤێ که‌یسێ دا، مه چو ئالی تاوانبار نه‌کرنه، ب ته‌نێ ناڤێن چه‌ند که‌سێن گومانبار هه‌نه کو دڤێ راده‌ستی دادگه‌هێ بکن و ژ بۆنا ڤێ ئارمانجێ ژی، ب فه‌رمی نامه ژ رایه‌دارێن تێکلدار ئێن ل سلێمانیێ را هاتیه شاندن . ژ ده‌ستپێکێ ڤه، مه گۆت کو بلا کۆمیته‌یه‌کا لێپرسینێ یا هه‌ڤبه‌ش هه‌به و ته‌ره‌فێ سێیه‌مین ژی، هه‌تا ل سه‌ر ئاستا ناڤده‌وله‌تی ژی به‌شداریێ د لێکۆلینان دا بکن، لێ مخابن، هه‌تا نوها به‌رسڤه‌ک ژ بۆ ڤێ داخوازێ نینە. ژ به‌ر ڤێ یه‌کێ، پرسگرێک نه داهات و ره‌وشا ئابۆری یا ل سلێمانیێ یه. تشتێ کو هه‌یه ئه‌وه کو داخواز ژ مه تێ کرن کو که‌یسا هاوکار جاف بێ بێده‌نگ کرن کو ئه‌ڤ ژی داخوازه‌ک نه ره‌وایه و نابه هه‌ڤوه‌لاتیێن هه‌رێمێ قه‌بوول بکن.
ره‌وشا هه‌رێمی ژ مه داخواز دکه کو پرسگرێکێن خوه چاره‌سه‌ر بکین و بهێز به‌ر ب پاشه‌رۆژێ پێنگاڤان پاڤێژین.
ل ڤر، ژ بۆ به‌رژه‌وه‌ندیا گه‌له‌مپه‌ری و ده‌رباسبوونا ڤێ قۆناغێ، ئه‌ز خالێن ل ژێر ل بەر چاڤێن رایا گشتی و هەموو ئالیان دادنم:
۱- د ده‌ربارێ دۆزا ته‌رۆرکرنا هاوکار جاف دا، کو ئه‌گه‌رێ ڤێ ره‌وشا ته‌ڤلهه‌ڤه، ئه‌ز داخواز دکم کو ده‌ستپێکێ سووجداران ته‌سلیمی دادگه‌هێ بکن و پشترا کۆمیته‌یه‌ک هه‌ڤبه‌ش ژ سازیێن په‌یوه‌ندیدار ب به‌رهه‌ڤیا ئالیێ ناڤده‌وله‌تی و نوونه‌رێن پەرلەمه‌نتۆیا کوردستانێ یان هه‌ر وه‌لاته‌کێ دۆست کو بخوازه به‌شدار به بێ پێکانین دا کو لێپرسین ب زووترین ده‌م ب وان را وه‌ره ده‌ستپێکرن و ئه‌نجامان ژ گه‌ل و رایا گشتی را ئاشکه‌ره بکن.
۲- د ده‌ستپێکا ده‌ستبکاربوونا کابینه‌یا نه‌هان دا، داخواز هاته کرن کو پرسا لامه‌رکه‌زیه‌ت و شۆرکرنا ده‌ستهه‌لاتێن داهات و خه‌رجیان جیبجی بکن، ژ به‌ر هندێ ئه‌و ده‌ستهه‌لات هاتن شۆرکرن. نوها ژ ئالیێ تیما وه‌زاری یا یەنەکێ ڤه تێ داخواز کرن کو خه‌رجی ببن مه‌رکه‌زی. ئه‌گه‌ر ئه‌ڤ یه‌ک تێ داخواز کرن هینگێ دڤێ کۆمکرنا داهاتێ ژی ببه مه‌رکه‌زی و پرۆسه‌سا کۆمکرنا داهاتێ، ب تایبه‌تی ل ده‌ریێن سینۆری، د بن سه‌رپه‌رشتی و چاڤدێریا چر ئا مه‌رکه‌زی دا به. ژ بۆنا ڤێ ئارمانجێ ژی دڤێ هه‌ڤاهه‌نگی د ناڤبه‌را وه‌زاره‌تێن دارایی، ناڤخوه و پێشمه‌رگه دا هه‌به داکو رێ ل قاچاخچیتیێ و ده‌ستبرن بۆ داهاتیێ سینۆران بێ گرتن و پێکانینا هێزه‌کا هه‌ڤبه‌ش ژ بۆ ڤێ ئارمانجێ پێویسته.
۳- دڤێ ل سه‌ر پرۆسه‌سا چاکسازیێ و یه‌کگرتنا هێزێن پێشمه‌رگه رێگری نه‌یێ کرن. د ڤێ کابینه‌یێ دا، ژ بۆنا چاکسازیێن هێزا پێشمه‌رگه و یه‌کگرتنا وان مه ب کریار پێنگاڤ ئاڤێتنه، دڤێ هێزا پێشمه‌رگه ببه هێزه‌کا نشتمانی یا بهێز ژ بۆ پاراستنا قه‌واره‌یێ ده‌ستووری یێ هه‌رێما کوردستانێ و بدوورخستنا گه‌فان و دوور ژ ئه‌جه‌ندایێن حزبی و تاکه‌که‌سی.
٤- ژ بۆ به‌رژه‌وه‌ندیا گه‌ل و پێڤاژۆیا ده‌مۆکراتیک ل هه‌رێمێ، دڤێ زووتر پەرلەمنه‌تۆیا کوردستانێ بجڤه و خوه ژ بۆ ئاکتیڤکرنا کۆمسیۆنا هلبژاتنان ئاماده بکه داکو ژ بۆنا کو ئیسال هلبژارتنێن پەرلەمه‌نتۆیا کوردستانێ بێن کرن ب کریار پێنگاڤان پاڤێژه. حکومه‌تا هه‌رێما کوردستانێ ئاماده‌یه هه‌موو پێتڤیتیێن هلبژاتنان د زووترین ده‌م دا دابین بکه.
٥- پارتیێن سیاسی یێن به‌شدار د حوکومه‌تێ دا، وه‌کی حزب، دڤێ پشتگریا حکومه‌تا هه‌رێما کوردستانێ بکن، چێنابه د ناڤ حوکومه‌تێ دا بن و رۆلا دژبه‌ریێ/ئۆپۆزسیۆنێ بلیزن. دڤێ وه‌زیر و تیمێن وه‌زاریان ژی کارنامه‌یا حوکومه‌تێ جیبجی بکن، چێنابه پرسگرێک و ته‌ڤلیهه‌ڤیێن سیاسی بۆ ناڤ حکومه‌تێ ڤه‌گوهێزن. دڤێ ژ ده‌رڤه‌یی حکومه‌تێ هه‌ولا چاره‌سه‌ریا پرسگرێکێن سیاسی بدن، چێنابه کارێ حکومتێ بخه‌تمینن.
مه‌سرور بارزانی
سه‌رۆکوه‌زیرێ هه‌رێما کوردستانێ
٢٠٢٣/١/١٥
کورمانجیکرن: سبەهی
