ل گۆر ده‌ستوورا عیراقێ یه‌ک ژ ده‌ستهلاتێن سه‌رۆکۆمار پاراستن و پارێزگاریکرن ژ ده‌ستوورا بنگه‌هینه، لێ کا ئه‌م بنێرن سه‌رکۆمارێ به‌رێ فواد مه‌عسوم و سه‌رۆکۆمارێ نوو به‌رهه‌م سالح چاوا ده‌ستوور پاراستیه و پارێزگاریێ لێ دکن:
فواد مه‌سووم
سه‌رۆک کۆمارێ عیراقێ یێ به‌رێ و ئه‌ندامێ سه‌رکردایه‌تیا یه‌کێتیا نشتمانیا کوردستانێ، فواد مه‌عسوم، چار سالان ل کۆشکا کۆماری ل به‌غدایێ ل سه‌ر کورسیا سه‌رۆکۆماریێ ڕوونشت، لێ د ناڤا وان هه‌ر چار سالان ده ل هه‌مبه‌ر وێ بێمروه‌تی، زۆرداری و ئێریشێن به‌غدایێ ل دژی هه‌رێما کوردستانێ و گه‌لێ کورد کری، چار گۆتنێن خێرێ، چار هه‌لوه‌ستێن کوردانه، چار بزاڤێن مێرانه نه‌کرن و نیشان نه‌دان.
فواد مه‌عسوم ل سه‌ر بڕینا بودجه‌یا هه‌رێما کوردستانێ بێهه‌لوه‌ست بوو، ل سه‌ر وێرانکرنا خۆرماتو و ده‌ربه‌ده‌رکرنا خه‌لکێ وێ بێده‌نگ بوو، ل سه‌ر داگیرکرنا که‌رکوکێ و ده‌ڤه‌رێن دن بێ ده‌نگ بوو، ل سه‌ر شه‌هیدکرنا پێشمه‌رگه، ل سه‌ر ئێریشێن له‌شکه‌رێ عیراقێ و حه‌شدا شەعبی بۆ سه‌ر باژار، گوند و وارێن کوردان بێ ده‌نگ بوو.
ل گۆر ده‌ستوورا بنگه‌هینا عیراقێ، حکومه‌تا به‌غدایێ چێنابه ئارته‌شێ تێکه‌لی ناکۆکیێن سیاسی بکه و ل دژی هه‌ڤوه‌لاتیێن سڤیل بکار بینه، لێ ـه‌یده‌ر عه‌بادی ئه‌ڤ کر و ئارته‌شا عیراقێ ل دژی کوردستانێ بکارئانی، لێ پارێزه‌رێ ده‌ستوورێ فواد مه‌عسوم بێ ده‌نگ بوو و یه‌ک گۆتن ژی نه‌کر.
ل گۆر ده‌ستوورێ پێشمه‌رگه‌یێ کوردستانێ به‌شه‌ک ژ سیسته‌ما به‌رگریا عیراقێ یه و دڤێ معاشێ وان بده، لێ هه‌تا نها به‌غدایێ معاشێ پێشمه‌رگه نه‌دایه. د ناڤا وان چار سالان ده ژ بۆ جاره‌کێ ب ته‌نێ ژی فواد مەعسوم بانگی سه‌رۆک وه‌زیرێ عیراقێ نه‌کر: کا هوون چما ده‌ستوور بن پێ دکن و معاشێ پێشمه‌رگه نادن؟
داخستنا ده‌ریێن سه‌ر تخووبان، داخستان باله‌فرخانه‌یێن کوردستانێ هه‌لوه‌ست نه‌بوو. ژ بلی ڤان هه‌موویان ژی د گۆتارا خوه یا داویێ و خاترخاستنێ ده ل پارلامه‌نتۆیا عیراقێ، ب یه‌ک په‌یڤ ژی به‌حسا قاره‌مانی و مێرخاسیا پێشمه‌رگه‌یێ کوردستانێ د شه‌رێ دژی داعیشێ ده، نه‌کر.
به‌رهه‌م سالح
هه‌ر ژ ده‌ستپێکێ، به‌رهه‌م سالح، گاڤێن شاش ئاڤێتن و یێ ژ ده‌ستپێکێ گاڤێن شاش باڤێژه، تێ چاڤه‌رێکرن کو هه‌تا داویێ ل سه‌ر شاشیێن خوه به‌رده‌وام به کو زیان و زراره‌که مه‌زن ب ده‌ستکه‌فتیێن هه‌رێما کوردستانێ بده.
