شۆرەشێ ئەم فێری تێکۆشین و بەرخوەدانێ کرن
مالپەرا مە، سبەهی، ب هەلکەفتا شۆرەشا گولانێ دۆسیەیەک ڤەکریە ل ژێر ناڤێ: ئەز و شۆرەشا گولانێ.
د ڤێ چارچۆڤەیێ دا چەند پێشـەرگەیێ یێن دێرین بەرسڤا پرسێن مالپەرا مە ددن کو، یەک ژ وان ژی برێز زاگرۆس بەرواری یە.
سبەهی: تو وەک پێشمەرگە یێ دێرین، شۆرەشا گولانێ ژ بۆ تە چیە؟
زاگرۆس بەرواری: ل سەر دەما شۆرەشا گولانێ، هەر چەندە ئەز د تەمەنێ بجوکاهیێ دا بووم، لێ ژ بۆ من مەزنترین شانازی یە کو من بەشداری د شۆرەشا ٢٦ گولانێ دا کری. من ل داویا سالا ١٩٨٧ جەکێ وێ شۆرەشا کو، درێژە پێدەرا شۆرەشا مەزنا ئیلۆنێ بوو، هەلگرت. ژ بۆ ئازادیا گەل و وەلاتێ خوە ئەز بەردەوام د ناڤا تێکۆشین و خەباتێ دا بووم. کوردستانا نیشتیمان و دایکا مەزن خواندنگەها شۆرشێ بوویە ئەم د ناڤا وەلات و جڤاکێ دا ناڤدار کرن.
٢- تو چ ژ وێ شۆرەشێ فێر بووی؟
زاگرۆس بەرواری: ئەم فێری تێکۆشین و بەرخوەدانێ بووین، ئەم بوینە مرۆڤێن هشیار کو بەردەوام بین د ناڤا خەبات و تێکۆشینێ دا. ئەم بووینە کەسێن کو خوەدی هەلوێستێن نەتەوەیی بین و ل دۆزا وەلاتێ خوە، ل هەر چار پارچێن کوردستانێ، خوەدی دەرکەڤین. ئەم فێری هندێ بوین هەر جهێ ئەم لێبین، ل ناڤخوەیا وەلات بیت، دەرڤەیی وەلاتی بیت، زیندان بیت یان د ناڤا جەرگێ دوژمنی دا بیت، وێرێ بکەینە قادا شۆرەش و تێکۆشینێ.
٣- تە چ دا شۆرەشێ و شۆرەشێ چ دا تە؟
زاگرۆس بەرواری: مە وەک مالبات چەندین عەگید و لەهەنگێن مەزن دانە شۆرەشێ، ژ مام و پسمامان بگرە حەتا دگەهیتە بابێ. شۆرشێ ئەم بێی دلۆڤانیا بابێ هێلاین. لێ مەسترین شەرەف و روومەتا مەزنە ئەم کۆرە شەهیدێن شۆرەش و رێکا ئازادیا وەلاتی و پارتی بین ل سەر رێک و رێبازا بارزانی یێ نەمر.
بەلێ د رێکا شۆرشێ دا، ئەم ل ئەنفالا دەربەدەر و بێ مال و جهوار ماین، ئەم بووینە پەنابەر ل ناڤا وەلاتێن جیران ل پارچێن دی یێن داگیرکری یێن وەلاتی ژیانا ل ژێر چادران.. ئەم د بهارا تەمەنێ گەنجاتیێ دا ژ خواندنا د دەم و چاغێن خوە دا بێ بەهر کرین. لێ شۆرەش و بەرخوەدانێ گەلەک پێشکێشی مە کرن. ب سایا شۆرەش و خوینا شەهید و جانگۆریان ئەم ئەڤرۆکە د ناڤا وەلاتێ خوە دا ل پارچەکێ د ئازادین. سەرەرای کۆمەکا کێماسیان، لێ ئەم خودان دەستهەلات، حکومەت، پەرلەمان و سازیێن وەک سەرۆکاتیا هەرێما کوردستانێ کو هەرێمەکا فەدەرالی یە و دەستوورا ئیراقێ دانپێدان دایە.. دیسان ئەم فێری پرۆسێسا هەلبژارتنێ بووین کو وەک وەلاتێن پێشکەفتی د رێکا پرۆسێسا هەلبژارتنێ دا بگەهینە دەستهەلاتێ، ئەڤ سەروەری هەمو ب سایا وێ شۆرەشێ و خوینا جانگۆریان بوویە..
هەر سەرکەفتی بن مالپەرێ پێشەنگ مالپەرێ سبەهی
