نه‌ته‌وه‌یا کورد، نه‌ته‌وه‌یه‌ک بنده‌سته. وه‌لاتێ وێ کوردستان به‌ش بوویه. کوردستان ژ ئالیێ چار ده‌وله‌تان ڤە هاتیه داگیرکرن، کۆلۆنی کرن. لۆما ژی ھێشتا د سه‌دسالا ۲۱ئان دا ژی، ل سێ پارچه‌یێن کوردستانێ، نه‌ته‌وه‌یا کورد ژ هه‌موو مافێن خوه یێن ملی بێ پاره. ده‌ستهلاتدار و سه‌روه‌ر نینه. به‌س ل باشوورێ کوردستانێ خوه‌دیێ مافێ ملی یێن چاندی، سیاسی، جڤاکی نه.
ده‌ستهلاتداری و سه‌روه‌ریا ل باشوورێ کوردستانێ ژی سینۆر کریه.
ل دنیایێ نه‌ته‌وه‌یا نه خوه‌دیێ ده‌وله‌ت، به‌س نه‌ته‌وه‌یا کورده. ئه‌ڤ یه‌کا ژ بۆنا نه‌ته‌وه‌یا کورد ب خوه ژی، ژ بۆنا دنیایا کو هه‌ق و هقووق و ده‌مۆکراسی و مافێن نه‌ته‌وه‌یێن بنده‌ست دپارێزن، شه‌رمازاریه‌که.
ئه‌و ڕه‌وشا نه‌ته‌وه‌یا کورد کو نه خوه‌دیێ ده‌وله‌تێ یە، ل دژی په‌یمانێن ناڤنه‌ته‌وه‌یی یه. ل دژی پیڤان-پره‌نسیپێن مافێ چاره‌نڤیسیا نه‌ته‌وه‌یانه. خه‌سپبوونا ئیراده‌یا نه‌ته‌وه‌یا کورده. زوولمه‌که مه‌زن ئه.
لۆما شه‌رێ دۆم دکه. شه‌رێ سه‌رخوه‌بوون و ئازادیا نه‌ته‌وه‌یا کورد، ده‌وله‌تبوونا نه‌ته‌وه‌یا کورد و سه‌رخوه‌بوونا کوردستانێ یه.
دیاره کو ئه‌ڤ شه‌رێ نه‌ته‌وه‌یا کورد یا سه‌رخوه‌بوون و ئازادیێ و ده‌وله‌تبوونێ دێ ده‌مه‌که دن یا درێژ دۆم بکه.
ئه‌ڤ شه‌رێ سه‌رخوه‌بوون و ئازادیا کوردستانێ و ده‌وله‌تبوونا نه‌ته‌وه‌یا کورد، ب گه‌له‌ک ئاوایان دۆم دکه و دێ دۆم بکه. ئه‌ڤ شه‌ر ب ئاوایێ شه‌رێ پێشمه‌رگه‌تی، ب ئاوایێ شه‌رێ سیاسی و جڤاکی و بێیتاتکاری دۆم بکه.
ده‌ما کو شه‌رێ سه‌رخوه‌بوونا کوردستانێ تێ ئاژۆتن، دڤێ ئامراز و مه‌تۆدێن مه‌شروع ب کار بێن. ئامراز و مه‌تۆدێن نه مه‌شروع و نه ڕه‌وا زرار ددن دۆزا سه‌رخوه‌بوونا کوردستانێ و د ھەمان دەم دا دێ مه‌شروعبوون و ڕەوابوونا دۆزا سه‌رخوه‌بوونا کوردستانێ ژی ژ هۆلێ ڕاکه. ژ ڤێ یه‌کێ زێده‌تر ده‌وله‌تێن کۆلۆنیالیست ژێ ئیستفاده دبینن.
ڕاستی ژی ده‌ما ل جه‌رباندنا نه‌ته‌وه‌یێن هه‌موو دنیایێ و جه‌رباندنا تێکۆشینا سه‌رخوه‌بوونا کوردستانێ ژ چاڤ بێ ده‌رباس کرن، گه‌له‌ک ب ڕه‌حه‌تی دێ بێ ته‌سپیت کرن كو نه‌ته‌وه‌یێن دنیایێ و نه‌ته‌وه‌یا کورد ژ رێك و ئامرازێن نه ڕێوا زرار دیتنه. شه‌رێ پیرۆز یێ سه‌رخوه‌بوونا نه‌ته‌وه‌یان تێک چوونه و شکه‌ست خوارنه.
