سهرۆک مهسعود بارزانی ل ڕۆمایا پایتهختا ئیتالیایێ ڕاگەهاند کو وی د پەیوهندیهکا تهلهفۆنی دا ژ سهرۆککۆماری سووریهیێ ئهحمهد شهرع خوهستیه کو ڕێ ل بهر شهرێ کورد و عهرهبان بگره و دهستدرێژی ل کوردان نهیێ کرن.
سهرۆک مهسعود بارزانی ئیرۆ پشتی جڤینا ل گهل وهزیرێ کارێن دهرڤه یێ ئیتالیایێ ئانتۆنۆ تاژان ل ڕۆمایێ جڤینهکا ڕۆژنامهگهریێ ل دار خست.
سهرۆک بارزانی د جڤینێ دا گۆت، “ههبوونا من یا ل ڤر تێ واتهیا کو هاتنه هاوارا مه.”
“مهترسیا داعشێ ل سهر ههموویان هەیه”
سهرۆک بارزانی ل سهر پرسا ڕهڤا چهکدارێن داعشێ ژ گرتیگههێن سووریهیێ و ڕۆژاڤایێ کوردستانێ وها ئاخڤی:
“ئهڤ مهترسیهکه ل سهر مه ههموویان، ئیتالیا ژی د ناڤ دا. ههر کهس ههست ب وێ مهترسیێ دکه.
ئهڤ یهک پێویستی ب ههڤاههنگی و ههڤکاریا ههڤدوو ههیه و دڤێ پلانهک ژ بۆ ڕووبرووبوونا ڤێ ڕهوشێ ههبه.”
ههڤدیتنا ب پاپا را
نووچهگەهانا ڕووداوێ ئالا شالی ژ سهرۆک بارزانی پرسی، “وه ژ بۆ پشتگریا کوردێن ل ڕۆژاڤا چ داخواز ژ پاپا کر؟”
سهرۆک بارزانی د بهرسڤێ دا گۆت، “مه داخواز کر کو ئهو ب هێزا خوه یا مانهوی پشتگریا مه بکه.”
سهرۆک مهسعود بارزانی ئیۆر ل ڤاتیکانێ ب پاپا لهئۆیێ ۱٤ئهمین را جڤیابوو.
ل گۆری داخویانیا بارهگهها بارزانی، د ههڤدیتنێ دا ههر دو ئالیان کێفخوهشیا خوه ژ بۆ وێ ههڤدیتنێ ئانی زمان کو بوویه دهرفهتهک ژ بۆ دانووستاندنا بیر و ڕامانان ل سهر مژارێن گرینگ یێن ههرێمێ و جیهانێ.
