وه‌فاداری ژبیرنه‌کرنا قه‌نجییانه، ڤه‌گه‌راندنا خه‌له‌فا قه‌نجییان و سپاسدارییا خوه‌دییێ وان قه‌نجییانه. هنده‌ک مرۆڤ یان ژی هێز و پارتی و هه‌تتا مڵه‌ت هه‌نه کو د ڕۆژێن زه‌حمه‌ت و ته‌نگ دا تو خوه‌دی ل وان ده‌ردکه‌ڤی، د ڕۆژێن ته‌نگ دا تو وان ب ته‌نێ ناهێلی، تو پشتگرییا وان دکی و خوه ژ وان ڕه دکی سیپه‌ر و مه‌رتال. ئه‌و ئنسان، پارتی یان مڵه‌تێ کو تو ڤێ قه‌نجییێ ب وان دکی و خوه ژێ ڕا فه‌دا دکی، د ڕۆژێن خوه‌ش و فره‌ھ دا قه‌نجییا ته ژ بیر دکه، ژ بۆ خه‌له‌فا قه‌نجییا ته ل ته ڤه‌نه‌گه‌رینه، ئیجار ژ ته ڕا دبه دژمن و نه‌یار.
وه‌فاداری د ناڤ مه کوردان داکێمه. نه د ناڤ جڤاکا مه دا، نه ژی د ناڤ ده‌زگه‌ھ و پارتییێن مه یێن سیاسی دا وه‌فاداریێ جھێ خوە چێنەكریە و وه‌فادار پر کێمن. ئه‌م کورد ب ناڤێ ئیسلامێ یان ژی ب ناڤێ سۆسیالیزم و چه‌پیتییێ ل دووڤ تشتێن بچووك دكەڤن، ب ناڤێ هومانیزم و مرۆڤپه‌روه‌رییێ وه‌فا و وه‌فادارییێ ژ بیر دکن و هه‌تا ئاسته‌کێ دژبه‌رییا دۆزا کورد و کوردستانێ دکن و خزمه‌تێ ژ به‌رژه‌وه‌ندییێن نه‌یارێن خوه ڕا دکن.
مه‌سه‌لا فلستین و ئسرائیلێ ژی یه‌ک ژ وان مه‌سه‌له و مژارانه کو ئه‌م کورد بێوه‌فادارییێ لێ دکن. ب تایبه‌ت د ده‌ربارێ ئسرائیلێ دا کوردێن مه یێن مسلمان و سۆسیالیست بێوه‌فادارییه‌ک مه‌زن دکن و ل شوونا کو خوه‌دی ل ئسرائیلێ ده‌رکه‌ڤن، ڕادبن ئسرائیلێ دکن نه‌یارێ کوردان و ب پشتگرییا فلستین و فلستینییان خزمه‌تێ ژ به‌رژه‌وه‌ندییێن داگیرکه‌رێن کوردستانێ ڕا دکن.
ژ ده‌ما ئیمپاراتۆرییا ئاسوورییان و هه‌تا ڕۆژا ئیرۆ کورد گه‌له‌ک جاران ل جهوویان (سرائیلییان) خوه‌دی ده‌رکه‌تنه و ئه‌و ژ قرکرن و زلما نه‌یارێن وان پاراستنه. جهوو و ڕایه‌دارێن جهوویان ئه‌ڤ قه‌نجییا کوردان ژ بیر نه‌کرنه و ناکن. ژ به‌ر ڤێ یه‌کێ، چو جاری ل دژی کوردان و ل دژی ده‌وله‌تبوونا کوردستانێ ده‌رنه‌که‌تنه و وه‌ک ده‌وله‌تێن مسلمان کورد قر نه‌کرنه. ئسرائیلێ ژ ده‌ما مەلا مسته‌فا بارزانی و هه‌تا ئیرۆ پشتگرییا کوردان کریه. ئیرۆ ل ئسرائیلێ 250 هه‌زار کوردێن جهوو دژین و د هه‌ر چالاکییێن خوه دا ل کوردبوونا خوه و ل سه‌رخوه‌بوونا کوردستانێ خوه‌دی ده‌ردکه‌ڤن. ئه‌ڤە وه‌فا یه، وه‌فاداری یه. ئسرائیلی ژ کوردان ڕا وه‌فادارن و خه‌له‌فا ڤێ وه‌فادارییێ ژی ب پشتگری و خوه‌دیلێده‌رکه‌تنا سه‌رخوه‌بوونا کوردستانێ ل کوردان ڤه‌دگه‌رینن.
ل ڤاژایی ئسرائیلییان، فلستینی بێوه‌فا نه و شریکێ داگیرکه‌رێن کورد و کوردستانێ نه. ب ده‌هێ سالانه کو کورد خوه‌دی ل فلستین و دۆزا فلستینێ ده‌ردکه‌ڤن و پشتگرییا وان دکن. لێ هه‌تا ئیرۆ نه فلستینی و نه ژی ڕایه‌دارێن فلستینێ خوه‌دی ل کورد و کوردستانێ ده‌رنه‌که‌تنه، پشتگرییا کوردان نه‌کرنه، دژمناتییا کورد و کوردستانێ کرنه و بوونه شریکێ زلم و زۆرا نه‌یارێن کوردستانێ. چ د ده‌ما سەددام حسێن دا به و چ ژی ئیرۆ، فلستینی ژ ترک، عه‌ره‌ب و فارسان زێده‌تر نه‌یارتییا کوردان دکن و کوردستانه‌ک سه‌ربخوه وه‌ک ئسرائیلا دویه‌م و خەنجه‌را د پشتا عه‌ره‌بان را دبینن. د ده‌ما ئه‌نفالا سەددام حسێن دا فلستینییان ب سه‌دان و به‌لکی ب هه‌زاران کورد کوژتن، ده‌ستدرێژییا که‌چ و ژنێن کورد کرن و ب سه‌دان که‌چ و ژنێن کورد ڕه‌ڤاندن و فرۆتن ده‌وله‌تێن عه‌ره‌بان. ل ڕۆژاڤایێ کوردستانێ پرانییا وان چه‌ته‌یێن کو ب ناڤێ ئیسلامێ کوردان دکوژن فلستینی نه. پرانییا مالباتێن کو ل عه‌فرینێ هاتنه بجهکرن و ده‌مۆگرافییا عه‌فرینێ گوهه‌رتنه دیسا فلستینی نه.
براستی ژی پرانییا مه کوردان بێ وه‌فانه، ژ ڕوح و گیانی نه‌ته‌وپه‌روه‌رییێ دوورن و ب ڕوح و مه‌ژییێ هومانیزم و مرۆڤحه‌زییێ هه‌ست و شه‌خسییه‌تا خوه وندا کرنه. هومانیزم و مرۆڤحه‌زییا کو مه کوردان خوه پێ گرتیه و مه ڕێیا خوه پێ شاش کریه، وه‌ک تۆقا ئەعله‌تێ که‌تیه ستویێ مه. ب ڤێ تۆقا نەعله‌تێ ئه‌م دۆستێن خوه وه‌ک دژمن و دژمنێن خوه ژی وه‌ک دۆست دبینن. دڤێ ئه‌م شیعارا “نه‌یارێ نه‌یارێ من دۆستێ منه” چوجاری ژ بیر نه‌کن. مخابن ژ خه‌ینی مه کوردان چو که‌س و چو ده‌وله‌ت “شریکێ نه‌یارێ خوه” ژ خوه ڕا ناکه و نه‌کریه دۆست.
2021.05.18
