سیاسی

شەرەدەڤێ تركیە و سوێدێ

وه‌زیرا ده‌رڤه‌ یا سوێدێ ئان لیند ژ وه‌زیرێ ده‌رڤه‌ یێ ترکیەێ مه‌ڤلوت چاڤوشۆگلو ڕا‌ گۆت کو ئێدی ژ سووریێ ده‌رکه‌ڤن و ئه‌م وه‌ هشیار دکن. ل سه‌ر ڤێ یه‌کێ مه‌ڤلوت چاڤوشۆگلو هێرس بوو و گۆت: “وه‌ ئه‌و هێز ژ کێ ستاندیە هه‌تا کو ترکیەیێ هشیار بکن.”

وه‌زیرا ده‌رڤه‌ یا سوێدێ ئان لیند‌ رۆژا 13ێ جۆتمه‌ها 2020ێ سه‌ردانا ئه‌نقه‌ره‌یێ کر و دگه‌ل وه‌زیرێ ده‌رڤه‌یێ ترکیەیێ مه‌ڤلوت چاڤوشۆگلو جڤیا و هشیاری دا  چاڤوشۆگلو و ژ ترکیێ داخواز کر کو ژ ئازه‌ربایجان و سووریێ ڤه‌کشه‌ و بنپێکرنا مافێن وه‌لاتیێن کورد ڕاوه‌ستینه‌.

پشتی هه‌ڤدیتنێ د ده‌ما جڤینا ڕۆژنامه‌ڤانی یا هه‌ڤبه‌ش دا‌ ناڤبه‌را ئان لیند و مه‌ڤلوت چاڤوشۆگلو شه‌رەدەڤ ده‌رکه‌ت.

ئان لیند ژ ترکیەیێ داخواز کر کو هێزێن خوه‌ ژ ئاخا سووریێ ڤه‌کشینه‌ و ئه‌و وه‌لات ب دابه‌شکرنا ئاخا سووریێ و چه‌وساندنا کوردێن خەتابار کر.

ئان لیند‌ ژ چاڤوشۆگلو ڕا گۆت: “ئه‌م ل وێ یه‌کێ مکوور تێن ‌ کو ترکیە ڕووبروویێ چه‌ند ئاسته‌نگان دبه‌ ل وه‌لاتێن ده‌ردۆرا وێ. د هه‌مان ده‌مێ دا‌، ئه‌ز ب زه‌لالی به‌هسا هه‌لوێستا مه‌ ل باکورێ ڕۆژهلاتێ سووریێ دکم کو هه‌یا نها هه‌لوێستا بهێز یا یه‌کێتیا ئه‌ورۆپایێ وه‌که‌ خوه‌ مایه‌، ئه‌م داخواز ژ ترکیەیێ دکن کو ژ وێ ھەرێمێ ڤه‌کشه‌.”

ئه‌ڤ گۆتن ب دلێ چاڤوشۆلو نەبوون، هێرس بوو، به‌رێ خوه‌ دا ئان لیند و گۆت: “هوون ب چ هه‌قی ژ مه‌ دخوازن ئه‌م ژ سووریێ ده‌رکه‌ڤن! وه‌ ده‌ستوور ژ کێ ستاندیه‌ هوون ژ مه‌ بخوازن ئه‌م ژ سووریێ ده‌رکه‌ڤن، ئه‌م ناخوازن سووریێ پارچه‌ بکن، هوون سووریێ پا‌رچه‌ دکن، هوون ئالیکاریا یەپەگێ  و پەكەكێ دکن.”

چاڤوشۆگلو هه‌روها گۆت، ئه‌و پشتگریا کوردان دکن ل سووریێ و وان و ته‌رۆریستان ژ هه‌ڤ جودا دكن.

وه‌زیرێ ده‌رڤه‌ یێ ترکیێ د ئاخاڤتنا خوە دا گەڤ ل وەلاتێن ئەورۆپایێ كرن کو ئه‌گه‌ر ترکیه‌ هێزێن خوه‌ ژ ئدلبێ ڤه‌کشینه‌، زێده‌تری 3 ملیۆن په‌نابه‌رێن سووریێ دێ به‌رێ خوه‌ بدن وه‌لاتێن ئه‌ورۆپایێ.

وەزیرا دەرڤە یا سوێدێ د ناڤا ئاخاڤتنا خوە دا گەلەك جار پەیڤا دڤێ بكارئانی وەك میناك گۆت كو دڤێ ھوون مافێ كوردان بن پێ نەكن، دڤێ ھوون ژ باكوورێ رپژھەلاتێ سووریێ (رۆژاڤایێ كوردستانێ) دەركەڤن، دڤێ ھوون دەمۆكراسیێ بپارێزن

چاڤوشۆگلو گۆت: “هنده‌ک گۆتن و پەیڤ هه‌بوون کو هه‌ڤپیشەیا من ئان لیند د داخویانیا خوه‌ دا‌ بکار ئانین و ئه‌ز دخوازم ل سه‌ر وان ڕاوه‌ستم. بۆ نموونه‌ دڤێ ترکیە ژ سووریێ ڤه‌کشه‌. کو تێ واته‌یا ئه‌م هشیاریێ ددن ترکیێ کو ژ سووریێ ڤه‌کشه‌. بکارانینا گۆتنا دڤێ د دبلۆماسیێ دا‌، بۆ که‌سه‌کی بن خوه‌ ڕا‌ بکار تینه‌، ئه‌ڤ نه‌ گۆتنا مناسبە، ئه‌ڤ گۆتن شاشه‌. تو دکاری بێژی، ئه‌م داخواز دکن. ئه‌ڤ ئه‌رێ یه‌. ئه‌ز دخوازم بپرسم، ب چ ده‌ستهلاته‌کێ هوون دبێژن، دڤێ ترکیە ژ سووریێ ڤه‌کشه‌ یان ژی هشیاریێ ددن ترکیەیێ.”

Back to top button