ل ترکیێ و باکورێ کوردستانێ سه‌ردانا شاندەیا ده‌م پارتییێ بۆ ئۆجەلان و هه‌روه‌ها ل سه‌ر داخوازا ئۆجەلان هه‌ڤدیتنێن شاندەیا ده‌م پارتییێ (هه‌یئه‌تا ئیمرالی) د رۆژەڤا سیاسی دا گەرمن. ئالیه‌ک دن یێ ڕۆژه‌ڤێ دا پرسا ڕۆژاڤایێ کوردستانێ و هه‌لوه‌ستا ترکیێ هەیە.
ئۆجەلان داخواز کربوو کو شاندەیا ئیمرالی دگه‌ل پارتیێن سیاسی و هه‌روه‌ها دگه‌ل هنده‌ک گرتیان، د سه‌ری دا ژی سه‌لاحەتین ده‌مرتاش، بجڤه. هه‌یئەت، پشتی ڤان هه‌ڤدیتنان، دێ جارەک دن ڤه‌گه‌ره ئیمرالی و دگه‌ل ئۆجەلان بجڤە و ئەنجامێن هەڤتینەن خوە ب وی را گۆتوبێژ بکە. ل گۆرا داخوویانیا ده‌م پارییێ ئیحتماله کو ب پارتیێن کوردان را ژی هه‌ڤدیتنا بکن. لێ هێژا ئه‌ڤ یه‌ک نه زه‌لاله. ژ به‌ر کو، ئه‌ڤ یه‌ک ب هه‌لوه‌ستا ده‌م پاتییێ ڤه گرێدایییه.
د ڕاستیا خوه دا ئه‌ڤ پێڤاژۆ ب ته‌مامی د بن دەستپێشخەریا ئیمرالی دا دمه‌شه و به‌رپرسێن ده‌م پاتییێ و تایبه‌تی ژی هه‌ڤسه‌رۆکێن ده‌م پاتییێ ژ ڤێ یه‌که نه که‌یفخوه‌شن. لێ چو شانسێ وان یێ کو ل دژی ڤێ پێڤاژۆیێ داخوویانیا بدن نینە. ژ به‌ر کو ئالیه‌کی ڤه ئه‌ڤ پێڤاژۆ به‌رده‌وامن و ژ ئالیه‌ک دن ڤه ژی، هێشتا ده‌وله‌ت قەیوما دادنە و ل هەمبه‌ر ئه‌ندامێن ده‌م پاتییێ ب حێجه‌تا ئه‌ندامه‌تی و هاریکاریا پەکەکێ ب توندی ته‌ڤدگه‌ره و وان دگره.
هه‌لوه‌ستا قه‌ندیل نه زه‌لاله و گۆتنێن وان ڕۆژانه ب ئاوایه‌کی نه. ژ بۆ ڤێ ژی دەولەت دترسە کو، قه‌ندیل گوه نه‌ده بانگا ئۆجەلان ژی. ئه‌ڤ پێڤاژۆ ب چو ئاوایی نه پێڤاژۆیا “ چاره‌سه‌ریێ“ یان ژی یا“ پرسا کورده“ ئه‌ڤ پێڤاژۆ یا هه‌ولدانا ده‌سژێبه‌ردانا چه‌کانه و یا هلوەشاندنا پەکەکێ یه. لێ نه پەکەکە ڤه‌کری به‌حسا ڤێ دکه و نه ژی ده‌م پارتی و ئالیێن گرێدایی پەکەکێ ڤه‌کری ڤێ پرسێ گۆتوبێژ دکن. ئه‌و ل گۆرا خوه هێژا گه‌له‌ک بزانه‌بوون، به‌حسا “ئاشتیه‌ک ب ڕوومه‌ت“ دکن. لێ د ڤێ پێڤاژۆیێ دا نه “ئاشتی “ و نه ژی “روومه‌ت“ هه‌یه.
هه‌لوه‌ستا ده‌وله‌تێ زه‌لاله. دبێژن یان دێ پەکەکە دەست ژ چه‌کان بەردە یان ژی ئه‌م دێ پەکەکێ ژ هۆلێ ڕاکن. هه‌موو هه‌ولدان و داخوویانیێن ڕایەدارێن ده‌وله‌تێ ب ڤی ئاوایی زه‌لالن. لێ هنده‌ک هێشتا خوه دخاپینن و به‌حسا، سیاسه‌تا پەکەکێ یا کا دێ چه‌وا خوه ژ ڤێ پێڤاژۆیێ ب ئاوایه‌کی خلاس بکن.
ده‌م پارتی نه زه‌لاله، داخوویانیێن خوه دا ته‌نێ دخوومخوومینن، ژ به‌ر کو ئه‌و ژی دزانن “هه‌یئەتا ئیمرالی“ نه ل گۆرا داخوازا وانه. ئه‌و دزانن ئۆجەلان هه‌ر تشتا ده‌وله‌ت بخوازه دێ وێ بکه.
