مالپەرا مە، سبەهی، ب هەلکەفتا شۆرەشا گولانێ دۆسیەیەک ڤەکریە ل ژێر ناڤێ: ئەز و شۆرەشا گولانێ.
د ڤێ چارچۆڤەیێ دا چەند پێشـەرگەیێ یێن دێرین بەرسڤا پرسێن مالپەرا مە ددن کو، یەک ژ وان ژی برێز فەرەج میرزا یە
سبەهی: تو وەک پێشمەرگە یێ دێرین، شۆرەشا گولانێ ژ بۆ تە چیە؟
فەرەج میرزا: شۆرەشا گولانێ ژبۆ من و هەر کوردستانیەکی کو، خەما رزگاربوونێ هەبت، چریسکا هیڤی و ئومێدا بوو پشتی وێ پیلانگێریا مەزنا ب سەر شۆرەشا مەزنا ئیلۆنێ دا هاتی. شۆرەشا گۆلانێ، وەکو درێژەپێدانا شۆرەشا ئیلۆنێ، دوو بەرەباب تێکەل ئێک کرن: ئێک خوەدان ئەزمون و ئێک ژی خوونگەرم و رۆشنبیر و هۆسا ئێکودو تەمام دکرن.
شۆرشا گولانێ قوتابخانەکا مەزنا بەرخودانا چەکداری وهزری و نەتەوی بوو، نە بتنێ ژ بۆ ئەوێن ل ناڤ رێزێن پێشمەرگەی و دەڤەرێن ئازاد و نیڤ ئازاد، لێ ژ بۆ گەنج و لاو رۆشنبیرو نڤیسکار و هۆزانڤانێن ل بن ستەما داگیرکەران ژی پشت و پەنا بوو کو، هێزوشیان و ێرەکی ددا وان ل ناڤ جەرگێ داگیرکەران دا پەیام و مەبەستێن شۆرەشێ ببەرهەمێن خوە رابگەهینن.
٢- تو چ ژ وێ شۆرەشێ فێر بووی؟
فەرەج میرزا: ئەڤ شۆرەشە ژ بۆ من بخوە نەبەس قوتابخانەیەک بوو، لێ بەلێ مالباتەکا ب دایک و باب و خووشک و برا بوو، خێزانەکا گەلەک مەزن بوو کو، ئەم د ناڤ دا فێری بەرخوەدانێ بوون بەرامبەر داگیرکەران و فێری دلۆڤانیێ بوون بەرامبەر هەڤ و بەرامبەر خاکا خوە و مللەتێ خوە. وەکی دایکەکێ هینی دلسۆزیێ کرین و وەکی بابەکی فێرکرین چەوا خوە ل بەرتەنگاڤیان نەچەمینین.
٣- تە چ دا شۆرەشێ و شۆرەشێ چ دا تە؟
فەرەج میرزا: من ل بەربوو گیانێ خوە بدەم شۆرەشێ لێ شەهیدبوون نەبوو بەهرا من و ئێدی من تەمەنێ خوە ژ بۆ تەرخانکر ل ڤی تەمەنێ من دەربازکری کو دبنە ٣٩ سال هندی شیانەکا من هەیی من ژ بۆ شۆرەشا خوە تەرخانکر.
ئەز هەردەم دبێژم: ئەز و هەر ئێکی وەکی من خەبات کری و گەهشتیە ئیرۆکەیا مە ئەو گەلەکێ بەختەوەرە چنکو ب دەهێن هەزاران خەبات کرن و بەرهەمێ رەنج و خەباتا خوە نەدیتن. مە خەباتکر مە سەرکەفتن دیت ئەو مەزنترین دەسکەفت و خەلات بوو بۆ مە و شۆرشا خوە پێکڤە پارڤە کر.
هەزار سلاڤ ل گیانێ شەهیدێن رێکا رزگاریا کوردستانێ بن.
فەرەج میرزا
