سیاسی

قەیرانا گەشكرن یان ژھەڤ ڤەقەتیانا یەكێتیێ

قەرەنی قادری، نڤیسكار و رەوشەنبیرێ ژ رۆژھەلاتێ كوردستانێ، د مالپەرا خوە یا فێسبوكێ دا ل سەر رەوشا یەكێتیێ یا پشتی مرنا تالەبانی نڤیسەك ژێر ناڤێ (قەیرانا گەشكرنێ یان یا ژھەڤ ڤەقەتیانێ) نڤیسیە كو تێ دا دبێژە:

پشتی مرنا جەلال تالەبانی، سەكرەتەرێ گشتیێ یەكێتیا نشتمانیا كوردستانێ (ینك) و سەرۆك كۆمارێ بەرێ یێ عیراقێ، ئێكسەر رەوشا ناڤخوە یا یەكێتیێ تێكچو و بەر ب لاوزیێ چو. پشتی بوویەرێن ئوكتۆبەرا سالا 2017ێ ژی، ھەموو باسك و گرۆپێن ناڤ یەكێتیێ دەڤێن خوە ڤەكرن و قەیرانەكە گشتگیر بەرسینگا وێ گرت. ژبەر كریزێن كوور، پربالێنی، گرۆپێن جودا و ململانا ناڤ یەكێتیێ دا، ھەروەسا زێدەتر مایتێكرنا كۆمارا ئیسلامیا ئیرانێ د كارووبارێن ناخوەیێ یێن یەكێتیێ دا، ئەو حزب ژ رۆژا 16ێ ئوكتۆبەرێ و ھەتا نھا ب تەنێ ھزرا بەرژەوەندیێن خوە دكە و دڤێ رێ دا  ئەگەر ژێ رە بگونجە داخوازێن خوە ژی دێ بسەپینە. بنگەھا ھەموو سیاسەتا وێ د ڤێ دەمێ دا ھەر ئەڤ بوو.

یەك ژ ئەگەرێن ھەری خەراپ كو یەكێتی خوە ژ ڤێ رەوشا تێدا یا ئالۆا و یا تژی قەیران و ھەروەسا ژ بۆ كو رەوشا خوە یا گەلەك خار راست بكە، ب ئاوایەكی رەوشا سیاسیا ھەرێما كوردستانێ و ب تایبەتی پێكانینا كابینەیا نوو ل ھەرێما كوردستانێ ب رەھینە بگرە، ئەو ژی ل ژێر ناڤێن جودا كە یەك ژ وان ل شوونا كو ل گور ئەنجاما ھلبژارتنا تەڤبگەرە،  تەكیدێ ل سەر وێ یەكێ دكە كە دڤێ پێگەیێ دیرۆكی و جوگرافی یێ یەكێتیێ ل بەر چاڤان بێ گرتن،  كە ئەڤ ژی ھلبژارتنان  و ئەنجامێن وێ بێ قیمەت دكە.

قەرەنی قادری پرسیار دكە و دبێژە: گەلۆ ئەو قەیرانا یەكێتی تێ دا قەیرانا گەشكرنا وێ حزبێ یە یان  ژی دێ زێدەتر بەر ب ژھەڤڤەقەتیانێ ببە و چەقێن خەراپ ژی ژێ دەركەڤن؟

قەیران دكارە ھەم قەیرانا گەشكرنێ بە وھەم ژی دكارە قەیرانا زێدەتر ژھەڤدووركەتنێ بە.

یەك ژ ئاریشەیێن مەزن یێن یەكێتیێ، پشتی نەمانا مام جەلال، كەس د ناڤ یەكێتیێ دا نینە بكاربە وەكە مام جەلال ھەموو باسك و گرۆپێن وێ كۆم بكە رێ ل ململنانا وان بگرە.

 نەمانا مام جەلال ڤالاھیەكا مەزن د ناڤ یەكێتیێ دا دروست كر كو ھەتا نھا كەس نەكاریە وێ ڤالاھیێ تژی بكە و  تژی نابە ژی.

پشتی نەمانا مام جەلال دەرگەھ ل پێشیا چێبوونا فرەبالی، گرۆپ و ناوچەگەرێتی و ململانێ ھات ڤەكرن، ھەموو ناكۆكیێن ناڤ وێ حزبێ چالاكن و باسك و گرۆپێن وێ ژی ل گور بەرژەوەندیێن خوە دگەرن كو ئەڤ ژی دكار ە ھەم ژ بو یەكێتی نشتمانی كوردستان و ھەم ژی ژ بو ھەرێما كوردستانێ مەترسیدار بە.

Back to top button