ژ ئالیه‌ک دن ڤە ئەو سیاسه‌تا کو، کورد هه‌موو د که‌سایه‌تیا پەکەکێ دا دهاتن ناساندن و کورد وه‌ک ته‌رۆرستێن پۆتانسیه‌ل دهاتن ب ناڤکرن ئەو سیاسەت نەما و شکەستن خوار، ئێدی کوردێن ژ ده‌رڤەیی پەکەکێ ژی هەنە و تێن ناسکرن. د ڤێ یه‌کێ دا له‌یزتکا ده‌وله‌ت و پەکەکێ یا ده‌مه‌کی هه‌ڤبه‌ش ئیفلاس کریه. ئێدی ژ ده‌رڤەیی پەکەکێ ژی هه‌ینا کوردان د ڕۆژه‌ڤێ دا جهگرتیه. پەکەکە کوردا ته‌مسیل ناکه.
بێ گومان ئه‌گه‌ر پەکەکە دەست ژ چاکان به‌ردە ژ بۆ چاره‌سه‌ریا پرسا کورد ژی دێ ڕێیه‌ک ڤه‌به. ئێدی بێ کو ته‌هدیدا پەکەکێ هه‌بە دێ کورد بکاربن ب ڕێیێن ئاشتیانە و مه‌تۆدێن ده‌مۆکراتیک دۆزا مافێن خوه یێن ڕه‌وا بکن و نه ده‌وله‌ت نه ژی که‌سه‌ک نکارە وان ب “ ته‌رۆرێ“ تاوانبار بکه و دێ د قادا ناڤنه‌ته‌وی دا ژی پشگریه‌کێ وه‌رگرن.
پرسا ڕۆژاڤایێ کوردستانێ دا ژی د ئه‌سلێ خوه دا ڕه‌وش زه‌لاله. ترکیە ژی د ڤێ ده‌ربارێ دا زه‌لاله. هه‌تا وه‌ک ڤێ گاڤێ هەسەدە و پەیەدێ موخاتب ناگره و دبێژه یان دێ یەپەگە/پەکەکە ل ڕۆژاڤا دەست ژ چاکان به‌ردن یان ئه‌م دێ ئۆپه‌راسیۆنا بکن. ئامه‌ریکا ب مه‌ترسییا ژ نووڤه بهێزبوونا داعیشێ ناخوازه هێزا هەسەدێ ژ ده‌ست بده. هەسەدە ئاماده‌یه ببه به‌شه‌ک ژ هێزێن چه‌کدارێن رژێما نها ل شامێ. ژ بۆ وان ژی ئه‌ڤ نه گه‌له‌ک گرینگه. دۆهی به‌شه‌ک ژ رژێما ئه‌سەد بوون، ئیرۆژی ئاماده‌نه ببن به‌شه‌ک ژ رژێما تەحریر شام. هه‌لوه‌ستا وان هه‌تا وه‌ک ڤێ گاڤێ ئه‌ڤه.
لێ دخوه‌یێ هه‌لوه‌ستا ئامه‌ریکا و فرانسا ژی هه‌تا ترومپ ده‌ست کاره خوه بکه دکاره بێ گوهه‌رتن.
ڕێیه‌ک تەنێ ل به‌ر پەیەدێ و هەسەدێ هه‌یه کو بکاربن د خه‌ته‌ک نه‌تەوه‌یی دا گاڤه‌ک نشتمانپه‌روه‌ری باڤێژن. ئه‌و ژی ئه‌وه کو، ل گه‌ل ئه‌نەکەسێ هه‌ڤکاریه‌کێ بکن. هەسەدە و پێشمه‌رگه‌یێن ڕۆژ هه‌ماهەنگیه‌کی پێکبینن و ل ڕۆژاڤایێ کوردستانێ ژ بۆ ده‌ستخستنا مافێن ڕه‌وا یێن کوردێن ڕۆژاڤایێ کوردستانێ ته‌ڤبگه‌رن. دێ هینگێ ببن قادا ئیستقرارێ د هه‌رێمێ دا و دێ نه گەف بن ل سه‌ر که‌سه‌کی.
ئه‌گه‌ر پەیەدە/هەسەدە ڤێ یه‌کێ نه‌کن دێ وندا بکن، ڕۆژا ئامه‌ریکا ژ هه‌رێمێ ده‌رکه‌ڤه دێ ببن له‌یستیکێ هێزێن هه‌رێمی و فه‌لاکه‌ته‌کی بینن سه‌رێ کوردان ل ڕۆژاڤایێ کوردستانێ.
۱۱.۰۱.۲۰۲٥
نێرین/شرۆڤه /
ن.فرات
