شۆرەشا گولانێ ژ بۆ من هیڤیەک مەزن بوو پشتی شکەستنەک مەزن
مالپەرا مە، سبەهی، ب هەلکەفتا شۆرەشا گولانێ دۆسیەیەک ڤەکریە ل ژێر ناڤێ: ئەز و شۆرەشا گولانێ.
د ڤێ چارچۆڤەیێ دا چەند پێشـەرگەیێ یێن دێرین بەرسڤا پرسێن مالپەرا مە ددن کو، یەک ژ وان ژی برێز رزگار کێستەیی یە.
سبەهی: تو وەک پێشمەرگە یێ دێرین، شۆرەشا گولانێ ژ بۆ تە چیە؟
رزگار کێستەیی: شۆرەشا گولانێ ژ بۆ من هیڤیەک مەزن بوو پشتی شکەستنەک مەزن. جوداهیا شۆرەشا گولانێ ئەوە کو پشتی سالا ١٩٧٥ێ و ئەو شکەستنا هند مەزن یا ب سەرێ ملەتێ کورد هاتی کو هەتا بلندترین و ئاسێترین چیایێن کوردستانێ ژ ئالیێ لەشکەرێ رژێما ئیراقێ ڤە هاتنە داگیرکرن. خەلک گەلەک بێهیڤی بوو، خەلک گەلەک دەربەدەر بوو، گەلەک کۆچبەری ئیرانێ بوون و ئیرانێ ژی ئەو خەلک ل سەر باژار و کامپان پرت و بەلاڤە کرن، هند ژی برن بۆ باشوورێ ئیراقێ. ئانکو بێهیڤیەکا وەسا پەیدا ببوو خەلکی چو رۆناهی و هیڤی نەددیتن. دەستپێکا شۆرەشا گولانێ رۆناهییا هیڤیەکێ بوو، ئەو رۆناهی هێدی-هێدی مەزن بوو و بۆ هیڤیەک مەزن کو کاری ملەتی کورد ژ وێ شکەستن و بێهیڤیا مەزن دەربێخیت و مۆرالەک دا گەلێ کوردستانێ کو جارەکا دن دەست بدن چەکێ بەرخوەدانێ و ل هەمبەر داگیرکەران راوەستن. ژ بەر هندێ ئەز دکارم بێژم کو شۆرەشا گولانێ ژ بۆ من هیڤیەک مەزن بوو پشتی شکەستنەک مەزن.
٢- تو چ ژ وێ شۆرەشێ فێر بووی؟
رزگار کێستەیی: ب راستی ئەز گەلەک تشتان ژ شۆرەشا گولانێ فێر بووم. ئەز وەک کەس بەری پشکداریێ د شۆرەشا گولانێ دا بکم و پشتی شۆرەشێ ئەز ب تمامی بووم کەسەک دن، ئەز ژ شۆرەشا گولانێ فێر بووم: وەکهەڤی، دادپەروەری، پاقژی، دلسۆزی و پەروەردەیا نەتەوەیی، ڤان تشتان هەموویان ئەز ژ شۆرەشا گولانێ فێر بووم کو ب دروستی بنگەهێن نەتەوایەتیێ بوون.ئانکو چو جوداهی د ناڤبەرا چین و توێژان دا نەبوو، دناڤبەرا دیانەت و مەزهەبان و د ناڤبەرا دەڤەران دا د ناڤ شۆرەشا گولانێ دا چو جوداهی نەبوو. ژ بەر هندێ ئەم گەلەک جاران خوەزیان ژ بۆ وان پرەنسیپ و بنگەهان دخوازین. ئەم دخوازن ئەو بنەما یێن شۆرەشێ کو شۆرەشا گولانێ پی برێڤە دچوو، نها حکومەت و دەستهەلات هندەک ژ وان بنەمایان، ئەگەر نە هەموو ژی بن، وەرگرتبان و ل سەر بریڤە چوبا. شۆرەشا گولانێ گەلەک تشت دانە من و ئەز فێری گەلەک تشتان بووم.
٣- تە چ دا شۆرەشێ و شۆرەشێ چ دا تە؟
رزگار کێستەیی: ئەز نوزانم کا هەتا چو رادە ئەز کاریمە تشتەکی بدم شۆرەشێ و خزمەتا شۆرەشا گولانێ کریە؟ لێ ئەز د ١٧ سالیا خوە دا وەکە رێکخستنێ نهێنی یێ پارتیا دەمۆکراتا كووردستانێ، ئەز کەتم زیندانێ و د زیندانێ ژی دا، ئەز خوە سەربلند دبینم کو د ژیێ خوە یێ ١٧ سالی دا من بەرخوەدانەک گەلەک مەزن کر، من چو نهێنیێن حزبێ نەدان دەستێ دژمنی و من چو هەڤالێن خوە یێن ریکخستنا نهێنی ئاشکەرا نەکرن و من چو دانپێدان ژی ل سەر خوە نەدان، هەر چەندە بەلگە ژی د دەستێ دژمنی دا هەبوون، لێ من تشتەک ب دەست دژمنی ڤە بەرنەدا. ئەڤ ژی ژ بۆ من جهێ شانازیێ یە.
ژ ئالیەک دن ڤە، د ناڤا وان سالێن خوە یێن پێشمەرگاتیێ دا، ب کێماتی من پشکداری د ٥٣ شەر و داستانان دا کریە کو د گەلەک ژ وان شەر و داستانان دا من رۆلەک بەر ب چاڤ هەبوویە. د وان شەر و داستانان دا ئەز سێ جار، جارەکێ گەلەک ب گرانی و دو جاران ژی ب سڤکی بریندار بوومە. ل گۆر شیانێن خوە من دا شۆرەشێ و هیڤیدارم ئەز شیا بم خزمەتەکێ بکم.
وەکە من ل ژۆر ژی گۆتی،شۆرەشا گولانێ گەلەک تشت دانە من و کەساتیا من. ئەو بنامایێن مە ل ژۆر ئامەژە پێ کری نەتەوەیبوون، بەرخوەدان، دادپەروەری، پاقژی و دلسۆزی، شۆرەشا گولانێ ئەڤ هەموو دانە من و ئەز فێری گەلەک تشتان کرم.
داویێ ب ڤێ هەلکەفتێ ئەز گەرمترین پیرۆزباهیان پێشکەشی هەموو قەهرەمانێن شۆرەشا گولانێ دکم، ل هەموو مالباتێن شەهیدان و ب تایبەتی شەهیدێن شۆرەشا گولانێ و هەموو خەلکی کوردستانێ دکەم. سپاس ژ بۆ مالپەرا سبەهی.
رزگار کێستەیی
