کریزا ئالایێ کوردستانێ یا د ناڤبهرا ههولێر و شامێ دا چارهسهر بوو و ئالایا کوردستانێ د ڕێکلامێ دا هات دانان.
سازیا پێشانگههێن ناڤنهتهوهیی یا شامێ، ژ بۆ پێشانگهها کو بریاره ل ههولێرێ بهێتە لدارخستن د ڕێکلاما خوه دا ئالایێ کوردستانێ نەدانابوو. لسهر ڤێ یهکێ ڕایهدارێن ههرێما کوردستانێ بهرتهکێن توند نیشان دان و گۆت، “کی ئالایا مه ناس نهکه نکاره ل ڤر پێشانگههێ ڤهکه.”
پشتی هشیاریان ڕێکلام هات ژێبرن.
سازیا گشتی یا پێشانگههێن ناڤنهتهوهیی و بازارێن ناڤنهتهوهیی یا شامێ، ژ بۆ “پێشانگهها بهرههمێن نشتمانی یێن سووریێ” کو پلانه ۲٣-۲٦ێ کانوونا پاشین ئا ۲۰۲٦ئان ل ههولێرێ بهێتە لدارخستن، ل سهر مهدیایا جڤاکی ڕێکلامک بهلاڤ کر.
لێ بهلێ د وێنهیێ کهلهها ههولێرێ یێ کو د رێکلامێ دا هات بکارانین دا تهنێ ئالایێن ئیراق و سووریێ هاتبوون دانان و ئالایێ کوردستانێ هاتبوو پاشگوهخستن. ڤێ یهکێ ڕێ ل بهر نهرازیبوونان ڤهکر.
د وێنهیێ ناڤبۆری دا، ل سهر کهلهها ههولێرێ ئالایێن ئیراق و سووریێ ب ئاوایهکی مهزن هاتبوون مۆنتاژکرن لێ ئالایێ کوردستانێ یا کو دڤێ ب ئاوایهکی فهرمی ههبه، ب زانین نههاتبوو دانین.
پشتی کو ڕووداوێ مژار ئانی ڕۆژهڤێ، سازیا سووریهیی نهچار ما کو د ساعهتێن ئێڤارێ دا وێ پارڤهکرنێ ژ ڕووپهلا خوه یا فێسبووکێ ژێ ببه.
“ئهم دهستوورێ نادن”
پشتی دهرکهتنا کریزێ، ڕایهدارێن ههرێما کوردستانێ داخویانیێن توند دان. سهرۆکێ دهستهیا هلبهرینێ یا ههرێما کوردستانێ محهمهد شوکری گۆت:
“ئهم قهت ڕێ نادن کو د وی وێنهیی دا ئالایێ کوردستانێ نهبه. مه پێوهندی ب وان را دانی، نهچارن وی وێنهیی بگوههرینن. ئهگهر نهکن دێ دهستوور ژ بۆ بهشداربوون ئان لدارخستنا ڤێ پێشانگههێ نهیێ دایین.”
“مژارا مه یا خهتا سۆره”
پارێزگارێ ههولێرێ ئومێد خۆشناو ژی دیار کر کو ئهڤ مژار “خهتا سۆر” ه و وها ئاخڤی: ئهم ب چو ئاوایی قهبوول ناکن کو ئالایێ کوردستانێ بهێتە پاشتگوخستن. مه پهیاما خوه یا زهلال گەهاندە رێکخەرێن پێشانگەهێ. ئهگهر هوون ئالایێ کوردستانێ ناس دکن هوون دکارن ڤێ پێشانگههێ بکن، ئهگهر هوون ناس ناکن نه ممکونه هوون ل ڤر پێشانگههێ ڤهکن.”
مهترسیا بهتالکرنێ ههیه
پارێزگاریا ههولێرێ و دهستهیا هلبهرینێ هشیاری دا کو ئهگهر ماتهریالێن داناسینێ ل گۆری سهمبۆلێن فهرمی یێن ههرێما کوردستانێ نهیێن سهرهراستکرن، دێ پێشانگهه ب تهمامی بهێتە بهتالکرن.
پێشانگهها کو تێ پلانکرن د بن چاڤدێریا ئۆدهیێن پیشهسازیێ یێن شام و حهلهبێ دا بهێتە کرن، تێ پێشبینیکرن کو ۲۳یێ کانوونا پاشین ئا ۲۰۲٦ئان ل پێشانگهها ناڤنهتهوهیی یا ههولێرێ دهست پێ بکه.
