قەندیل ل دژی هەدەپێ و سەلاحەدین دەمیرتاش
د هه‌ڤپه‌یڤینه‌کێ دا، ژ سه‌رۆکا گرۆپا هەدەپێ د پەرله‌مه‌نتۆیا ترکیێ دا، مه‌رال به‌شتاش ئەڤ پرسیارا ل ژێر ژێ هاته کرن:
تێ گۆتن کو د ناڤبه‌را هه‌ڤسه‌رۆکێ گشتی یێ هەدەپێ یێ به‌رێ سه‌لاحەدین ده‌میرتاش و هەدەپێ دا ناکۆکی هه‌نه، راستیا ڤێ چیه؟ هوون بانگێن ده‌میرتاش یێن ژ بۆ دانینا چه‌کان چەوا دنرخینن؟
د به‌رسڤا خوه دا، به‌شتاش دبێژه:
ئه‌م ڤان نووچەیان دخوینن. د ناڤبه‌را مه دا ئالۆزی نینە. دو هه‌فته به‌رێ جیگرێ سه‌رۆکێ گورۆپا مه و جیگرێ سه‌رۆکێ پارتییا مە سه‌ردانا ده‌میرتاش کرن. به‌ری نها ژی هه‌ڤسه‌رۆکێ مه، سەرەدانا وی کربوو. پارێزه‌ر هه‌ر رۆژ دچن سەردانا وی. تێکلیه‌کا مه یا به‌رده‌وام هه‌یه. برێز سەلاحەدین هه‌ڤسه‌رۆکێ مه یێ به‌رێ یه، ئەز پێنج- شه‌ش سالا دگه‌ل وی خه‌بتیمه. د ڤی واری دا پرسگرێکه‌ک تایبه‌ت هه‌یه، تابلۆیه‌ک کو تێ خوه‌ستن وه‌کی کو ناکۆکی هه‌یه تێ دیارکرن. هایا مه ژ ڤێ هه‌یه. ئه‌م ڤێ ژی دبینن. دبه کو ئاوایێ ئاخافتنا مه جودا به، په‌یڤێن کو ئه‌م ب کار تینن جودا بن، رێبازا مه جودا به، لێ ئه‌ز ژ وه را ببێژم کو هه‌موو نرخاندنێن ددن خوویاکرن کو ،د ناڤبه‌را هەدەپێ و سەلاحەدین به‌گ دا جودابوون، ناکۆکی و نه‌ره‌هه‌تی هه‌یه، ڤالا نه.
ئاشکه‌ره دخوه‌یێ کو به‌شتاش نه‌کاریه ب ئاوایه‌ک زه‌لال به‌رسڤا پرسیارا ژێ هاتیە کرن بده. پرس ژی گه‌له‌ک ب هوستایی هاتیه کرن. که‌سه‌کی به‌حسا ناکۆکیا ده‌میرتاش و هەدەپێ نه‌کریه. ناکۆکی د ناڤبه‌را ده‌میرتاش و قه‌ندیل دا هه‌یه. داخوویانیێن ده‌میرتاش د ده‌ربارێ بوویه‌را مێرسینێ دا کری گه‌له‌ک ڤه‌کریه و قه‌ندیل و کەجەکێ گه‌له‌ک ب توندی به‌رسڤا ده‌میرتاش دان. قه‌ندیل دا خوویاکرن کو، ده‌میرتاش نه شۆره‌شگه‌ره و چو جارا ژی نه‌بوویه شۆرەشگەر ژی. بلا حه‌دێ خوه بزانبه و ل دژی چالاکیێن گه‌ریلا ده‌رنه‌که‌ڤه.
