گه‌له‌ک جارا هنده‌ک قه‌له‌مشوورێن پەكەكێ نڤیسان دنڤیسێن، د سەرێ خوە دا خەیالان چێ دكن و به‌هسا تشتێن نه‌بوویی دکن. حه‌قاره‌تێ ل ھەر كاس و ئالی دکن، نووچه‌یێن ده‌ره‌و دنڤیسینن. نرخاندنێن وان هه‌موو هاتنه دزاینکرن و ل سه‌ر بنگه‌هێ ئاسته‌نگکرنا ده‌وله‌تبوونا کوردا ته‌ڤدگه‌رن .
نڤیسکارا ئۆزگور پۆلیتکا، گولستان چییا ئیکه، جاردن دژمنا‌تیه‌کا بێ واته ل هەمبه‌ر پەدەكێ دکه. گولستا، د نڤیسا خوه ده دبێژه: “سه‌رکێشێ دژمنێن کوردان ده‌وله‌تا ترکه. دژمن هه‌ر ده‌مێ ته‌هلووکه‌یان چێدکن. لێ نها ژ دژمنان زێده‌تر ژ بۆ کوردان ته‌هلووکه‌یا مه‌زن هه‌ڤکاریا ل گه‌ل دژمنانه. مفاوەرگرتنا دژمنان ژ هندەك پارتیێن کوردان، ته‌هلووکه‌یێ ب خوه ڕه تینه. ب تایبه‌تی تێکلیا پەدەكێ د گه‌ل ده‌وله‌تا ترک ژ بۆ 4به‌شێن کوردستانێ و ژ کوردان ھەموویان ڕا خه‌ته‌ریێ چێدکه.”
ڕاسته دژمنێ کوردا ده‌وله‌تا ترکه، لێ ده‌وله‌تا سوریێ، ئیراق و ئیران ژی دژمنێن سەرھشكێن كوردانە. به‌ری هه‌ر تشته‌کی دڤێ ئه‌ڤ خانم ڤێ ڕاستیێ ژی بوێره بێژە. لێ ژ به‌ر کو پێوه‌ندیێن پەكەكێ ل دژی ته‌ڤگه‌را ئازادخوازا کوردستانێ ب ڤان هه‌رسێ ده‌وله‌تان ڕا هه، ئەو خانم ده‌نگ ناکه. ڕاسته دژمن مفایەك مه‌زن ژ ئالیێن ل گه‌ل وان هه‌ڤکاریێ دکه دبینه. وان ل دژی ده‌ستکه‌فتیێن کوردستانێ ب کار تینه. گه‌لۆ ل شه‌نگالێ تاشه‌رۆنێن حه‌شدا شەعبی کینه و کی ڕێ ل ڤه‌گه‌را خه‌لکێ شنگالێ دگره؟
ڕاسته پێوه‌ندیا حوکومه‌تا هه‌رێما کوردستانێ د چارچۆڤەیەك دەستووری و دپلۆماسی دا ل گه‌ل ترکیێ و ل گەل ئیرانێ ژی هه‌یه. لێ به‌رپرسێن ده‌ستهلاتا حوکومه‌تا کوردستانێ د بن ئالا کوردستانێ دا و ئاشکهره ل گه‌ل ڕایادارێن ڤان ده‌وله‌تان ڕوودنن. گه‌لۆ هه‌تا نها که‌سه‌کی دیتیه کو، په‌ربرسه‌کێ/ا پەكەكێ ئاشکهره د بن سه‌مبۆله‌ک کوردستانی دا ل گه‌ل ڕایاداره‌ک ڤان ده‌وله‌تا جڤیایی؟ ئه‌و ڤه‌شارتی ل گه‌ل ده‌زگه‌هێن ئیستخباراتا هه‌ر چار ده‌وله‌تان دجڤن و پلانێن تێکبرنا ده‌ستکه‌فتیێن کوردا ئامادە دكن.
