بریاره د ڤێ مه‌هێ دا، دانووستاندنێن ئه‌نەکەسێ و پینەکێ جاره‌کا دن ده‌ستپێ بکه‌ن. شاندەیا ئەمریكایێ نێزیک ڤه‌دگه‌ره ڕۆژاڤایێ کوردستانێ ژ بۆ کو قۆناغا سێیه‌م یا دانووستاندنان ده‌ستپێ بکه. ڤێ جارێ، مژارێن ڕێڤه‌به‌ری/ئیداری و له‌شکه‌ری تێنه گۆتووبێژکرن.
سالح گه‌دۆ، ئه‌ندامێ شاندەیا پینەکێ دبێژه: “پشتی 20ێ ڤێ مه‌هێ دیالۆگ دێ ده‌ست پێ بکه. شاندەیا ئەمریكایێ ژی دێ ئاماده به و چاڤدێریێ بکه. ئه‌م نها د قۆناغا به‌شداریا ئه‌نەکەسێ یا بۆ ناڤ ڕێڤه‌به‌ریێ دا نه. دڤێ ئه‌م زوو ل هه‌ڤ بکن و ب هه‌ڤ ڕا مه‌سه‌له‌یان چاره‌سه‌ر بکن.”
ئه‌نەکەسە ناخوازه ئالیێ سێیه‌م د دانووستاندنان دا هه‌بە و دبێژه: دڤێ هه‌ر تشت ب ته‌وافق بێ کرن. ئالیه‌ک خوه ل سه‌ر یێ دن فه‌رز نه‌که و ڕێڤه‌به‌ریه‌کا هه‌ڤبه‌ش بھێتە ئاڤاکرن.
خۆشناڤ ناسۆ، ئه‌ندامێ ئه‌نجوومه‌نا خوه‌جهیا پەدەکە-سێ دبێژە: ” ده‌ردۆرا 15 ڕۆژێن دن شاندەیا ئەمریكایێ دێ ھێت و ئه‌م ل به‌ندێ نه. ئه‌م دێ به‌رده‌وام بن ل سه‌ر دانووستاندنێ. هێڤیا مه هه‌یه ئه‌م بگەهن ئاسته‌که باش.”
پینەک و ئه‌نەکەسێ هه‌تا نها ل سه‌ر پره‌نسیپێن سیاسی، لێڤه‌گه‌را سیاسی ل هه‌ڤ کرنە، لێڤه‌گه‌ر 40 ب 40 د ناڤبه‌را هه‌ردو ئالیان ده یه و 20ێ مایی ژی نیڤ ب نیڤ ژ بۆ پارتیێن ده‌رڤه‌ی خوه ده‌ستنیشان دکن.
عه‌بدولکه‌ریم محه‌مه‌د، ئه‌ندامێ پۆلیتبورۆیا پەدەکە-سێ ژ ڕووداوێ ڕا ئاشکه‌ره کر کو ده‌ما ڕۆژا 2020.12.25 ێ، نوونه‌رێن ئەمریكایی دگه‌ل پینەک و ئه‌نەکەسی جڤیاین، وان سۆز دابوون کو د حه‌فته‌یا یه‌که‌م ژ ڤێ مه‌هێ دا ڤه‌گه‌رن و ده‌ست ب دانووستاندنان بكێتە کرن.
یووسف دازانین كو دڤێ کوردێن ڕۆژاڤایێ کوردستانێ ب خوه بریارێ بدن و ده‌ستێوه‌ردان د کارووبارێن وان ده نەھێتە کرن.
ده‌ستپێکرنا سێیه‌مین قۆناغا دانووستاندنێن ئه‌نەکەسێ و پینەکێ یه‌ک ژ مژارێن هه‌ری بالکێشه، ل ڕۆژاڤایێ کوردستانێ.
داخویانیا مه‌زلووم کۆبانی ده‌ربارێ ئه‌نجامدانا هلبژارتنان ل ڕۆژاڤایێ کوردستانێ و باکور و ڕۆژهلاتێ سووریێ د ناڤا ڤێ سالێ دا، ئالیێن سیاسی خستنه ناڤ ته‌ڤگه‌رێ و مژارا دانووستاندنێ د ڕۆژه‌ڤا سیاسی ده گه‌رم کریه.
ژ ئالیه‌کی دن ڤه، داخویانیێن شاندەیێ تایبه‌ت یێ ئەمریكایێ ده‌ربارێ به‌رده‌وامیا شه‌رێ ل دژی داعشێ و ڕه‌وشا عه‌ین عیسا خه‌لکێ ڕۆژاڤایێ کوردستانێ پیچەكێ ئارام کر.