هه‌روه‌ها قه‌ندیل هه‌مان تشت ژ بۆ هەدەپێ ژی گۆتن. ده‌میرتاش پشتی داخوویانیا یه‌که‌م یا یەپەگێ به‌رسڤه‌ک دا و گۆت “چو هێز نکاره مه ژ دیتنا مه ڤه‌گه‌رینە” . تایبه‌تی مه‌دیایا نێزکی جەهەپێ و به‌شه‌ک چه‌پێن ترک ب گه‌رمی پشته‌ڤانیا داخوویانیێن ده‌میرتاش کرن. لێ هەدەپە بێ ده‌نگ ما نه‌کاری به‌رسڤا قه‌ندیل بده و پشته‌ڤانیا ده‌میرتاش ژی نه‌کر. ئه‌ڤ نه جارا یه‌که‌مه قه‌ندیل حه‌قاره‌تا ل هەدەپێ دکە. لێ نه حه‌دێ هەدەپێ یه به‌رسڤا قه‌ندیل بده .ژ به‌ر کو نه خوه‌دیێ وێ سه‌رخوه‌بوونا سیاسیه.
نها به‌شتاش بێ به‌رپرسیاری به‌رسڤا پرسا ژێ هاتی کرن دده. ناکۆکیا د ناڤبه‌را ده‌میرتاش و قه‌ندیل دا ئێدی نایێ ڤه‌شارتن، یان دێ ده‌میرتاش ژی وه‌که هەدەپێ سه‌رێ خوه بته‌وینه و ل هەمبه‌ر داخوویانیێن قه‌ندیل بێ ده‌نگ بمینه، یان ژی دێ ل داخوویانیێن خوه خوه‌دی ده‌رکه‌ڤه وخوەدی هەلوەست بە.
ئه‌گه‌ر هنده‌ک ئیرادا به‌رپرسێن هەدەپێ هه‌به بلا به‌رسڤا حه‌قاره‌تا قه‌ندیل ل وان کری بده….
ژ ئالیه‌ک دن ڤه ئەحمه‌د تورک، سری ساکیک و سری سوره‌یا ئۆنده‌ر داخواز کرنه کو هه‌رن ئه‌درنه سەلاحەدین ده‌میرتاش ببینن. پشتی ئه‌ڤ داخوازیا وان ئاشکه‌ره بوو و د مه‌دیایێ دا هاتیه به‌لاڤکرن، رۆژه‌نه‌مه‌ڤانا سه‌ده‌ما داخوازیا وان یا سه‌ردانا ده‌میرتاش پرس کرن.
ئەحمەد تورک ژ ڤێ پرسێ گه‌له‌کی خوه عاجز کر و به‌رسڤا خوه دا گۆت: ئه‌م ژ بۆ پرسگرێکێ ناچن. ئه‌م ئێ ته‌نێ بچن سه‌ردانا هه‌ڤالێن ووه یێن که‌ڤنار، سەلاحەدین به‌گ و سه‌لچوک به‌گ بکن. ل ور پرسگرێک نینە. لێ چاپه‌مه‌نی و هنده‌ک هه‌ول ددن کو ڤێ یه‌کێ مه‌زن بکن.
پشتی داخوویانیا هەدەپێ،ئه‌ڤ هه‌رسێ که‌سایه‌تێن د ناڤا هەدەپێ دا گرینگ تێنه زانین ل گۆرا فه‌رمانه‌کی ته‌ڤدگه‌رن و دخوازن ب ناڤێ قه‌ندیل بالا ده‌میرتاش بکشینن. یا ئه‌گه‌ر نه وه‌لێ بوویا گه‌ره‌ک ئه‌ولێ هه‌لوه‌ستا خوه ل هەمبه‌ر حه‌قاره‌تا قه‌ندیل ل ده‌میرتاش کری ببوونا خوه‌دی هه‌لوه‌ست ژ نووڤه بچوونا سه‌ردانا ده‌میرتاش. ئه‌ڤ هه‌رسێ خوه‌شمێر(!) مخابن نه خوه‌دیێ ئیراده‌یا خوەنە کو بکاربن ببن خوه‌دی هه‌لوه‌ست. لێ پرسگرێک د ناڤا ده‌ستێ وان دا روهن بوویه،دلۆپ دبارن..
گه‌لۆ ئه‌ڤ هه‌رسێ خوه‌شمێر دکارن نرخاندنه‌کێ ل سه‌ر هه‌لوه‌ستا قه‌ندیل یا ل دژی ده‌میرتاش بکن و دیتنا خوه ڤه‌کری بێژن؟ نه‌خێر نه حه‌ددێ وانه…
٢٠٢٢/١٠/١٤
نێرین/شرۆڤه
