شێلادزێ و قەیومێن دیاربەكر وان و مێردین
د دەستپێكا ئیسال دا، سالا 2019ێ، خەلكێ دەڤەرا شێلادزێ ژ بۆ نیشاندانا نەرازیبوونا خوە ل دژی بۆمبەباران و تۆپبارانكرنا دەڤەرا وان ژ ئالیێ دەولەتا تركیێ ڤە، خوەپیشاندانەكا ئارام و ب ئاشتی كر، د دەما برێڤەچوونا خوەپێشاندانێ دا ئاراسەتا وێ ھات گوھەرتن و بەشەك ژ خوەپێشاندەران چوونە سەر بارەگایێ لەشكەرێ تركیێ و ئەو بارەگا شەوتاند.
مەدیا پارتیا كاركەرێن كوردستانێ (پەكەكە) و ھەموو سازیێن راگەھاندنێ یێن سەر ب وێ و تەرەفدارێن وێ پێلەكا راگەھاندنێ یا بەفرەھ دەست پێ كر و ئەو بوویەرا ل شێلادزێ قەومی ب “سەرھلدان” ل دژی تركیێ و دەستھەلاتا باشوورێ كوردستانێ ب ناڤ كر. مەدیا پەكەكێ و سیبەرا وێ بانگ ل خەلكێ باشوورێ كوردستانێ كر كو وێ “سەرھلدان”ێ ل دژی دەولەتا تركیێ بەردەوام و بەرفرەھ بكن.
ئەڤە ژ ئالیێ سیاسی و جەماوەری ڤە، ژ ئالیێ خەباتا چەكداری ژی ڤە، پەكەكێ مەیدانا خوە یا راستەقینە یا شەرێ چەكداری، خەبات و تەكۆشینا ل دژی دەستھەلاتا تركیێ كو باكورێ كوردستانێ یە چۆل كریە و ھەموو ھێزا خوە یا چەكداری ڤەگوھاستیە باشوورێ كوردستانێ و دخوازە ل باشوورێ كوردستانێ “شەرێ” تركیێ بكە.
براستی دەما مرۆڤ ڤێ تابلۆیا سیاسەتا پەكەكێ ل بەر چاڤێن خوە ددەینە، مرۆڤ عەجێبمایی دبە. پەكەكە پارتیەك یا باكورێ كەردستانێ یە و ھەموو جەماورەرێ وێ پارتیێ ل باكورێ كوردستانێ و ل تركیێ یە. لێ دخوازە ل باشوور “سەرھلدان”ێ ل دژی تركیێ بكە.
ھەروەسا ژ ئالیێ لەشكەری و چەكداری ژی ڤە، شانۆیا خەباتا وێ یا چەكداری باكورێ كوردستانێ و تركیێ یە، لێ وێ ھەموو ھێزا خوە یا چەكداری ل باشوورێ كوردسانێ، ل ھەرێمەكا ئازاد و خوەدی دەستھەلات و حكومەت، سەرفەربەر كریە و دخوازە ژ باشوور شەرێ تركیێ بكە.
ئەڤ تابلۆیەك سەروبنە.
د ڤان چەند رۆژان دا رژێما تركیێ سێ شارەدارێن باژارێن مەزن یێن باكورێ كوردستانێ؛ دیاربەكر، وان و مێردین ژ كار ئاڤێتن و قەیوم ل جھێ وان دانان. ئەو ھەر سێ شارەدار ژ ئالیێ خەلكێ وان باژاران ڤە ھاتبوون ھلبژارتن لێ ل رۆژا قەومینێ كەس ل وان نەبوو خوەدان. ئەو خەلكێ ل ھەر سێ باژاران دەركەتین كۆلانان و خوەپێشاندان كری و نەرازیبوونا خوە ل دژی بریارا دەولەتا تركیێ نیشان دای ھەموو ب ھەڤ رە ھندی جەماوەرێ شێلادزێ نەبوو.
ئەڤ ژی ئیفلاسبوونا پەكەكێ و ھەدەپێ ل باكورێ كوردستانێ نیشان ددە.
2019.08.29
NH