جا-جاران پەكەكە و ئالیگرێن خوە به‌حسا یه‌کێتیه‌ک نه‌ته‌وی دکن، لێ د مه‌ژیێ وان دا ئه‌ڤ یه‌کێتی ل دژێ خه‌تا نه‌ته‌وی ب خوه‌یه و پیلانێن تێکبرنا خه‌تا نه‌ته‌وی ب ناڤێ نه‌ته‌ویبوونێ دکن.
گولستان ئیکه د به‌شه‌ک دن نڤیسا خوه دا دبێژه: “یا ڕاستی، مه‌سه‌له ژ بۆ گه‌لێ کورد چاره‌سه‌ر بوویه. ل چوار به‌شێن کوردستانێ یه‌کبوونا هه‌ست و ئارمانجێ پێک هاتیه. جڤاکا کورد یه‌کێیتیا نه‌ته‌وه‌یی پێک ئانیه.”
باشه ئه‌گه‌ر “یه‌کتیا نه‌ته‌وی” یا کو هوون به‌حسێ ژێ دکن پێکهاتبه هوون دۆزا چ دکن؟ ژ بۆ چ هوون به‌حسا یه‌کێتیا نه‌ته‌وی دکن؟ مسیۆنا وه ئه‌وه کو هوون یه‌کێتیه‌ک نه‌ته‌وی به‌رھاڤێتی بکن .
ئەو قەلەمشوورا پەكەكێ د به‌رده‌وامیا نڤیسا خوه دا دبێژه: “دڤێ ئێرشا ل سه‌ر شنگال و مه‌خموورێ بھێتە ڕاوه‌ستاندن. دڤێ د سه‌ری دا ژی هه‌ڤکاریا پەدەكێ یا ب ترکیێ ڕا بھێتە ڕاوه‌ستاندن. ژ به‌ر کو نها خه‌ته‌ری و ته‌هلووکه‌یا هه‌ری مه‌زن یا نه‌ته‌وه‌یی ئه‌ڤه. وێ ده‌مێ دڤێ خه‌بات و هه‌لوێستا نه‌ته‌وه‌یی یا سه‌ره‌که پێشیگرتنا ل ڤێ مه‌ترسیێ به. ئان ژی ئه‌م ڕابن بێژن بلا د ناڤبه‌را کوردان دا شه‌ر نه‌به؛ براکوژی نه‌به، تێ وێ واته‌یێ، ئه‌م دێ ڤێ نێزیکاتیا پەدەكێ نه‌بینن.”
جاردن به‌حسا هه‌ڤکاریا پەدەكێ و ده‌وله‌تا ترک دکه. لێ ناخوازه حوکومه‌تا هه‌رێما کوردستانێ ببینه. ژ به‌رکو ئه‌و سه‌روه‌ریا باشوورێ کوردستانێ قه‌بوول ناکن. پەدەكە یان ژی حوکومه‌تا کوردستانێ ئێریشێ مه‌خموور و شنگالێ ناکن. مه‌خموور و شنگال ژ ئالیێ حه‌شدا شەعبی و ئارتێشا ئیراقێ ڤه، پشتی ڕه‌فه‌راندوما سه‌رخوبوونێ، هاتن داگیرکرن. نها حوکومه‌تا هه‌رێما کوردستانێ هه‌ولدده کو ڤان هه‌ردو ده‌ڤه‌ران ڤەگەرینە و بێخه سه‌ر هه‌رێما کوردستانێ. لێ چه‌کدارێن پەكەكێ ل گه‌ل حه‌شدا شه‌عبی هه‌ولددن ڤان ده‌ڤه‌ران ژ کوردستانێ ڤه‌قه‌تینن و ب به‌غدایێ ڤه گره‌بدن. وه‌ک دن یا هه‌ری باش ئه‌وه کو چه‌کدارێن پەكەكێ ژ ڤان هه‌رێما ده‌رکه‌ڤن به‌رێ خوه بدن باکورێ کوردستانێ. شه‌رێ ل دژێ ده‌وله‌تا ترک نه ل مه‌خموور و شنگالێ تێ کرن. ل باکورێ کوردستانێ قادا شه‌رێ وه‌یه، ئه‌گه‌ر هوون ژ دل و ڕاست بن.