دئاڤێتنا گاڤا یه‌که‌م ده، به‌رهه‌م سالح دگه‌ل به‌ره‌یێ ترکمانی د جڤینه‌که هه‌ڤبه‌ش ده ل که‌رکوکێ ل هه‌ڤ کر کو پێشمه‌رگه‌یێ کوردستانێ نه‌چه که‌رکوکێ و ئه‌گه‌ر پێشمه‌رگه هه‌ول بده ژی ب هه‌ر ئاوایی ڕێ لێ بێ گرتن.
سه‌رۆکۆمار کو ئه‌و بخوه پارێزڤانێ ده‌ستوورێ یە، لێ به‌رهه‌م سالح د یه‌که‌م سه‌ردانا خوه یا بۆ هه‌له‌بجه ده، ده‌ستوور بن پێ کر و هه‌رێما کوردستانێ ب باکورێ عیراقێ بناڤ کر کو ئه‌ڤ یه‌ک ژی ل دژی ده‌ستوورا عیراقێ یه، ده‌ستوور دبێژه هه‌رێما کوردستانێ لێ هنده‌ک عه‌ره‌بێن شۆڤه‌ن ژ به‌ر وێ ڕق و کینا ل هه‌مبه‌ر کوردان هه‌یه نابێژن هه‌رێما کوردستانێ، ب ته‌نێ باکورێ کوردستانێ ب لێڤ دکن.
هه‌یامه‌که به‌حس تێ کرن کو بودجه‌یا گشتی یا عیراقێ ل پارلامنه‌تۆیا عیراقێ یه و پشکا هه‌رێما کوردستانێ ۱۲% ده‌ستنیشان کریه، هه‌تا ڤێ کێلیکێ ژی ده‌نگ ژ به‌رهه‌م سالح نه‌هاتیه و چ هه‌لوه‌ست و نه‌رازیبوون نیشان نه‌دانه.
ڕۆژا 31.10.2018 ێ ئیداره‌یا شه‌رعی یا شناگلێ ل گۆر لهه‌ڤکرنه‌کێ دگه‌ل والیێ نه‌ینه‌وایێ، ڤه‌گه‌ره شنگالێ، لێ چه‌کدارێن پککێ و حشه‌دا شەعبی ڕێ ل پێشیا وان گرتن و ڕێ ژێ ڕه نه‌دا ل شنگالێ ده‌ست ب کار و چالاکیێن خوه بکن. ئه‌ڤ پرس پرسه‌که ده‌ستووری یه و سه‌رۆککۆمار پارێزه‌رێ ده‌ستوورێ یه، لێ مخابن سه‌رۆکۆمار ل سه‌ر ڤێ پرسێ خوه بێده‌نگ کریه و ناخوازه دلێ دۆستێن خوه یێن عه‌ره‌ب یێن کو ئه‌و کری سه‌رۆکۆمار ژ خوه عاجز بکه.
والیێ که‌رکووکێ یێ بوه‌کاله‌ت، ڕاکان جبووری، کو پشتی بوویه‌رێن ۱۶ێ ئۆکتۆبه‌را سالا بۆری ده‌ست بکار بوویه، ب فه‌رمی زمانێ کوردی ل سازیێن فه‌رمی و حکومه‌تێ ل ویلایه‌تا که‌رکوکێ قه‌ده‌خه‌کریه. ل گۆر ده‌ستوورا عیراقێ زمانێ عه‌ره‌بی و کوردی دو زمانێن فه‌رمی نه ل سه‌رتاسه‌ری عیراقێ. لێ به‌رهه‌م سالح خوه ل سه‌ر ڤێ پرسا گه‌له‌ک گرنگ ژی بێده‌نگ کریه و هه‌تا نها چ هه‌لوه‌ست نیشان نه‌دانه.
ئه‌گه‌ر ئه‌ڤ ده‌ستپێکا هه‌لوه‌ست، کار و خه‌باتێن به‌رهه‌م سالح به، گه‌لۆ دێ هه‌تا داویێ چه‌وابه. ئه‌گه‌ر هوسا ده‌رباس ببه، ئه‌م مه‌جبوورن بێژن: ڕه‌حمه‌ت ل گۆرا کفن دزی.