*کوردپه‌روه‌ر و ڕێخستنێن کوردپه‌رووه‌ر یێن کوردستانێ، دڤێ به‌ریا هه‌ر تشته‌کی ژ ئینسانێن خوه حه‌ز بکن. هەم ژی ژ هه‌موو ئینسانێن خوه حه‌ز بکن. وان کاته‌گۆریزه نه‌کن. له‌ورا سه‌رخوه‌بوونا کوردستانێ ژ بۆنا هه‌موو چین و ته‌به‌قه‌یێن کوردستانێ یه.
لۆما ژی دڤێ چ دبه بلا ببه ئینسانێن کورد و کوردستانێ دژمن نه‌یێن حه‌سباندن. دڤێ ئینسانێن کورد و کوردستانی بێن پاراستن.
کوشتنا کوردان و کوردستانیان ژ بۆنا کوردپه‌روه‌ر و ڕێخستنێن وه‌لاتپه‌روه‌ر و یێن دۆزا سه‌رخوه‌بوونا کوردستانێ دمه‌شینن، دبه تێک چوون.
سه‌رۆکێ ملی و ئه‌فسانه‌وی مه‌لا مسته‌فا بارزانی ده‌ما کو کوردپه‌روه‌ران و به‌رپرسیارێن پەدەکێ خوه‌ستنه کوردێن ب دژمن ڕا هه‌ڤالبه‌ندن، بکوژن، ل دژ ده‌رکه‌تیه. گۆتیه کو “دژمن ئینسانێن مه یێن باش دکوژن. ده‌ما ئه‌م ژی کوردێن خوه یێن خراب بکوژن، وێ ده‌مێ کورد نامینن.”
سه‌رۆککۆمارێ ده‌وله‌تا مه‌هاباد یا کوردستانێ قازی محه‌مه‌د دبێژه کو “کورد دڤێ ژ هه‌ڤوودو حه‌ز بکن. یه‌کیتیا خوه بپارێزن.”
ئه‌ڤ فکرێن سه‌رۆک مه‌له مسته‌فا بارزانی و سه‌رۆککۆمارێ کوردستانێ قازی محه‌مه‌د گه‌له‌ک د جھ دا نه.
دڤێ کوردپه‌روه‌ر و ڕێخستنێن کوردستانێ ڤێ نه‌رینێ بدن به‌رچاڤ. شه‌رتێن کوردستانێ و شه‌رێ درێژ یێ سه‌رخوه‌بوونا کوردستانێ هه‌ر ده‌م بدن به‌ر چاڤ کو ئینسانێن مه ژ بۆنا پاراستنا خوه گه‌له‌ک مه‌تۆدان ب کار تینه. ئه‌و مه‌تۆدان پر جاران وه‌ک هه‌ڤالبه‌ندیا دژمن و ده‌وله‌تێن کۆلۆنیالیست تێ شرۆڤه کرن، ئه‌ڤ یه‌کا شاشیه‌که مه‌زنه.
*دڤێ کوردپه‌روه‌ر و ڕێخستنێن کوردستانێ د شه‌رێ سه‌رخوه‌بوون و ئازادیێ دا، ژ وه‌لاتێ خوه کوردستانێ حه‌ز بکن. هه‌موو هه‌بوون و هێژاییێن وه‌لاتێن خوه، چیا، ده‌شت، زۆزانێن خوه، چه‌م و دارستانێن خوه حه‌ز بکه. د شه‌رێ خوه دا زه‌رار نه‌ده هه‌بوونا وه‌لاتێن خوه.
*کوردپه‌روه‌ر و ڕێخستنێن کوردستانێ، دڤێ ب تایبەتی ژ زارۆک و جوانێن خوه حه‌ز بکن، وان بپارێزن. جوانێن خوه ژ بۆنا په‌روه‌رده ببن ژ وان ڕا ده‌رفه‌تان چێ بکن. لۆما ژی وان ب هێسانی فێدا نه‌کن و نه‌دن کووشتن. دڤێ جوانان وه‌ک چاڤێن خوه بپارێزن. زارۆکێن ۱۳-۱٤ سالی دڤێ هیچ ده‌مه‌کێ نه‌کن له‌شکه‌ر و پێشمه‌رگه.