هه‌روه‌ها پەكەكێ به‌ری نها ژی ب ده‌ڤێ مستافا کاراسو یێ رێڤەبەرێ پەكەكێ ، دا خوویاکرن کو، شه‌رێ ل دژێ پەدەكێ نه شه‌رێ براکوژیێ یه. نها ئه‌ڤ خانم ڤێ یه‌کێ دوبارە دکه. ئه‌ڤ که‌سێن ڤان نڤیسان دنڤیسینن به‌رده‌ڤکیا ده‌وله‌تێن داگیرکه‌ر دکن. ئەو ژ هه‌رکه‌سی باشتر دزانن کو، ده‌ما دۆزا ده‌وله‌تبوونا کوردستانێ سه‌ربکه‌ڤه ،ئه‌و ژ هۆلێ ڕادبن. ژ به‌ر کو ئێدی چو کاره‌كێ دژمن ب وان نامینه.
قه‌لامشوورا پەكەكێ دبێژه: “وه‌زیرێ پاراستنێ یێ ده‌وله‌تا ترک یا داگیرکه‌ر چما چوویه هه‌ولێر” دڤێ ئه‌ڤ خانم بزانبه و تێبگهه هه‌ولێر پایته‌ختێ باشوورێ کوردستانێ یه. هه‌موو ئالیێن سه‌ردانا کوردستانێ دکن ل گه‌ل به‌رپرسێن کوردستانێ د بن ئالا کوردستانێ دا دجڤن و داخوویانیا ئاشکهره ددن مه‌دیا جهانێ ژی.
وه‌زرێ پاراستنا ترکیێ سه‌ردانا به‌غدایێ ژی کر، ل گه‌ل وان به‌رپرسێن کو هوون معاشێ خوه ژ وان وەردگرن ژی جڤییان. گه‌لۆ ترسا وه چییه هوون به‌حسا دژمنا ناکن و ته‌نێ دخوازن ب ده‌ره‌وان پارێزگه‌رێن خه‌تا نه‌ته‌وی تاوانبار بکن؟ ئێدی ئه‌ڤ پرۆپاگانده و نووچەیێن دەرەو ڕۆله‌کی ناله‌یزه، قێرینا وه بێ فه‌یده‌یه.
به‌شه‌ک دن د نڤیسا خوه ده ئیکه دبێژه: “ئێدی چو واته‌یا بانگێن ژ بۆ پەدەكێ و پەكەكێ نینە. د ڤێ ڕه‌وشێ ده لازمه کو بانگ ل پەدەکێ بکن. لێ هه‌تتا بانگ ژی تێرێ ناکه. دڤێ گه‌لێ کورد و هێزێن سیاسی ل دژی پەدەکێ ببن خوه‌دی هه‌لوێست.”
بلا ئه‌ڤ خانم باش بزانبه، پەدەكە خوه‌دی سیاسه‌ته‌ک نه‌ته‌وییه، پەدەكە هه‌ولا ده‌وله‌تبوونا کوردا ل سەر ئاخا به‌شه‌ک کوردستانێ دده. ژ خوه ئه‌گه‌ر پەدەكە گوھ بده بانگێن پەكەكێ ژ بۆ یه‌کێتیێن سه‌خته، دێ پەدەكە راستی خه‌له‌تیه‌ک مه‌زن ببه. ژ به‌ر کو به‌ری نها ژی ئه‌ڤ پێڤاژۆ هاته ڕۆژه‌ڤێ و هه‌رکه‌سه‌کی نه‌راستیا پەكەكێ و فێل و فیتێن وان د ڤێ ده‌ربارێ ده دیت و پەدەكە ژی ژ خه‌له‌تیه‌کی ڤه‌گه‌ریا……
2021.02.16
