سیاسی

كۆنێ رەش: ھەلەبجە نە قەدەر بوو

کوردۆ! پشتی ۳۲ سالان دبێژم؛ هه‌له‌بجه‌ نه‌ قه‌ده‌ر بوو، قه‌ده‌ر کو ئه‌م نه‌ یه‌ک بوون.
کوردۆ! قه‌ی قه‌ده‌را ته‌ یه‌ تو د وه‌لاتێ مه‌زۆپۆتامیا دا هاتیه‌ چاندن..! ل سه‌ر په‌راڤێن هه‌ردو چه‌مێن بێراوه‌ستان؛ دجله‌ و فه‌رات هاتیه‌ دانین… د ناڤبه‌را هه‌ردو چیایێن ب هه‌یبه‌ت و ساو؛ زاگرۆس و تۆرۆس دا مه‌زن بوویه‌.. د هێرک، نه‌وال و ده‌شتێن ته‌ دا گه‌نم هاتیه‌ چاندن، سه‌وال هاتنه‌ خوه‌دیکرن، ته‌که‌لێن ئه‌ره‌به‌یان هاتنه‌ چێکرن، شارستانی لێ هاتنه‌ ئاڤاکرن و ڤێ پاشیێ په‌ترۆل لێ هاتیه‌ دیتن..

نووح پێخه‌مبه‌ر ب که‌له‌کا خوه‌ ژ گه‌لیێ لالشا نوورانی ده‌ستپێ کریه‌، د سه‌ر چیایێ شنگالێ و بێخێر را ده‌رباسی چیایێ جوودی بوویه‌ و لێ راوه‌ستیا یه‌.. پێخه‌مبه‌ر د ناڤ خاکا ته‌ را ده‌رباس بوونه‌ و ژیانێ ژ وه‌لاتێ ته‌ ده‌ستپێ کریه‌..

ئیرۆ، قه‌ده‌را ته‌ یه‌ کو تو ب ته‌نا خوه‌، ئالا وه‌لاتێ خوه‌ بلند بکه‌.. ئه‌رێ ما نه‌ تو نه‌ڤیێ واشۆکانی، ئۆرکێش، که‌وکه‌بێ مڵان، که‌په‌زێ کیکان و قه‌ره‌چۆخێ مۆسیسانا یه‌.. ما نه‌ تو نه‌ڤیێ میر به‌درخان، شێخ ئه‌بێده‌ڵاهێ نه‌هری، مه‌لا سه‌لیمێ به‌دلیسی، شێخ سه‌ئیدێ پیران، سه‌ید رزا و بارزانیێ نه‌مره‌..

بێژه‌، بێ تێ چلۆ ئالا وه‌لاتێ خوه‌ بلند بکه‌ دا کو هه‌له‌بچه‌یه‌که‌ دن ب سه‌ر وه‌لاتیێن ته‌ ده‌ نه‌یێ؟ بلندکرنا وێ ئالێ د یه‌کیتیێ دا یه‌، د ده‌وله‌تبوونێ دا یه‌..

هه‌له‌بجه‌ نه‌ قه‌ده‌ر بوو.. قه‌ده‌ر، کو ئه‌م نه‌ یه‌ک بوون، ئه‌م نه‌ ده‌وله‌ت بوون..

FC
کۆنێ ره‌ش
2020.03.15

Back to top button