سه‌رۆکێ هه‌رێما کوردستانێ نێچیرڤان بارزانی ژ بۆ پێکانینا چه‌ند جڤین و هەڤدیتنێن فه‌رمی ب مەزنە پەرپرسێن ئەلمانیایێ را دچه بەرلینێ.
بریاره د ۲٦ێ حه‌زیرانێ دا، سەرۆک نێچیرڤان بارزانی، بچه به‌رلینێ پایتەختێ ئەلمانیایێ و تێ پێشبینیکرن کو سه‌رۆک نێچیرڤان بارزانی دگه‌ل سه‌رۆکوه‌زیرێ ئەلمانیایێ ئۆلاف شۆلز و هژمارەکە رایەدەر[ەن وی وەلاتی را بجڤه.
جیگرا به‌رده‌ڤکا حکومه‌تا ئەلمانیایێ کرستانه هۆفمانن ل هه‌ولێرێ ب سه‌رۆکێ هه‌رێما کوردستانێ نێچیرڤان بارزانی را هه‌ڤدیتن پێک ئانی و پشتی هەڤدیتنێ د پرەسکۆنفەرەنسەکێ دا به‌رسڤا پرسێن رۆژنامه‌ڤانان دا. هۆفمانن دەربارێ هه‌ڤدیتنا خوه یا ب نێچیرڤان بارزانی را گۆت کو وان د جڤینێ دا په‌یوه‌ندییێن هه‌رێما کوردستانێ دگەل ئەلمانیایێ، پێشهاتێن هه‌رێمی و پرسێن خوەدی به‌رژه‌وه‌ندییێن هه‌ڤبه‌ش یێن هه‌ردو وه‌لاتان گۆتوبێژ کرن. رایه‌دارا حکومه‌تا ئەلمانیایێ دیار کر کو پشتی هه‌ڤدیتنا هه‌ر دو رێبه‌ران وێ چو داخویانییه‌ک چاپه‌مه‌نییێ نه‌یێ دان.
ئه‌ڤ چه‌ند سالن د ناڤبه‌را هه‌رێما کوردستانێ و ئەلمانیایێ دا پێوه‌ندییێن بهێز هه‌نه. ب تایبه‌ت د ده‌ما ئێرشێن داعشێ دا، حکومه‌تا ئەلمانیایێ د شه‌رێ ل دژی داعشێ دا و ده‌ربارێ کۆچبه‌ران دا ئالیکاریێن له‌شکه‌ری و مرۆڤی پێشکێشی هه‌رێما کوردستانێ کرن.
ئەلمانیا کو ل دژی ئێرشێن داعشێ مووشه‌کێن میلان دان هێزێن پێشمه‌رگه، ژ سالا ۲۰۱٤ێ ڤه ژی گه‌له‌ک پشتگری، ب تایبه‌ت ئالیکارییا په‌روه‌رده و شێورمه‌ندییێ دا هێزێن پێشمه‌رگه. هه‌تا سالا ۲۰۱٦ێ ۱٦۰ سه‌ربازێن ئەلمانیا ل ئیراق و هه‌رێما کوردستانێ کار دکرن