له‌ورا زارۆک و جوان پێشه‌رۆژا مه نه. پێشکه‌تنا کوردستانێ و ڕۆنیبوونا نه‌ته‌وه‌یا مه ب پێشکه‌تن و ب په‌روه‌ردایا وان پێک تێ.
*دژمن هه‌ر ده‌م دخوازه کو ناکۆکی و دژمناتیا ناڤ نه‌ته‌وه‌یا کورد و کوردستانیان زێده بکه. دڤێ کوردپه‌روه‌ر و ڕێخشتنێن کوردستانێ ژ بۆنا کو ناکۆک و دژمناتیا د ناڤ گه‌ل دا زێده نه‌به و کێم ببه، خه‌بات بکه.
ب تایبه‌تی ل کوردستانێ هه‌بوونا ئه‌شیره‌تان ژ بۆنا نه‌ته‌وه‌یا کورد ده‌وله‌مه‌ندیه‌که. دڤێ کوردپه‌روه‌ر و ڕێخستنێن کوردستانێ هه‌ر ده‌م ل دژی شه‌رێن ئه‌شیره‌تان ڕاوه‌ستن، پێشیا شه‌رێ ئه‌شیره‌تیێ بگرن.
*رێخستنێن کوردستانێ به‌شه‌ک ژ جڤات و نه‌ته‌وه‌یا کوردن. ژ بۆنا جڤات و نه‌ته‌وه‌یا کورد ژی ئاکتۆرێن گه‌له‌ک گرینگن. له‌ورا شه‌رێ سه‌رخوه‌بوونا کوردستانێ ب ده‌ستێ کوردپه‌روه‌ر و ڕێخستنێن کوردستانێ دێ بێ مه‌شاندن.
ل کوردستانێ ژی هه‌بوونا ڕێخستنێن جوودافکر و جوودا به‌رنامه گه‌له‌ک خوه‌زایی یه. ڕاستیا کوردستانێ ژی ڤێ یه‌کێ دیار دکه.
لۆما ژی دڤێ ڕێخستنێن کوردستانێ ژی ژ هه‌ڤوودو حه‌ز بکن، دژمناتی و شه‌رێ هه‌ڤوودو نه‌کن.
*کوردستان و نه‌ته‌وه‌یا کورد، ژ ده‌رڤه‌یی ئیراده‌یا خوه پارچه بوویه. دڤێ کوردپه‌روه‌ر و ڕێخستنێن کوردستانێ، ژ هه‌موو به‌شێن کوردستانێ ـه‌ز بکن و ژ مافێن هه‌موو به‌شان ڕا ڕێز بگرن.
*نه‌ته‌وه‌یا کورد و کوردستانی خوه‌دیێ دۆزه‌کێ نه. ئارمانجا نه‌ته‌وه‌یا کوردستانێ سه‌رخوه‌بوونا و ئازادیێ یه. لۆما ژی ئارمانجا کوردپه‌روه‌ر و ڕێخستنێن کوردستانێ کووشتنا ترکان، عه‌ره‌بان، فارسان ژی نینه.
هه‌زار مخابن پەکەکە ڕۆژا کو ئاڤابوویه ل دژی ڤان پیڤانان ده‌رکه‌تیه. د ڤێ قۆناغێ دا ژی ل هه‌موو به‌شێن کوردستانێ ل دژی ڤان پیڤانان ده‌ردکه‌ڤه. ژ ئینسانێن کورد و ژ هێژایی و هه‌بوونا کوردستانێ حه‌ز ناکه.
د ڤان ڕۆژێن داوی دا سه‌رهلدانا دایکێن زارۆکێن ۱۳ سالی و جوانان ل دژی پەکەکێ ژی نیشان دده كو گه‌له‌ک ئاشکه‌ره ده‌ردخه هۆلێ کو پەکەکێ زارۆک و جوانێن کوردستانێ که‌یفی دده کووشتن.
لۆما ژی پەکەکە ڕێخسته‌نه‌ک کوردپه‌روه‌ر و ڕێخستنا کوردستانێ نینه. ڕێخستنه‌کا بیانی یه. پرۆژه‌یا ده‌وله‌تا ترک بوو. نووها بوویه پرۆژه‌یا چار (٤) ده‌وله‌تێن کۆلۆنیالیست. زرارێ دده ئینسانێن کورد و هه‌بوونێن کوردستانێ. هه‌موو ڕێ و ڕێبازێن پێک تینه نه ڕه‌وا نه.
ئامەد 2019.09.19
ئیبراهیم گوچلو
