ل کامپا شاریا یا ل پارێزگەھا دهۆکێ ئاگر ب چادرێن كۆچبەرێن دەڤەرا شنگالێ که‌ت و نێزیکی 150 چادرێن وان كوردێن ئێزدی كو ل وێ كامپێ دژین، شه‌وتین. ھەتا نھا ب دروستی نەھتیە زانین كا ئەگەرێ ئاگرپێكەتنێ چیە، لێ ل گۆر زانیاریێن ده‌ستپێکێ، شه‌وات ژ به‌ر کۆنتاکتا ئه‌له‌کتریکێ چێبوویە.
سه‌رۆکێ هه‌رێما کوردستانێ ژ بۆ هه‌ڤکاری و ئالیکاریا زیاندیتیێن کامپا شاریا بەرھەڤیا خوه ڕاگەهاند و ئالیێن په‌یوه‌ندیدار ژی ڕاسپارد کو هه‌ر چو پێدڤی بە ئالیكاریا لێقەومیان بكن.
سه‌رۆکێ هه‌رێما کوردستانێ نێچیرڤان بارزانی ئێڤاریا رۆژا ئینێ، 2021.06.04 ب تەلەفۆنێ دگەل پارێزگەھێ دھۆكێ ئاخڤیێ و نێچیرڤان بارزانی د وێ پەیوەندیا تەلەفۆنێ دا بەرھەڤیا خوە و سەرۆكاتیا ھەرێما كوردستانێ ژ بۆ ھەموو ھەڤكاری و ئالیكاریا ژ بۆ لێقەومیێن كامپا شاریا یا كوردێن ئێزدی نیشان دا و ئالیێن بەرپرسیار ژی ئەركدار كرن كو ھەر چو پێدڤی بە ژ بۆ خەلكێ زیاندیتی بكن.
سه‌رۆکوه‌زیرێ کوردستانێ، مه‌سروور بارزانی، ل هه‌مبه‌ر بوویه‌را شه‌واتا کامپا شاریا یا ل سینۆرێ پارێزگه‌ها دهۆکێ دلگرانیا خوه ڕاگەهاند ود داخویانیەكێ دا گۆت كو حكومەتا ھەرێما كوردستانێ دێ قه‌ره‌بووکرنا زراردیتیێن ڤێ بوویه‌رێ بكە.
مه‌سروور بارزانی د داخویانیا خوه دا كو ل سه‌ر مالپەرا خوە یا توتته‌رێ بەلاڤ كر بوو. دبێژە: ” ژ به‌ر نووچه‌یا شه‌واتا ل کامپا شاریا ل دوهۆکێ قەومی، ئه‌ز خه‌مگینم.”
سه‌رۆکوه‌زیر دبێژە: “ئه‌ز دگه‌ل پارێزگار ئاخڤیم و ئه‌م پشته‌ڤانیا ته‌مام ئا حکومه‌تا هه‌رێما کوردستانێ ژ بۆ دابینکرنا پێویستی و قه‌ره‌بووکرنا زراردیتیان دووپات دکن. هه‌روها ژ خێرخوازان داخواز دکم کو ئالیکاریێن زێده‌تر ژ بۆ کامپێ دابین بکن.
ل سه‌ر ڤێ بوویەرا خەمگین و دلتەزین، پارێزگارێ دهۆکێ، عه‌لی ته‌ته‌ر، گۆت كو هه‌ر چ پێدڤی به ئەو دێ ژ بۆ که‌سێن زراردیتی بکن.
ھەر ژ كێلیكا بەلاڤبوونا نووچەیا شەواتا كامپا شاریا، خه‌لکێ دهۆکێ و ھەولێرێ و ھندەك دەڤەرێن دن ده‌ست ب هه‌لمه‌ته‌کێ کرن داكو ژ بۆ لێقەومیان ئالیكاریان كۆم بكن. وەكە تێ زانین، کوردێن ئێزدی كو سالا 2014ێ ژ بەر تەرۆریستێن داعشێ ملك، مال و دەڤەرێن خوە چۆل كرن و بەر ب دەڤەرێن دن یێن ئارام كۆچیبەر بوون. ل پارێزگه‌ها دهۆکێ 16 کامپ ژ بۆ وان هاتنه بەرھەڤ كرن و لێ ئاكنجیێ كرن. لێ ژ به‌ر رەوشا ئالۆز و نە رەحەتا شنگالێ و ژ بەر هه‌بوونا چه‌کدارێن حه‌شدا شه‌عبی و پەکەکێ نکارن بۆ سەر مال و ملكێ خوە ڤه‌گه‌رن
