سیاسی

قاسم سلێمانی و باشوورێ كوردستانێ پشتی بریارا ئەمریكایێ

ده‌وله‌تێن یه‌کبوویێن ئەمریکایێ ب بریاره‌کا بێ میناک، پاسدارێن کۆمارا ئیسلامیا ئیرانێ خسته‌ ناڤ لیسته‌یا گرووپێن ته‌رۆریستی و ڤێ بریارا ئیداره‌یا کۆشکا سپی ل جیهانێ ده‌نگ ڤه‌دا و ب ئاوایێن جودا هات نرخان و پێشوازیکرن و هێشتا گه‌له‌ک وه‌لاتان هه‌لوه‌ستا خوه‌ ل هه‌مبه‌ر وێ بریارێ ڕانه‌گه‌هاندیه‌.

ل گۆر سیاسه‌ت و یاسایێن ئەمریکایێ هه‌ر ڕێخستنه‌ک، گرۆپه‌ک یان که‌ساتیه‌ک د لیسه‌یا ته‌رۆرێ دابه‌ دڤێ دانووستاندن پێ ڕا نه‌هێن کرن، دڤێ بازرگانی دگه‌ل نه‌هێت کرن و هه‌موو تێکه‌لیێن سیاسی و ئابۆری دگه‌ل بهێن برین.

ل گۆر ڤێ یه‌کێ باشوورێ کوردستانێ و ب تایبه‌تی یه‌کێتیا نشتمانیا کوردستانێ دکه‌ڤه‌ د ڕه‌وشه‌ک گه‌له‌ک ئالۆز و محرج دا، ژ به‌ر کو تێکه‌لیێن یه‌کێتیێ دگه‌ل ئیرانێ و ب تایبه‌تی دگه‌ل فه‌رماندارێ هێزا قودس، قاسم سلێمانی، په‌یوه‌ندیێن تایبه‌تی و دیرۆکی نه‌ و ئیرانێ و ب تایبه‌تی قاسم سلێمانی، یه‌کێتی ژ گه‌له‌ک ڕه‌وشێن خه‌راپ و ژناڤچوونێ ڕێزگار کریه‌.

 د ڤێ ڕه‌وشێ ده‌ یه‌کێتی دێ چ بکه‌؟ دێ بریارا ئەمریکای ب جی بکه‌ و تیکه‌لیێن خوه‌ ب هێزا قودس و فه‌رماندارێ وێ قاسم سلێمانی قوت بکه‌ یان ژی دێ پێگیرییێ ب بریارا ئەمریکایێ نه‌که‌ و دێ ل سه‌ر سیاسه‌تا خوه‌ یا گرێدایی قاسم سلێمانی به‌رده‌وام به‌؟ گه‌لۆ ئه‌گه‌ر یه‌کێتی بریارا ئەمریکایێ بن پێ بکه‌ و ل سه‌ر تێکه‌لیێن خوه‌ یێن بهێز دگه‌ل قاسم سلێمانی به‌رده‌وام ببه‌ دێ هه‌لوه‌ستا ئیداره‌یا ئەمریکایێ چ به‌؟

سه‌رۆکێ ئەمریکایێ ترومپ، دەما ئەو بریار دەرخستی، گۆت:

–        ئیرۆ، ئه‌ز ب فه‌رمی پلانا حکومه‌تا خوه‌ ژ بۆ دیارکرنا ئارته‌شا پادسارێن شۆره‌شا ئیسلامیا ئیرانێ، هه‌روها هێزا قودس، وه‌که‌ ڕێخستنه‌که‌ ته‌رۆریستی یا بیانی، ل گۆر ماده‌یا 219 ئا یاسایا کۆچ و ڕه‌گه‌زنامه‌یێ ڕادگەهینم.

–        ئه‌ڤ پێنگاڤا بێ میناک ڤێ ڕاستیێ ده‌ردخه‌ کو ئیران ته‌نێ سپۆنسۆر و پشته‌ڤانێ ته‌رۆریزمێ نینه‌، به‌لکو سوپایا پاسداران ب ئاوایه‌کێ چالاک به‌شداری د په‌ره‌دان و هه‌ڤکاریکرنا ته‌رۆریزمێ دا دکه‌.

پشتی بریرا سه‌رۆکێ ئەمریکایێ، وه‌زیرێ ده‌رڤه‌ یێ وی وه‌لاتی ژی د پره‌سکۆنفه‌ره‌نسه‌کێ دا ناڤه‌رۆکا بریارێ ڕاگه‌هاند و گۆت کو پاسدارێن ئیرانێ و هێزا گرێدایی وێ، هێزا قودس، ڕێخستنێن ته‌رۆریستن و ئه‌ڤ بریار هات دان داکو باندۆرا ئیرانێ ل وه‌لاتێن ده‌ردوورا وێ کێم ببه‌ و زێده‌تر ئالۆزییان ل هه‌رێمێ و جیهانێ چێنه‌کن.

ن ھ

Back to top button