حهلهب باژارهکێ سووریه و گهلهک کورد ل حهلهبێ نشتهجینه. پرانیا کوردێن کو ل حهلهبێ نشتهجینه ژ دهڤهرا عهفرینێ و چیایێ کورمێنجن. ژ بهر کو ناڤچهیا عهفرینێ گرێدایێ باژارێ حهلهبێ یه.
پەکەکە چهوا کو د ناڤا کوردێن ڕۆژاڤا دا خوهدی باندۆره ل باژارێ حهلهبێ ژی خوهدی باندۆره. چهکدارێن وان ههنه و ل گۆرا خوه ژی ڕێڤهبهریهک ئاڤاکرنە. دهما ڕژێما ئهسەد هاته ڕووخاندن ل حهلهبێ تاخێن شێخمەەقسود و ئهشرهفیێ د دهستێ چهکدارێن پەکەکێ دا مان و ل گۆرا ل ههڤهاتنهک ناڤبهرا رژێما نوو یا سووری و پەکەکێ دا وان ل ڤان تاخان ڕێڤهبهریهک ئاڤاکرن و باندۆرا خوه بهردوام کرن.
نها رژێما شامێ دخوازه پەکەکە چهکدارێن خوه ژ ڤان تاخان دهرێخن و ئهو ههرن باکورێ فراتێ. یانی ههرن ههرێمێن د بن دهستێ هەسەدێ دا.
شهرێ ئیرۆ ناڤبهرا رژێما سووریێ و چهکدارێن پەکەکێ ل حهلهبێ دهرکهتی ئهڤه. فایدەیا ڤی شهری ژ کهسهکی را نینە و شهرهک بێ واتهیه. کورد تێنه کوشتن، کوردێن حەلەبێ ژ جی و وارێن خوه کۆچبەر و پهنابهر دبن، ڤێ زڤستانێ زارۆکێن وان ژ خوهندنێ بێپار دبن و ل ڤێرە و دهرا هەنێ ههولددن ب ئاوایهکی ژیانا خوه بهردهوام بکن و پهریشان دبن. یانی ب کورتی ئهڤ شهرێ بێ واته زهرهرهک مهزن دده کوردا.
ژ ئالیهک دن ڤه، تێ ئیدیعاکرن کو، گهلهک چهکدارێن پەکەکێ کو ژ قهندیل هاتنه، هندهک چهکدارێن رژێما بهرێ یا ئهسەد و ههڤالبهندێن حزبوڵا یا لبنانی ل ڤان دهڤهران خوه ڤهدشێرن. ئهڤ ئیدیعایه چقاس ڕاسته- نه ڕاسته د بنگههێ خوه دا گهلهک کهسێن سیاسهتێ ڤه مژوولن دزانن. لێ ههرکهس خوه بێ دهنگ دکه، بهلکی ئهڤ ژی سیاسهتهکا دنه. لێ گهرهک کورد بزانن و تێبگەهن سیاسهتا کو پەکەکە ڕێڤه دبه ژ کوردا پتر د خزمهتا هندهک جهێن دن دا یه. چو جارا ئارمهنجا سیاسهتا وان نهبوویه بهرژهوهندیێن نهتهوی یێن کوردا. ئهگهر ئهڤ یهک بێ زانین و ل گۆرا وێ بێ تهڤگهراندن، ئیحتمالا کورد ژ کومکۆژیهکی خلاس ببن پتر دبه.
رژێما سووریێ یا کو ئیرۆ ههیە، رژێمەکە وهک ههر ڕهژمێەکا دهولهتێن کو کورد دابهش کرین داگیرکهره. چو گۆتوبێژ د ڤێ دهربهرێ دا نایێ کرن. لێ ئهم ژ بیر نهکن کو، ههر دهمی پەکەکێ خوه پاراستیه ڤان داگیرکهران و زهرهر دایه خهتا نهتهوی یا تهڤگهرا ئازادخوازا کوردستانێ.
نابە مرۆڤ ب ئاوایهک حسی ڤان مهسهلهیان بنرخینه. ژ ئالیهکی ڤه ئیحتمالهک مهزن ههیه کو، ئهڤ تهڤگهرا ئیرۆ ل ڤان ههردو تاخێن حهلهبێ دبه ژ ئەنجامێ تەڤلیهەڤییا د ناڤا پەکەکێ ب خوه دا بە ژی. ئهو ئۆجەلانێ ب ههر مناسهبهتێ داخوویانیا ژ ئیمرالیێ دده، د ڤێ پرسێ دا ههتا نها بێ دهنگه. گهلۆ کهسهک سهدهمێ ڤێ بێدەنگییێ دپرسه؟
گرێدانا ڤان بوویهران ب پێڤاژۆیا ل ترکیێ و باکورێ کوردستانێ کو ب ناڤێ “ترکیهیا بێ تهرۆر” دهستپێکری ڤه ههیه یان نینە؟ ئهڤ ژی پرسهک دنه..
پیشتی ڤی شهر دهستپێکری، زێدهیی ۲۰ ههزار مالبات کۆچبهر بوونه و بهرێ خوه دانه عهفرینێ، دهزگههێ خێرخوازیا بارزانی ب ههموو ئیمکانا خوه ههولدده هاریکاریا ڤان مالباتان بکە داکو پەریشان نەبن.
ژ ئالیهک دن ڤه، سهرۆک بارزانی ل گهل سهرۆکێ سووری و نوونەرێ تایبهت یێ ئامهرکایی ئاخڤی ژ بۆ کوردان ل ڤێ دهڤهرێ ژ کاراسهتهک دن خلاس بکه. وهک دن داخوویانیێن ب ههماسهت چو ئاڤهکێ ب ڤی ئاگرهکی دا ناکه و کوردا ژ مالوێرانیێ خلاس ناکه.
دڤێ ڕاستیا ههیی بێ دیتن ل گۆرا وێ ژی ههلوهستهک بێ دانین. گهلهک بالکێشه کو، پشتی سهردانا مەزلووم ئهبدی ب ڕۆژهکی و ههروهها پشتی جڤینا ئیسرائیل، سووری و ئامریکایێ ل فرانسایێ ئهڤ ئێریشا چهکدارێن رژێما سووریێ بۆ سەر ڤان ههردو تاخان دەست پێ کر.
ئهم ههموو دزانن داوییا ڤی شهری دێ ل ههڤهاتن به، چهکدارێن پەکەکێ دێ ڤهکشن. لێ کوردێن سڤیل کو هاتین کوشتن، دههێ ههزارێن کو تهرکا مالێن خوه کرین دێ ب خووسارا خوه بمینن.
ڕهوش نه باشه و ههرکهس ب ئاوایهکی ب گۆتنا دبێژه دمینه، لێ کورد دێشن و زهرهرهکی مهزن دبینن.
بلا کهسهک خوه نهخاپینه و بهحسا سهرکهفتنهک د ڤان بوویهران دا نهکه..!
١٠\١\٢٠٢٦
نێرین/ شرۆڤه
