قه‌ده‌غه‌کرنا کوردی د تویته‌رێن شاره‌داریان دا
ئه‌ڤ چ ده‌مە ئه‌ڤ چ ده‌ورانه، ئه‌ڤ چ دوورووتیە، ئه‌ڤ چ هه‌لوه‌ستێن به‌رادایی نه؟
دیسا وه‌که هه‌رجار د ڤێ ده‌ما داوی دا گه‌له‌ک هه‌لوه‌ستێن خه‌راب د ده‌ربارێ زمانێ کوردی دا تێن گرتن. هه‌ر که‌س ل گۆری نه‌زانی و چه‌وتیێن خوه د ده‌رحه‌قا زمانێ کوردی دا بێسه‌رووبێر داخویانیان ددن، په‌یامان پێشکێش دکن، هه‌لوه‌ستان پێشدخن و مافێن بکارانینا زمانێ کوردی دخوازن ئاسته‌نگ بکن. لێ بلا هه‌موو که‌س و سازی بزانبه کو ئه‌ڤ هه‌لوه‌سته‌که شاشه.
پێشی ل شاره‌داریا به‌دلیسێ ل سه‌ر زمانێ کوردی هه‌لوه‌ستێن کێڤی هاتن پێشخستن، دوورا پۆشمان بوون و هێجه‌تێن ته‌رامه‌را پێشکێش کرن. ل هنده‌ک ده‌ڤه‌ران ناڤێ کۆلان، تاخ و تابلویێن ب کوردی گوهه‌رتن. هنده‌کان خوه‌ستن ناڤ و شۆپێن کورد نەھێلن. هنده‌کان خوه‌ستن کو دژمنایه‌تیا خوه ب کوردان ڕا د وان مژاران دا پێشبخنین.
گاڤا کو وه‌زاره‌تا هوندری/ناڤخوەیی قەیوم دانین سه‌ر سێ شاره‌داریێن کوردان، بریارا خوه د مالپه‌را وه‌زاره‌تێ دا ب کوردی ژی به‌لاڤکرن! ئانگۆ ل ئالیه‌کی قه‌ده‌خه و زۆرده‌ستی، کێڤیبوون و ئینکارکرن، ل ئالیێ دن وه‌زارەتا هوندرێ بریارا خوه ب کوردی به‌لاڤ دکه! دیسا، پشتی کو والیێ وانێ بوو قەیووم ل سه‌ر شاره‌داریا وانێ، وی ژی هه‌ما ده‌ملده‌ست د مالپه‌را شاره‌داریێ دا نڤساندنا تویته‌رێن ب کوردی قه‌ده‌غه کرن.
ب ڕاستی ل مقابلی وان هه‌لوه‌ستان مرۆڤ دکه‌ڤه ناڤا متالان: گه‌لۆ ئه‌ڤ چ دوورووتیه، ئه‌ڤ چ ماف و حقوق نه‌ناسکرنه، ئه‌ڤ چ سه‌رگێژه‌کیه؟ چما هه‌ر ئالی دخوازه ل سه‌ر زمانێ کوردی خەتماندن و ده‌روونیا خوه بده ده‌ر؟ کی ژ کێ ڕا چ شه‌لافیان دکه؟ ئه‌و ئێن کو ب ڤێ ڕێیا هانێ دخوازن که‌ڤنه‌په‌ره‌ستی، نه‌ژاتپه‌ره‌ستی و دژمنایه‌تیێ ب کوردان ڕا بکن، بلا زانبن کو ئه‌و د ناڤا هه‌لوه‌ستێن چه‌وت ده نه و چ که‌س ژی نکاره سوودێ ژ وان بریارێن چه‌وت بده‌ست بخینه.
ئه‌م وه‌که پلاتفۆرما زمانێ کوردی ڤان هه‌لوه‌ستێن ته‌رامه‌را شه‌رمه‌زار دکن و ژ ده‌وله‌تێ داخواز دکن کو هه‌لوه‌ستا خوه د ده‌ربارێ زمانێ کوردی دا زه‌لال بکه. په‌یاما ده‌وله‌ت و سازیێن ده‌وله‌تێ دڤێ وه‌رن زه‌لال کرن. دڤێ هه‌لوه‌سته‌کا ته‌بووت وه‌ره پێشکێش کرن. ل ئالیه‌که ده‌وله‌ت وه‌شانا تەرەتێ ب کوردی دکه، ل ئالیه‌کی ل زانینگه‌هان به‌شێن کورد هه‌نه، ل دبستانان ده‌رسا بژارته هه‌یه و ل ئالیه‌کی ژی دژمنایه‌تی ب زمانێ کوردی ڕا تێ کرن. ژ به‌ر وان سه‌ده‌مان ئه‌م جاره‌کا دن دوباره دکن؛ زمانێ کوردی دڤێ ببه زمانێ په‌روه‌ردێ و زمانێ فه‌رمی. دڤێ زمانێ کوردی ببه خوه‌دیێ ستاتوویه‌که حقووقی. ژ بۆنا چاره‌سه‌ریا وان پرسگرێکان دڤێ ده‌وله‌ت سازییا زمانێ کوردی ب فه‌رمی دامه‌زرینه. شه‌لوولبوون دڤێ ژ هۆلێ ڕابه.
ئەنجاخ ولۆ پرسا زمانێ کوردی نۆرمالیزه ببه، ببه جڤاکی و مافه‌کی خوه‌زایی. ئه‌م کورد دۆزا زمانێ خوه دکن! ئه‌م کورد نه ل دژی زمانێ چ که‌سانه، بلا ژ که‌ره‌ما خوه ڕا ژی چ که‌س دژمنایه‌تیێ ب زمانێ کوردی ڕا نه‌که. یێن کو دژمنایه‌تیێ ب زمانێ کوردی ڕا بکه، دژمنایه‌تیێ ب کوردان ڕا دکه. بلا ئه‌ڤ ولۆ بێ زانین!
پلاتفۆرما زمانێ کوردی
دیاربەكر
2019.08.25
