بەغدا مۆچەی نادەت
ئیدریس تروانشی
دڤێت مە کوردا باوەریەکا ڕەھا ھەبیت، کو چ جارا، دوژمنێن مللەتێ مە، چاکیا مە نەڤێت. پێدڤیە ئەڤ باوەریە پرینسیپەکێ مە یێ سەرەکی و نەگۆڕبیت. جھێ حێبەتیێ یە، کو ھەتا نوکە دناڤ مللەتێ مە دا ھندەک کەس و لایەن ھەبن باوەری ب چاکیا بەغدایێ ھەبیت.
ئەگەر دوژمنکاریا بەغدایێ یا دوھی، دگەل مە کوردا، ل سەر بنەمایێ دەمارگیریا نەتەوەیی بیت، دوژمنکاریا بەغدایێ یا ئەڤرۆ دگەل مە، زێدەباری وێ چەندێ، ل سەر بنەمایێ دەمارگیریا مەزھەبی یە ژی.
دوژمنکاریا مسلمانێن شیعە مەزھەب، ل دژی مللەتێ کورد، رەھندەکێ کەڤنێ دیرووکی ھەیە، بۆ سەردەمێ ژناڤبرنا دەولەتا فاتمێ یا شیعە مەزھەب، ل سەر دەستێ سلتان سەلاحەدینێ ئەیوبی دزڤڕیت.
ژ وێ ڕۆژێ و ھەتا ئیرۆ موسلمانێن شیعە مەزھەب ب چاڤێ دوژمنکاریێ و تۆلەستاندێ، سەرەدەریێ دگەل مللەتێ کورد دکەن.
وان چ جارا، خەمساری د تەشھیرکرن و ناڤزڕاندنا سەلاحدینێ ئەیوبی و مللەتێ کورد دا ژی نەکریە.
ئەگەر ئەم کورد د زانستێ سیاسەتێ دا سادە و ساکار و زوی باوەربین، پێدڤیە ل سەر وی بنەمایی، ھەلسەنگاندنێ بۆ دوژمنێن خوە نەکەین.
سەبارەت مۆچەیێ فەرمانبەرێن ھەرێما کوردستانێ و ھەوڵدانێن ھەموو لایەنێن کوردستانی ل بەغدایێ، ژ بلی پارتییا دەمۆکراتا کوردستانێ، نەخاسمە یەگرتوویا ئیسلامی، دگەل لایەنێن شیعە، ژبۆ کو مۆچەیێن فەرمانبەرێن ھەرێما کوردستانێ ڕاستەوخۆ ژ لایێ بەغدایێ ڤە بھێنە خەرج کرن.
پێدڤیە ئەڤ لایەنانە، ل پێشیا ھەر تشتی بزانن، کا مۆچەخۆرێن ھەرێما کوردستانێ، ئەوێن بەغدا دانپێدانێ پێ دکەت وەکو مۆچەخۆر کینە!!
ئەگەر ئەڤ لایەنە، خوە ب کورد و نوێنەرێن مللەتێ کورد بزانن، پێدڤیە وان خوەندنەکا کەتواری یا ڕاست و دروست بۆ مەرەم و ئارمانجێن دەسھەڵاتدارێن شیعە مەزھەب و پشتەڤانا وان، کۆمارا ئیرانا ئیسلامی ھەبیت.
ب دیتنا من یا سادە، ژ بلی مامۆستایێن قوتابخانان، فەرمانبەر و کارمەندێن ڕێڤەبەریێن میری ( پەروەردە، تەندروستی، ڕەگەزنامە، کشتوكال، باج و تاپۆ، پۆلیسێن ناڤخوەیی و ھاتن و چوونێ، خانەنشینێن ڤان ڕێڤەبەریا) چ کەسێن دی ب مۆچەخۆر و فەرمانبەر و کارمەند ژ لایێ بەغدایێ ڤە ناھێن ھەژمارتن.
ئانکو، ھەمی ھێزێن پێشمەرگەی، ب یەکەیێن ٧٠ و ٨٠، ھێزێن زێرەڤانی، ھێزێن ژینگەھێ، ئاسایش، پاراستن، ھێزێن تایبەت، زێرەڤانێن بەرپرسا، ئەندام و کادر وبەرپرسێن حزبی یێن ھەموو حزبا، خانەنشینێن پێشمەرگەی، شەھید، زیندانیێن سیاسی، کو ھەژمارە وان ب سەدان ھزارن، دێ ل دەرڤەی حساباتێن بەغدایێ بن، ئانکو دێ مۆچەیێن وان ھێنە بڕێن.
مۆچەیێ فەرمانبەرا و بودجەیا ھەرێما کوردستانێ، بتنێ کەرەستەیێن گڤاشتنێ و ھاندانا خەلکی نە ل دژی حکومەتا ھەرێما کوردستانێ.
ئارمانجا بەغدایێ ا یا ڕۆن و نەڤەشارتی، ژ چەکرنا ھێزێن پێشمەرگەیە و ڤالاکرنا کوردستانێ ژ دەزگەھێن وێ یێن ئارامی و ئاسایشێ یە. داکو پشتی ھینگێ ب ساناھی بشێت، دەسھەڵاتداریا خوە ل سەر ھەرێمێ بسەپینیت، مینا باژێڕێن سونەیان (حەشدا شەعبی) ئەوا دبێژنێ (مقدس) باڵادەستکەن، جادە و کۆلان و باڵەخانەیێن کوردستانێ ب وێنێن خومەینی، خەمەنائی، سولەیمانی و ئەبو مەھدی ئەلموھەندس داپۆشن و ل ھەموو کۆچە و کۆلانێن گوند و باژێڕێن مە، حوسەینیان ڤەکەن و بازاڕێ سیخەکرنێ گەرمکەن.
تشتێ سەیر و سەمەڕ ئەوە، حزبەکا سونە مەزھەب، وەکو یەگرتووییا ئیسلامی، کو ڕێبازا (اخوان مسلمین) پەیرەو دکەت، کو د ململانەکا ھزری یا کویردایە دگەل شیعەیا، کو گەھشتیە ڕاددەیا تەکفیرکرنێ و پێدڤیە ژ ھەموو لایەنێن دی، پتر شەھرەزایی دید وئارمانج و ئایدیولۆژیا وان بیت، ب کەڤیتە دناڤ داڤێن ڤێ لیستکا قڕێژی دا.
