پارتییا ده‌مۆکرات ئا کوردستان-سووریێ (پدكس) دیار کر کو شه‌ڤا بۆری گرووپه‌کا چه‌کدار ئۆفیسا پارتییا وان یا ل باژارێ قامشلۆ شه‌وتاندیه.
د هه‌مان ده‌مێ ده ل باژارۆکێ تربه‌سپیێ ژی گرووپه‌كا چه‌کدار ئالایێ کوردستانێ ل سه‌ر بانێ نڤیسگه‌ها پدکسێ شه‌وتاند.
پدکسێ دا زانین کو چه‌کدارێن سه‌ر ب پەیەدێ ڤه ئۆفیسا وان یا قامشلۆیێ و ئالایێ کوردستانێ ل سه‌ر بانێ نڤیسگه‌ها وان ل تربه‌سپیێ شه‌وتاندنه.
ئه‌ڤ نه جارا یەكێ یه کو، چه‌کدارێن پەکەکێ ل دژێ، ئه‌نکسێ،غ و پدکسێ و پارتیێن د ناڤا ئه‌نکسێ دا جهدگرن ئێریشان دکن، ئۆفیسێن وان دشه‌وتینن و سڤکاتیێ ب ئالایێ کوردستانێ دکن.
لێ هه‌ر جارێ ئه‌ڤ ئێریشێن چه‌کدارێن پەکەکێ ب نووچه‌یه‌کی یان ژی ب داخوویانیه‌کێ دهێن شە‌رمه‌زار كرن. د راستیا خوه دا، هاته ئیسپاتکرن کو، هه‌تا پەیەدە، حەسەدە و هه‌ر رێخستنه‌ک ل رۆژاڤایێ کوردستانێ سیاسه‌تا پەکەکێ رێڤه دبه چە جارا نه ل گه‌ل ئه‌نکەسێ و نه ژی ل گه‌ل پارتیه‌ک دن کوردستانی هه‌ڤکاریه‌کی ناکه.
ب ده‌هان جاران هه‌ڤکاری و رێكەفتن هاتنه ئیمزه‌کرن لێ ل سه‌ر کاغزێ مایه. ره‌وشا پەکەکێ ل رۆژاڤایێ کوردستانێ دیارە، سیاسه‌تا کو ن رێڤه دبن ڤه‌کریه و یه‌ک ئارمانجا وان یا سه‌ره‌که هه‌یه؛ ل رۆژاڤایێ کوردستانێ کوردا نه‌هێلن، ده‌ڤه‌رێ بکن هه‌ره‌مه‌ک ب ته‌مامی نشته‌جیێن عه‌ره‌ب ببه پرانی و ده‌ڤه‌رێ وه‌ک کوردستان ژ هۆلێ راکن. چو دۆزا وان ژ بۆ کوردستانێ و کورده‌یاتیێ نینە.
ئه‌گه‌ر وه‌لاته‌کی، یان ژی ده‌ڤه‌ره‌کی بلندکرنا ئالا کوردستانێ قه‌ده‌غه به،گه‌لۆ دێ پاشه‌رۆژێ دس ئه‌وێن کو ڤی ئالایی قه‌دەغە دکن، دێ ژ بۆ کورد و کوردستانێ چ ئارمانجا وان هه‌به؟
به‌رێ خوه بدنێ گه‌له‌ک پارتی و ئالیێن سیاسی ڤان ئێریشێن چه‌کدارێن پەکەکێ شه‌رمه‌زار ژی ناکن. لێ مخابن نه ئه‌نکەسە و نه‌ژی پدکس دۆزێ ل وان ئالیێن سیاسی ناکن کو، ژ بۆ چ هوون ئێریشێن پەکەکێ ل دژی نشتمانپه‌روه‌رێن کورد و ل دژێ نرخێن کوردستانی شه‌رمه‌زار ناکن؟ گه‌ره‌ک ئه‌ڤ ببه پیڤانه‌ک ژ بۆ پێوه‌ندیێن ئه‌نکەسێ و پدکسێ.
ده‌ما له‌شکه‌ره‌ک ترک یان ژی که‌سه‌ک نژادپه‌ره‌ست سڤکاتیێ ب ئالا کوردستانێ دکه، ئالیێن سیاسی دکه‌ڤن رێزێ و داخوویانیێن شه‌رمه‌زاریێ رادگهینن، د مه‌دیا جڤاکی دا ب رۆژان وێنه‌یێن وان به‌لاڤدکن و نرخاندنا دکن. لێ پەکەکە ل قامیشلۆ و ده‌ڤه‌رێن دن ل رۆژاڤایێ کوردستانێ ئالا کوردستانێ دشه‌وتینه و که‌سه‌ک ده‌نگ ناکه. گه‌لۆ چ جوداهی د ناڤبه‌را نژادپه‌ره‌ستێن ئالا کوردستانێ دشه‌وتینن و چه‌ته‌یێن پەکەکێ دا كو هه‌مان تشتێ دکن، هه‌یه؟ ئه‌گه‌ر به‌رسڤا ڤێ پرسێ هه‌به ژ خوه هه‌رتشت ته‌مامه. لێ مخابن ل با پرانیا رێخستنێن کوردا به‌رسڤا ڤێ پرسێ نینە.
هه‌تا کو گه‌له‌مپه‌ری کورد سیاسه‌تا پەكەکێ ناسنه‌کن دێ ل همبه‌ر ڤێ سیاسه‌تێ نه خوه‌دی هه‌لوه‌ستبن ئه‌و نکارن گاڤه‌کی به‌رەڤپێش ڤه باڤێژن و دۆزا ده‌ستخستنا مافێن ره‌وا یێن نه‌ته‌وه‌یێ کورد دا گاڤەكێ پێش بکه‌ڤن. ئه‌گه‌ر تایبه‌تی پارتیێن سیاسی هه‌تا وه‌ک ڤێ گاڤێ پەكەكە ناسنه‌کربن د ژیانا خوه هه‌موویێ دا پەكەكێ ناسناکن و ل همبه‌ر وان نابن خوه‌دی هه‌لوه‌سته‌ک راسته‌قێنی.
د ڤێ مژارێ ده گه‌له‌ک تشت هه‌نه بێن گۆتن. ل باش بزانن کو، ل رۆژاڤایێ کوردستانێ پەکەکێ ئاگره‌ک پێخستیه و د ڤی ئاگری دا ب ته‌نێ کورد دشه‌وتن. چنەكرنا کوردان ل ەۆژاڤایێ كوردستانێ ئه‌رکا سه‌ره‌که یا پەکەکێ یه، ژ خوە هەر نوكە ناڤێ كوردستانێ د فەرهەنگا وان دا نەمایە بوویە باكورێ رۆژهەلاتێ سوریێ.
